Tàm dơ̆ cri bơyai tàm điện thoại, ồng Lê Hoài Trung đơs nền lơgar Việt Nam sùm sền kwơ mờ ai uă ngan broă lơh lài uă ngan tàm bơta git gơ̆p lơh broă bal mờ lơgar Lào; đơs tờm rơ̆p pơn jăt tai lơh broă bal nền nòn mờ Ƀộ trưởng Ƀộ cri bơyai broă mờ lơgar ndai lơgar Lào dê nàng pơgồp bal tàm broă lơh pràn kơl dang bơta git gơ̆p lơh broă bal đah bàr lơgar đơs bal mờ đah bàr Ƀộ Cri bơyai broă mờ lơgar ndai đơs is.

Bàr Ƀộ trưởng ring bal rơ̆p pơn jăt tai pơgồp bal nền nòn lơh geh cồng nha ală jơnau ring bal kấp dờng mờ rơcang niam ai ală broă lơh kwơ màng bơh tơl lơgar dê kung bè đah bàr lơgar tàm tơngai tus. Lơgar Việt Nam tŭ lơi kung rơcang tam pà broă lơh mờng chài, dong kờl lơgar Lào tàm broă bơtàu tơnguh lơh sa mpồl bơtiàn, tàm hơ̆ uă ngan là tàm broă lơh jăt ală jơnau kờñ bơtàu tơnguh kơl jăp.