Tàm tơngai do, tài gơrềng bơh ală dơ̆ mìu sơr, dà tih, neh lơh gơtìp uă hoàc huơr bè kòn bơnus bal mờ phan bơna gơwèt mờ làng bol tiah tàm Gùl lơgar, Tây Nguyên, tàm hơ̆ uă ngan là ală càr, ƀòn dờng: Dăk Lăk, Lâm Đồng, Khánh Hoà, Gia Lai, Đà Nẵng.

Lơh jăt jơnau sồr bơh kwang đơng lam bồ Đảng, Dà lơgar, Ƀộ Kwang àng neh hòi jà rơlao 195 rơbô dơ̆ kwang bàng cau ling mờ mpồl tus bal sền gàr lơngăp lơngai tàm ală ƀòn; rơlao 27 rơbô 700 dơ̆ rơndeh tus bal rơcang kơrian, bơsong hoàc huơr bơh mìu càl dờng, dà tih dà cò; bơyai lơh dong klàs cau gơtìp rềs àr 150 rơbô nă, dong kờl rơlao 500 tấn phan mờ 4 tơmàn 700 tơlăk đong priă dong kờl làng bol tàm ală tiah hoàc huơr. Tàm dơ̆ lam lơh, kwang đơng lam bồ Ƀộ Kwang àng hòi jà gùt mpồl pơn jăt tai lơh broă mùl màl, di tŭ dong kờl làng bol bañ lời ờ tơl sa, ờ tơl dà hùc, ờ tơl sơnơm. Kwang àng ală tiah rơcang lài sền tàm ală tiah ngòt rơngơ̆t, rơcang lài cau tìs sơgràm bơh rềs àr trồ tiah mờ tơnguh broă dong kờl làng bol.