Lồi nhai 8 lài do, broă lơh Ùr Ƀí thư livestream tăc plai sầu riêng bal mờ làng bol neh geh bơyai lơh tơn tàm suơn sầu riêng mờ broă lơh tờm tàm sàh Ea Knuếc, càr Dăk Lăk dê. Bơh àng drim gờñ, ală plai sầu riêng dum geh rơndăp niam tàm sơ̆ kòn cau Rơđê dê, geh ơn tềng gah kơ ƀàng livestream mờ geh dă mờ ồi yau. Tàm kơ ƀàng geh ơn dùl nơm điện thoại crăp mờ camera, tiah mờ mò H’ Jih Kbuôr (mò H’ Trúc) dơ̆ sơnrờp gơs “cau tăc phan tàm internet” ƀòn lơgar dê. Nggui tềng đăp rùp điện thoại, mò H’ Jih bal mờ ùr đơng lam bồ sàh yal bè jơnau tam tờm sầu riêng bal mờ yal ală cau in git bè bơta phan geh lơh bơh broă lơh sa suơn sre do bơh hìu nhă lơh geh. Mò H’ Jih Kbuôr pà git: “Añ tus tàm do mờ ùr Ƀí thư sàh nàng yal jơnau bè kàl tơnhào bơh plai sầu riêng dê. Làng bol ƀòn lơgar kơ̆p kờñ là plai sầu riêng geh gơguh priă tăc nàng rài kis làng bol ngai sơlơ pas gơs rơlaoi mờ bơtàu tơnguh uă rơlao”.

Mìng tàm dùl ƀùi pờ tơlik tơn tàm internet, 60 tấn plai sầu riêng neh geh tăc jơh. Ală cau blơi geh pơn jăt tai blơi, bal mờ jơnau “pơyoa nting” bơh cau blơi tàm internet dê lơh làng bol chờ hờp ngan. Mờ măt kă bro “Sầu iêng Mè kâo”, dà kòn cau Rơđê đơs là “Plai sầu riêng mè añ”, ƀòn lơgar ờ mìng tăc geh phan, mờ gam yal jơnau bè broă lơh, bal mờ broă ai tơngŏ mờ jơnau hơ bè bơta bơkah plai sầu riêng dê. Bơh tŭ do, dùl gùng dà broă lơh pa bè broă tơnguh măt kă bro bơh phan geh lơh bơh broă lơh sa suơn sre dê tàm măi mok pa; gùng dà broă lơh kờñ tìp mờ cau blơi phan pa ngan gam rơhời geh lơh. Ồng Nguyễn Công Điềm, kòn cau Nùng, cau tờm broă lơh sầu riêng geh rơwah lơh tơrlòng lài tàm dơ̆ tăc plai sầu riêng, sền gŏ geh bơta kwơ loh làng ngan bơh broă kă bro phan tàm internet dê, kung kờñ lơh geh dùl gah tăc phan krơi is. “Să tờm añ kung kờñ tơnơ̆ do lơh bè lơi geh dùl gah krơi is nàng tơrbŏ bal đah cau lơh mờ cau ngui in, añ iang nùs ngan là ờ di tus mờ cau lòt blơi, cau tăc”.

Broă livestream do là broă lơh lam lài ngan nàng lơh jăt mùl màl Rơndăp broă lơh Tơl sàh, sơnah ƀòn dùl KOL (Key Opinion Leader – Cau geh gơrềng tờm), ai phan geh lơh, bơta niam càr Dăk Lăk mŭt tàm măi mok bơh sàh Ea Knuếc dê. Rùp rài bơh dùl Ƀí thư sàh gơs “KOL broă lơh sa suơn sre” neh lơh geh bơta chờ uă ngan tus mờ làng bol. Do kung là broă lơh pa bè “ơdŭ bơsram sồ” nàng làng bol lơh broă sa suơn sre in, tàm hơ̆ uă ngan là làng bol jơi bơtiàn ờ gal cau, khin rơlao tàm broă kă bro phan tàm internet.

