Bơh dùl hìu bơnhă geh rài kis kal ke, tơnơ̆ 6 nam tơryang tơryồng lơh broă, ngan là tam geh kơnuh sơnơm Ngọc Linh, hìu bơnhă bi A Tụ, ơm tàm ƀòn Pu Tá, sàh Măng Ri tŭ do neh geh phan sa, phan prăp. Bi pà gĭt, kơnờm geh gùng dà broă lơh bơtàu tơnguh tờm lơh sơnơm bơh Tỉñ ủy càr Kon Tum yau dê, den geh anih priă jền ai càn priă dong kờl lơh sa den tàng hìu bơnhă bi geh tam bơta tờm chi lơh sơnơm kwơ ngan do. Tŭ do mờ suơn kơnuh sơnơm Ngọc Linh rlau 800 tờm, mìng kờp dŭ nha mờ gar tơnhào pah nam neh jơng kah ngan ai broă lơh ngui sa tàm hìu bơnhă dê. Bi A Tụ yal:“Hìu bơnhă añ dê lài do kal ke uă ngan, piang sa gam suơ̆u siar ờ tơl ngan. Bơh tŭ càr geh gùng dà broă lơh dong kờl làng bol bơtàu tơnguh tờm lơh sơnơm, añ geh càn priă bơcri nàng tam kơnuh sơnơm Ngọc Linh. Ală tờm kơnuh sơnơm tam bơh 4 tus 5 nam tŭ do kung neh geh gar. Dồ bơnah den añ pơn jat tai lời sơntìl nàng tam tai, bơnah kung tăc nàng geh priă jền ngui sa tàm hìu bơnhă. Tam geh tờm kơnuh sơnơm Ngọc Linh ờ mìng is dồ nă añ lơm ờ mờ làng bol tàm ƀòn kung jơh jơgloh, jơh rƀah sơl rao”.

Tơngai bơh nam 2020- 2025, càr Kon Tum yau ai jơnau kờñ tơrmù khà hìu bơnhă rƀah pah nam bơh 3 tus 4%. Bulah ală bơta gam ờ dồ ết kal ke, mơya ngan ngồn den khà tơrmù rƀah tàm ală sàh tiah kơh bơnơm, tiah sar lơgar ngài lơh geh khà gơmù uă rlau 2 dơ̆ jat tàm jơnau sồr Jơnau lơh nền tàm pơrjum dê. Ală jơnau sồr, Jơnau lơh nền tàm pơrjùm gơ jat bal mờ ală jơnau neh lơh nền bơtàu tơnguh, pơgồp bal mờ bơta dong kờl geh ngan, lơh sir jơnau sồr bơh gơnoar atbồ ală kấp dê, neh ngan ngồn lơh geh cồng nha. Bi A Linh, ơm tàm ƀòn Đăk Ka, sàh Tu Mơ Rông, pà gĭt, bi geh dong kờl tờm sơntìl, priă bơcri bal mờ bơta chài tam phan, den tàng ờ mìng lik klàs rƀah lơm mờ gam pơn đơl pràn lơh ngan lơh pas tai: “Ală nam pa do hìu bơnhă añ tam kơphê, tam bời lời den añ kung tus bal atbồ sền gàr brê nàng geh tai priă lơh geh kơnờm bơh hơ̆ brồ guh lik klàs rƀah mờ ròng oh kòn lòt bơsram tơl làm. Geh bơta sền gròi bơh Đảng, Dà lơgar dê añ rơ̆p pơn jat tai lùp bơsram sơng ka sền gàr tờm kơphê di mờ bơta chài nàng geh cồng nha tơnhào uă, bơta niam bơkah uă mờ tăc geh giă. Den añ kung jơh nùs sền gàr brê, broă rơndăp lơh rơ̆p tam geh tờm lơh sơnơm tềng hơđơm mƀur chi brê nàng ờ mìng lik klàs rƀah lơm mờ kung kờñ lơh pas tai”.

Bơh ală gùng dà broă lơh, Jơnau lơh nền tàm pơrjum, broă lơh di, di broă, 5 nam do, uă phan bơna lơh geh bơh làng bol kòn cau Sơdàng tàm tiah kơh bơnơm tàm tiah đah mat tơngai mut Quảng Ngãi dê, bè tiêu brê, kơnuh sơnơm jriang, ngũ vị tử... neh geh tăc tàm tiah drà pa dờng. Ală dơ̆ tăc phan tàm internet bơh ală suơn kơnuh sơnơm Ngọc Linh tàm tiah brê bơnơm ngài ngan geh bơyai lơh sùm. Uă thôn, ƀòn ờ hoan geh cau tàm tiah brê ngài, tah jrô thòng bè Vi Rơ Ngheo, Tu Thó, Kon Vơng Kia… kung bơtàu tơnguh đau sơl kơnờm bơtàu tơnguh pràn lòt nhơl mpồl bơtiàn. Ồng Võ Trung Mạnh, Ƀí thư Đảng uỷ sàh Tu Mơ Rông, càr Quảng Ngãi, pà gĭt, tiah kơh bơnơm ngài ngan do kung neh jòi gŏ bơta pràn is mờ gùng lòt bơtàu tơnguh di pal:“Đảng uỷ sàh pa sền gĭt bơta ƀuơn bơta pràn is ai he in. 4 sàh pa tàm tơngume sră nggal sền gĭt tờm hơ̆ là bơtàu tơnguh, sền gàr, atbồ brê, tam tờm lơh sơnơm, ròng phan tềng hơđơm mƀur chi brê pơgồp bal mờ lòt nhơl. Sàh tiah đah mat tơngai mut bơtàu tơnguh tờm chi sa plai, ròng phan ai ală sàh tiah đat mat tơngai lik den atbồ brê sền gàr brê, tam tờm chi lơh sơnơm, ròng phan tềng hơđơm mƀur chi brê pơgồp bal mờ lòt nhơl là gùng dà pơlam tờm. Ală sàh kung neh bơt bơtàu broă jàu ai tơl sàh in”.

5 nam do ală gùng dà broă lơh di pal ngan bơh Đảng ƀộ mờ gơnoar atbồ càr Kon Tum yau dê neh ngan ngồn gơ lòt mut tàm rài kis, lơh tam gơl bồ tơngoh kơlôi sơnơng, broă lơh bơh làng bol kòn cau Sơdàng dê dong gĭt nđờ rơbô hìu bơnhă làng bol tàm do ờ mìng lik klàs rƀah kơ̆ kơl jăp jŏ jòng lơm mờ gam pin dờn brồ guh lơh pas.

 Bơh ngai 1/7/2025, 102 sàh, sơnah ƀòn, ƀòn drà dềt bơh càr Kon Tum yau lơh jat broă tơmŭt bal gam 40 sàh, sơnah ƀòn mờ tơmŭt bal tàm càr Quảng Ngãi pa. Ală sàh pa tiah đah mat tơngai mŭt tiah brê bơnơm dờng ơning ơnàng bơh càr Quảng Ngãi dê neh bơyai lơh geh cồng nha Pơrjum dờng cau ala mat Đảng ƀộ sàh dơ̆ 1 mờ sền gĭt loh ală broă lơh tờm tàm tơngai lơh broă 2025-2030 nàng lơh geh bơta tam gơl pràn tàm tơngai bơtàu tơnguh pa.