Tàm dơ̆ lam lơh, Ƀộ trưởng Ƀộ Kwang àng – Đại tướng ồng Lương Tam Quang sồr Lam bồ Kwang àng ală mpồl, ală tiah jat tàm tơngume broă jàu tàm pơrlòng tàm Broă rơndap lơh bơh Ƀộ dê mờ 21 tơngume mùl màl “Duh rơngòt adat boh lam ngan rlau jơh – Dòn song ngan rlau jơh – Rềp làng bol ngan rlau jơh” nàng bơtơl broă lơh, broă rơndap lơh; pah nhai pơrjum ci ƀộ tơl nă kwang đơng lam, cau lam bồ, kwang bàng, cau ling kwang àng, tơl mpồl pal tàm pơndrờm, sền tìs di, đơs loh ală broă lơh geh, cồng nha ngan ngồn nàng ai tơnggŏ “Duh rơngòt adat boh lam ngan rlau jơh – Dòn song ngan rlau jơh – Rềp làng bol ngan rlau jơh” neh lơh gơtùi. 

Ƀộ trưởng ồng Lương Tam Quang pin dờn là, tơl nă kwang đơng lam, cau lam bồ, tơl nă kwang bàng, cau ling kwang àng tàm Kwang àng làng bol rơp lơh ngan, pơnđơl pràn pah ngai, ai srơh tàm pơrlòng pe ngan rlau jơh gơ rề pràn kơldang, ngan ngồn gơ gơs là bơta gơ chul lơh jat geh cồng nha Jơnau lơh nền tàm pơrjum dờng Đảng ƀộ kwang àng dà lơgar dơ̆ VIII, ai broă lơh sền gàr lơngăp lơngai, rơndap tap sèng tă pơgồp dipal tàm rài pa bơh dà lơgar dê tềng đap bơta đơng lam bơh Đảng dê.