Anih duh broă Làng bol sàh Hoà Phú, càr Dăk Lăk neh bơyai lơh pờ ơdŭ bơsram ai rơlao 140 nă cau bơsram là kwang bàng lơh broă sră pơ-àr mờ ala măt mpồl lơh sa kă bro tàm càr dê. Cau bơto là ală cau chài đah măi mok, cau bơsram ờ mìng geh yal bè măi mok AI mờ gam geh bơto sồr ngui AI tàm broă bơsong broă lơh mùl màl. Ồng Nguyễn Trung Hoà, cau bơto tàm Hìu bơsram Cao đẳng Công thương Miền Trung tus bal bơto pà git: “Bơta krơi is bơh ơdŭ bơsram do pơn drờm mờ uă dơ̆ lài là cau bơsram gơtùi ngui mơ tơnơ̆ mờ tŭ bơsram. Bol añ ờ lơh jăt broă bơto neh geh lài, mờ dong kờl cau bơsram wă tàm broă ngui di mờ AI dê nàng geh cồng nha di bè jơnau kơ̆p kờñ. Tơl nă kwang bàng, tơl mpồl lơh sa kă bro gơtùi bơ̆t bơtàu să tờm in geh dùl nă “cau dong broă AI” lơh gơs să tờm is, dong kờl bơsong broă krơi is mờ geh cồng nha”.

Jăt Kwang đơng lam bồ sàh Hoà Phú yal, ală ngai sơnrờp lơh broă jăt broă lơh gơnoar atbồ ƀòn lơgar bàr kấp, sàh tìp uă kal ke tàm broă bơsong sră nggal làng bol mờ mpồl lơh sa kă bro in. bơnah uă tài ờ tơl kwang bàng lơh broă tờm. Kwang bàng là cau lài do mơya broă pa, tơl anih lơh broă mìng geh 2, 3 nă cau mơya pal dờp kơnòl broă bơh uă gah broă tơnơ̆ mờ tŭ tam pà kấp. Bơh tàm jơnau pal geh do, kwang đơng lam bồ sàh Hoà Phú git kờñ ờ gal cau mờ lơh gơtùi uă broă den pal git ngui măi mok sồ. Tàm hơ̆, ngui bơta ngăc ngar kòn bơnus lơh gơs AI là dùl gùng dà broă lơh geh kwơ màng ngan. Sàh neh jà ală cau jăk tus nàng bơto tam gơl sồ mờ AI, mờ nùs nhơm “Jơh bơsram là pal git lơh mơ”. Ồng Đỗ Xuân Hiếu, Phó Củ tịc Anih duh broă Làng bol sàh Hoà Phú, càr Dăk Lăk pà git: “Tơnơ̆ mờ tŭ bơsram, bol añ kờñ tơl nă kwang bàng, kông cứk pal geh dùl nă “cau dong broă AI” is nàng drơng broă lơh. Lài do, dùl broă rơndăp lơh kờñ geh dùl ngai sền sơwì, mơya AI mìng roh 30 giây. Broă tam tai là bồ tơngoh, gam broă lơh neh geh “cau dong broă” dong kờl”.

Ờ mìng tàm sàh Hoà Phú, tàm sơnah ƀòn Tân An, càr Dăk Lăk broă ngui măi mok AI tàm broă bơsong sră pơ-àr gơnoar atbồ dà lơgar kung pà gŏ lài ngan geh cồng nha. Lŏ Văn Thị Anh Đài, cau lơh broă gah sră pơ-àr gơnoar atbồ lơgar tàm sơnah ƀòn Tân An pà git: “Ngui măi mok AI neh lơh geh bơta ƀuơn loh làng ngan ai jơh kwang bàng lơh broă bal mờ làng bol in. Gơwèt mờ kwang bàng, bol añ ƀuơn sền gơnoar broă, git sră nggal lơi gơwèt gơnoar bơsong kấp sàh dê. Gơwèt mờ làng bol, AI kung dong kờl jòi sền mờ git sră nggal lơi gơtùi lơh tơn tàm sơnah ƀòn, bơh tŭ hơ̆ tềm pềr tơngai mờ ƀuơn rơlao tàm broă lơh sră nggal”.

Mùl màl pà gŏ, broă ngui măi mok AI mờ bơta git wă sồ ờ mìng dong kờl tơrmù bơta kal ke ai mpồl kwang bàng kông cứk tàm sàh in, mờ gam lơh geh cồng nha, ƀuơn ai làng bol mờ mpồl lơh sa kă bro in tŭ lơh sră nggal. Mò Phạm Thị Hồng Hải, dùl nă làng bol kis tàm sơnah ƀòn Tân An, càr Dăk Lăk đơs: “Ngai do hìu nhă añ tus lơh sră ù tiah mờ kĭ sră pơ-àr să tờm. Lài ngan kung ờ git sơl, mơya geh kwang bàng bơto sồr nền nòn den tàng sră nggal geh lơh gơs mhar ngan. Tơnơ̆ mờ tŭ jào sră, añ dờp geh pang sră pơrgon tàm điện thoại mờ ngai tơwơr cồng nha mùl màl, ƀuơn ngan”.

Nàng broă ngui măi mok pa mŭt tàm broă lơh mùl màl, broă lơh bal bơh ală mpồl lơh sa kă bro viễn thông – măi mok pa là kwơ màng ngan. Tơngai do, ală mpồl lơh sa kă bro viễn thông neh tus bal pràn ngan nàng bal mờ gơnoar atbồ ală sàh lơh jăt kơnòl broă do. Pơnrơ ngan là Viettel Dăk Lăk neh pơgồp bal mờ gơnoar atbồ sàh lơh geh uă gùng dà broă lơh jăt măi mok pa jơh, drơng geh cồng nha ai broă lơh gơnoar atbồ ƀòn lơgar bàr kấp in. Ồng Nguyễn Thanh Bình, Phó Kwang lam bồ Viettel Dăk Lăk pà git: “Bol añ neh ai gùng dà broă lơh dong kờl ai kwang bàng, kông cứk, viên cứk in, tơrgùm tàm rơlao 2 rơbô kơnòl broă gơrềng bal tus 23 jơnau lơh nền bơh Cíñ phủ dê bè broă tam pà kấp, tam pà gơnoar. Cau dong broă do geh dong kờl kwang bàng lơh jăt kơnòl broă di mờ jơnau geh ai tàm adăt boh lam, mờ tơnguh uă cồng nha broă lơh”.

Mờ nùs nhơm “Jơh bơsram pal geh lơh mơ”, ală cau bơsram măi mok pa bè tàm sàh Hoà Phú ha là tàm sơnah ƀòn Tân An càr Dăk Lăk dê gam pờ geh gùng dà broă lơh pa, dong kờl kwang bàng kấp sàh ờ mìng tơnguh jơnau git wă măi mok pa, mờ gam tam gơl bồ tơngoh lơh broă, rơcang ngui măi mok nàng drơng broă làng bol in niam rơlao tàm tơngai pa. Do kung là broă lơh mùl màl jơh nàng ală ƀòn lơgar tàm càr Dăk Lăk dê lơh geh cồng nha Jơnau lơh nền tàm pơrjum sồ 57 bơh Ƀộ Cíñ trị dê bè bơta chài – măi mok pa mờ tam gơl pa bơceh lơh dê.