Mò Ngô Thị Minh Trinh, Ƀí thư Đảng ủy sàh Ea Knuếc đơs nền: Tus bal tơn mờ làng bol livestream tăc plai sầu riêng, ờ mìng là broă dong kờl tăc kàl lơh sa, mờ gam là jơnau yal pràn kơl dang: kwang đơng lam bồ lòt lài, lam lài, jà bal ală cau tus bal tàm broă ngui măi mok sồ: “Añ kờñ là ală làng bol lơh broă sa suơn sre tus bal tàm dơ̆ tam gơl sồ do, bơh ală làng bol sồ, gơtùi là broă livesstream tăc phan tàm hìu, yal bal ală bơta niam ƀòn lơgar he dê tus mờ ală cau in, tus mờ cau năc nàng git tus mờ cau tus mờ he uă rơlao. Bal mờ làng bol lơh broă sa, ai ală phan geh lơh bơh broă lơh sa suơn sre he dê tăc tàm drà kă bro mờ kung tam gơl rơhời mờ bơta mờng, tus bal nàng bơsram sồ”.

Mờ broă tus bal bơh ală mpồl lơh broă, bơh kwang bàng, kwang đơng lam bồ tus mờ làng bol, broă lơh “ƀòn lơgar sồ” gơs loh làng mờ kơl jăp. Ờ mìng tàm sàh Ea Knuếc, uă tiah tàm càr Dăk Lăk gam tus bal lơh jăt broă lơh do. Bơh ală broă lơh bè kŭp rùp phan geh lơh, lơh geh video, hơ jơnau lùp, dăp klơm mờ jào phan tus mờ broă pờ camera, livestream mờ dờp cau blơi phan, gơs broă lơh mùl màl nàng tơl broă lơh ai măi mok mŭt tàm rài kis lơh sa suơn sre tàm ală ƀòn dê.

Ồng Bùi Thanh Toàn, Kwang lam bồ Sờh Bơta chài mờ Măi mok càr Dăk Lăk pà git, bơta pal geh tàm broă tam gơl sồ là phan bơna. Den tàng, broă bơsong “tiah ờ geh điện thoại” geh càr sền gròi nàng lơh mờ jơnau kờñ 100% làng bol gơtùi tìp mờ internet, tus bal kă bro phan tàm điện tử tàm lồi nam do. “Sờh bơta chài măi mok neh pơgồp bal mờ ală anih lơh broă gơrềng bal dan mờ Anih duh broă Làng bol càr nàng sồr ală mpồl lơh sa kă bro viễn thông, măi mok yal tơngit tus bal lơh, lơh ngan tus jơh nam 2025 den tàm càr rơ̆p ờ gam “tiah ờ geh điện thoại” tai. Tŭ geh tơl phan bơna, tơl internet den làng bol hơ̆ sồng geh tơl bơta nàng tìp mờ ală bơta ngăc ngar tam gơl sồ”.

Bơh tàm phan bơna sồ, càr Dăk Lăk gam ngui jơnau kờñ lơh sa sồ ai tơl sàh, sơnah ƀòn in. Bal mờ broă bơtàu tơnguh bơta chài, măi mok, tam gơl pa bơceh lơh mờ tam gơl sồ tàm lơh sa suơn sre, kă bro phan mờ lòt nhơl, càr gam lơh geh dùl muh măt ƀòn lơgar pa tus tơl ƀòn. Tŭ làng bol lơh broă sa suơn sre git ngui măi mok, den ƀòn lơgar pa geh tus tơl ƀòn, ờ mìng là gùng dă mờ bê tông ha là hìu geh lơh dờng niam, mờ gam là tiah kis ngăc ngar, tơrbŏ bal mờ geh uă bơta niam chài. Tàm bơta niam hơ̆, tơl nơm điện thoại ngăc ngar gơs “Phan lơh broă” làng bol dê dê.