Rơndăp broă lơh geh sơnđờm lơh bơh bồ nam 2021, sơnđờm lam lơh ndrờm bal bơh bồ nam 2022 tàm bă ù ơnàng 1 rbô 810 lồ. Tus tŭ do, uă broă bơ̆t bơtàu tờm bơh Rơndăp broă lơh dê neh lơh sir, neh lơh jơh broă lơh par sền swì lơh geh tơl jơnau sồr mờ sền swì gùng dà broă lơh par. Jăt cồng nha kơlôi sơnơng bơh Mpồl lơh broă jun pơndiang gùng rơndeh par (Air Transport Action Group), tŭ ai mŭt lơh broă, Ƀlàng rơndeh par do lơh gơlik geh tơn pơgăp 22 rbô broă lơh, tă pơgồp pơgăp 3 tơmàn 700 tơlak dolar Mỹ dùl nam…Mờ lơh ngan jơh nùs uă ngan, tơngai pơrgon lơh gơs bơ̆t bơtàu ƀlàng rơndeh par Long Thành – tơngai 1 pơnđơl bơh sơnrờp lơh sir lài mờ ngai 19 nhai 12 nam 2025 lơh geh dơ̆ par sền swì, ai Rơndăp broă lơh mŭt lơh broă mờ lơh broă tàm 6 nhai bồ nam 2026…

Đơs pơndŭt dơ̆ lơh broă Tổng Ƀí thư ồng Tô Lâm jờng rơ ală Ƀộ, gah, ală ƀòn lơgar geh gơrềng neh lơh ngan jơh nùs jơh pràn bơh sơnrờp lơh sir Rơndăp broă lơh di tơngai. Đơs sùm bơta kwơmàng Rơndăp broă lơh dê, Tổng Ƀí thư sồr, pal bơ̆t bơtàu Ƀlàng rơndeh par ală lơgar Long Thành mŭt lơh broă bal mờ nùs nhơm sơrlèt jơh ală bơta krơi is, lơh lài, là rùp lơh pơnyơu pa bè phan bơna gah rơndeh par, kơnhăp jŏ mờ ngăc ngar, gơgơs anih tus lơh gơkờñ ngan rlau jơh tiah đah jum măt tơngai Lik câu Á. Tàm dơ̆ lơh broă, Tổng Ƀí thư ồng Tô Lâm kung ai jơnau đơs bè bàr pe jơnau đơs bơh ală ƀòn lơgar, cau tờm bơcri priă dê mờ jàu Cơldŭ lơh broă Đảng Dà lơgar in tơrgùm wơl, mờ pơyua tus ală anih lơh broă geh gơrềng in kơlôi sơnơng, sền swì mhar bơsong jăt gơnăp gơnoar, pal lơh di jơnau sồr bơh adăt boh lam dê mờ tàm nùs nhơm dong kờl uă ngan rlau jơh nàng Rơndăp broă lơh geh lơh sir di tơngai pơrgon, bơtàu tơngguh kơnhăp jŏ tàm tŭ tơngai tus.