Dơ̆ livestream geh bơyai lơh mờ broă lơh broă bal bơh Mpồl lơh broă bal Broă lơh sa suơn sre kloh Krông Păc, làng bol, mpồl đoàn viên ơruh pơnu sàh bal mờ ờ uă mpồl lơh sa kă bro dong kờl logistics mờ pơn diang. Broă lơh geh lam lơh tàm uă bơta măi mok sồ. Đơs tàm dơ̆ livestream, Ƀí thư Đảng ủy sàh Ea Knuếc mò Ngô Thị Minh Trinh đơs tờm: “Jơnau kờñ bơh dơ̆ livestream do ờ mìng ơm wơl tàm broă tăc geh nđờ tấn plai sầu riêng, mờ kwơ màng rơlao là yal rùp rài, phan krơi is bơh ƀòn lơgar dê; lam làng bol tus bal broă tam gơl sồ, bơh broă bơsram tàm broă tăc phan tàm internet tus mờ broă yal bơta niam chài ƀòn lơgar dê; mờ ai tơngŏ bơta bơkah phan geh lơh bơh suơn sre càr Dăk Lăk dê tàm drà kă bro”.

Bơdìh mờ broă gŏ măt bơh Ƀí thư sàh, geh ờ uă làng bol tàm sàh kung tus bal nàng yal phan geh lơh sơl, mò Hoàng Thị Nguyên, 70 sơnam, kis tàm thôn Tân Sơn, sàh Ea Knuếc chờ hờp yal tŭ dơ̆ sơnrờp geh at micro yal phan ƀòn lơgar lơh geh tàm internet bè do: “Geh đah Đảng ủy sàh, Ƀí thư bal mờ ală gah, mpồl lơh broă tàm sàh neh geh broă lơh, bŭ lah 70 sơnam, ală broă lơh ngan nàng ală oh kòn, kòn sau in geh bơta chờ, gơboh gơbài bơh hìu nhă dê kung pal lơh ngan lơh bè lơi nàng geh uă plai sầu riêng tăc mờ lơgar bơdìh mờ añ pơnyờ să ngan bè oh kòn, kòn sao tàm hìu nhă añ là gơboh gơbài ngan”.

Mờ làng bol, broă gơnoar atbồ sàh ờ mìng lơh broă bal mờ jơnau lơh nền tàm pơrjum ha là sră nggal, mờ broă lơh mùl màl neh ai kwang bàng rềp mờ làng bol mờ bal mờ làng bol rơlao. Broă kwang đơng lam bồ sàh bal mờ làng bol “lik măt” là broă lơh mùl màl nàng lơh geh uă nùs nhơm tam gơl pa bơceh lơh, mờ tơnguh nùs nhơm pin dờn đah làng bol bal mờ gơnoar atbồ dê. Ồng Mai Đình Thọ, Củ tịc Mpồl cau lơh broă bal Lơh broă sa suơn sre kloh Krông Păc đơs niam jơnau bơceh lơh do: “Añ niam nùs nhơm gơwèt mờ dùl nă ùr Ƀí thư sàh ờ mìng tơrgùm tàm broă đơng lam, lam lơh tàm sàh mờ gam sền gròi tus mờ broă dong kờl làng bol bơh broă tăc phan tàm internet. Broă lơh do dong kờl làng bol lơh broă sa geh tìp mờ broă lơh pa, tơnguh uă bơta kwơ phan geh lơh mờ cèng geh cồng nha lơh sa mùl màl rơlao. Añ đơs là dùl nă ùr Ƀí thư bè hơ̆ jăk chài, mờ đềt mềr, mùl màl lơh broă bal mờ làng bol nàng jòi geh gùng dà broă lơh niam ngan ai làng bol in, sền gròi tus mờ ală broă lơh mùl màl tàm rài kis làng bol dê bè hơ̆”.

Dơ̆ livestream hòi jà geh git nđờ rơbô nă cau sền mờ uă cau dan blơi phan neh geh blơi. Ờ mìng dong kờl tàm broă tăc phan ai phan geh lơh bơh broă lơh sa suơn sre dê, broă lơh do gam dong kờl làng bol sền gŏ mờ bơsram bal tàm broă yal phan geh lơh mờ măi mok sồ, lơh geh bơta mờng lơh sa, kă bro pơgồp bal mờ drà kă bro pa. Broă Ƀí thư sàh Ea Knuêc, càr Dăk Lăk tơlik livestream tơn tàm broă tăc plai sầu riêng ngai do geh sền là broă lơh mùl màl nùs nhơm Jơnau lơh nền tàm pơrjum sồ 57 bơh Dà lơgar dê bè lơh pràn ngui măi mok pa mờ tam gơl sồ, mờ ai tơngŏ jơnau hơ “rềp làng bol, dong kờl làng bol” mờ broă lơh mùl màl bơh kwang đơng lam bồ sàh tŭ lơh jăt gơnoar atbồ ƀòn lơgar 2 kấp.