Tă pơgồp jơnau đơs bè tơngume, Củ tịc Quôk hội ồng Trần Thanh Mẫn ring bal mờ jơnau yal sền sơwì bơh Anih duh broă Sền gàr Dà lơgar Lơngăp lơngai mờ Lơh broă mờ lơgar ndai kung gam lời mat hòi yau; mơkung đơs là, rơndăp ai lơh jat tàm bơta jal mhar tŭ do dê, tàm tơngai bơta lơh tìs bè tiah ơm kis gam gơlik geh kal ke, rơlăc rơlèo, gơrềng kơn jơ̆ ngan tus pràn kơl dang să jan bơh làng bol dê, bơta bơtàu tơnguh kơnhăp kơ̆ mờ lơngăp lơngai ờ hềt geh bơh lài tus tŭ do.

Củ tịc Quôk hội tơngkah, kờñ ring bal bơyai lơh mpồl lơh broă jat  broă lơh pa bè: bơtơl jơnau sồr tam jàu gơnăp gơnoar lài do là kấp kơnhoàl rê tàm kấp sàh halà cơldŭ lơh broă kảñ sát tiah ơm kis càr, mờ broă lơh dong kờl măi mok sồ nàng gàr niam broă jat sền tàm ƀòn lơgar, tam gơl ală bơta nàng mpồl kảñ sát tiah ơm kis ƀòn lơgar gơwèt Kwang àng sàh, tơrgùm lòt sền tàm ƀòn lơgar, nàng tơrmù ƀà bơta ờ niam, tơnguh cồng nha lơh glài lơh tìs dềt, rah rài tàm ƀòn lơgar.