Ngai òr (11/09), tàm Hìu lơh broă Đảng Dà lơgar, tềng đăp mờ broă đơng lam bơh Tổng Ƀí thư ồng Tô Lâm, Ƀộ Cíñ trị neh lơh broă mờ Mpồl lơh kơnòl broă sùm Đảng ủy Quốk hội nàng ai jơnau đơs tàm jơnau rơcang cih ală sră nggal, gùng dà broă kwang bàng bal mờ broă rơcang Pơrjum dờng cau ala măt Đảng ƀộ Quốk hội dơ̆ I, tơngai lơh broă bơh nam 2025 tus 2030.

Tàm dơ̆ lơh broă, Ƀộ Cíñ trị đơs niam jơnau rơcang cih ală sră nggal mờ gùng dà broă kwang bàng geh Đảng ủy Quốk hội rơcang nền nòn, uă bơta, di pal mờ ală jơnau geh ai mờ jơnau bơto sồr bơh Dà lơgar dê; mờ pơgồp jơnau đơs nền nòn nàng bơtơl, lơh gơs Sră nggal Pơrjum dờng. Tổng Ƀí thư ồng Tô Lâm đơs nền tàm tơngai lơh broă tus, Đảng ƀộ Quốk hội pal tơrgùm đơng lam broă lơh pràn broă bơ̆t bơtàu Đảng kloh niam, pràn kơl dang tơl ală bơta; tam gơl pa gùng dà broă đơng lam jăt broă lơh pa; tus bal, mhar lơh jăt jơh gùng dà broă lơh, jŏ jòng bơh Đảng dê gơs gùng dà broă lơh adăt boh lam nàng lơh tàm mùl màl. Tổng Ƀí thư sồr, tơrgùm đơng lam, sồr lơh geh cồng nha broă tĕ khà cau ala măt Quốk hội khoă XVI mờ cau ala măt Mpồl duh broă Làng bol ală kấp tơngai lơh broă bơh nam 2026 tus 2031. Kwang đơng lam lơh jăt niam gơnoar broă lơh adăt boh lam; bơ̆t bơtàu adăt boh lam là broă “lơh pràn bơh broă pràn” dê, bơsong bơta gơkòl; kal ke; hòi jà, lơh geh bơta pràn ai broă bơtàu tơnguh dà lơgar in.