Củ tịc Quôk hội đơs loh, broă bơt bơtàu broă lơh jơnau kờñ Dà lơgar bè bơto bơtê là kơnòl broă kwơ màng, sồr pal geh bơta bơcri priă dờng bè bơta pràn mờ tŭ tơngai. Jơnau kờñ dŭt ndơl pal tơnguh uă cồng nha bơto bơtê tơl làm, is ồn là cồng nha bơto bơtê bơh cau pơgru mờ kwang bàng atbồ dê. Kờñ pal tam gơl pa bồ tơngoh kơlôi sơnơng bơh ờs mờng tus mblàng loh làng jơnau bơsram, bơtàu tơnguh bơta pràn jak bơsong broă; bơta kwơ màng là gam gàr geh bơta tờm bơh broă bơto bơtê dê hơ̆ là “lài ngan là bơsram gĭt jơnau, tơnơ̆ hơ̆ bơsram jơnau cih”.

Bè broă lơh jơnau kờñ Dà lơgar bè sền gàr pràn kơl dang, khà kờp làng bol mờ bơtàu tơnguh tơngai bơh nam 2026 – 2035, do là bơnàng jă tơnguh uă bơta pràn jak lơh sơnơm sàh, sơnah ƀòn dê; lơh pràn lơh sơnơm rcang gàr lài, tơnguh uă bơta pràn să jan làng bol in tàm nùs nhơm “rcang lài kòp rlau mờ sơm kòp”. Củ tịc Quôk hội kung sồr ngui măi mok, tam gơl sồ mờ tam gơl pràn bơtàu tơnguh mpồl cau lơh sơnơm. Tài bơh kòn bơnus là bơta tờm lơh nền cồng nha drơng lơh sơnơm, geh bal bơto tê, tàm jàu bơta chài, broă lơh dong kờl, tơnguh uă nùs nhơm niam lơh sơnơm, priă jền.