Mpồng nhàr lơgar ală lơgar Lệ Thanh gơ ơm tàm Gùng dà lơgar 19 tàm tơrbŏ bal mờ Anih ơhò ơm Quy Nhơn (235 kơi sồ) mờ ală càr Tây Nguyên, ƀuơn ngan ai broă jun pơndiang phan bơna in. Tiah lơh sa rềp mờ càr Ratanakiri, lơgar Campuchia. Mpồng nhàr lơgar ơm tàm tiah pe mum bơtàu tơnguh Việt Nam – Lào – Campuchia, geh bơta pràn gơtùi gơ gơs anih tờm kă bro phan gan tiah nhàr lơgar. Kờp tus jơh nhai 8 nam 2025, kờp jơh priă lơh geh bơh tac blơi phan mờ lơgar ndai gan Mpồng nhàr lơgar ală lơgar Lệ Thanh geh 155 tơlak dolar Mỹ. Tàm hơ̆, tac phan hờ lơgar ndai geh 63 tơlak dolar Mỹ mờ ală bơta phan tờm ngan bè lòs, phơng sih, kơnrồ gam kis; broă lơh ơm ing, uă ngan là prìt ris, gơguh 59% pơndrờm dùl tŭ bal mờ nam lài. Khà rơndeh rơndồ mờ nac lòt rê kung gơguh uă ngan sơl. Bulah bè hơ̆, jat ală mpồl lơh sa kă bro yal, broă lơh kă bro phan gan mpồng nhàr lơgar kung gam gơkòl tàm 3 bơta kal ke, geh: broă lơh sră lòt gan mpồng nhàr lơgar, tơm wơl priă dia gơguh tai gam kal ke; priă tă ờ ngan ngồn mờ dia uă lơh gơbàn kơn jơ̆ dờng ngan, ngan là gơ wèt mờ phan lơh gơs bơh suơn sre.

Bè phan bơna, 5 anih prap ơn phan tŭ do ndrờm gơ ơm bơdìh mpồng nhàr lơgar, lơh gơbàn kal ke ai logistics in, nhai uă den sùm gal ir. Tơngai lơh broă ờ ndrờm bal đah mpồng nhàr lơgar Lệ Thanh (8 jơ mang) mờ Oyadav (5 jơ 30 phuk mho) kung lơh aniai tus broă pơndiang phan bơna. Ồng Bùi Trần Nhân Trí – Phó Kwang lam bồ THILOGI (Kông ty Kơnòl nă să is jàu dờp jun pơndiang ală lơgar Trường Hải) geh jơnau dan: “Geh dùl sră pơ àr dềt lơm, mơya lơh gơbàn tus broă lơh bơh mpồl lơh sa kă bro dê gơtìp lơyài. Hơ̆ là sră pơ àr sền sơ wì kòp phan tam. Jat jơnau sồr, sră cơng tàng sền sơ wì kòp phan tam den đah Campuchia lơh tàm Phom Penh. Tàm lơgar den kờñ pal geh sră tờm. Mơya bơh đah Phnom Penh rê hờ Mpồng nhàr lơgar Lệ Thanh pal roh bơh 2 tus 3 ngai, tàm tŭ ngai lơi kung geh sră pơ àr lơm. Dan anih lơh broă sền sơ wì kòp phan ròng ring bal sră scan bơh điện tử lài nàng dong lơh sră mhar ngan rlau jơh ai mpồl lơh sa kă bro in. Tài bol hi tac hờ lơgar ndai prìt ris, dilah kờp 2, 3 ngai den lơyài ngan”.

Ồng Phạm Anh Tuấn – Phó Ƀí thư Tỉñ ủy, Củ tịc Anih duh broă Làng bol càr Gia Lai sồr: ală sờh, gah broă lơh mhar kờp sền, bơsong mơ tơn ală jơnau dan jal mhar bơh mpồl lơh sa kă bro dê, mờ kung lơh pràn tam gơl wơl sră pơ àr gơnoar atbồ, tam gơl pa nùs nhơm lơh broă jat gùng dà lòt bal, dong kờl. Bè jŏ jòng, càr rơp rơndap ù tiah wơl mpồng nhàr lơgar Lệ Thanh mờ lơh sir ală jơnau lơh nền bơtàu tơnguh Tiah lơh sa mpồng nhàr lơgar; mờ kung lơh broă mờ càr Ratanakiri, lơgar Campuchia tàm nhai 10 nam 2025 nàng tă bơsong bơta gơ kòl. Củ tịc Anih duh broă Làng bol càr Gia Lai kung hòi jà mpồl lơh sa kă bro crăp rơcang kơlôi sơnơng drà kă bro, rề ơnàng broă lơh pa, is ồn là bè lơh gơlik uă phan lơh gơs bơh suơn sre bơh tiah tam phan tàm lơgar mờ lơgar Campuchia nàng tac hờ lơgar ndai. Ồng Phạm Anh Tuấn hơ pơrgon, gơnoar atbồ càr rơp lòt bal, lơh gơlik tơl bơta ƀuơn, wèt tus jơnau kờñ ai priă lơh geh bơh tac blơi phan mờ lơgar ndai bơh Mpồng nhàr lơgar ală lơgar Lệ Thanh lơh geh bơh 2 tus 3 tơmàn dolar Mỹ tàm nam 2030: “Bè đah mpồl lơh sa kă bro añ sồr lơh broă mơ, lơh sră mơ tĕ. Cau lơi kờñ lơh logistics, cau lơi kờñ lơh gơlik phan bơh suơn sre, dan kờñ geh nđờ lồ, lơh ñchi, tiah tam phan tềng lơi. Nùs nhơm lơh là khòm tơrgùm jơh tiah tam phan tàm tiah do mờ ală càr bơh lơgar Campuchia dê, tơrgùm rê ndo, lơh gơlik uă, tơnơ̆ hơ̆ lòt jat gùng ù gờl jat gùng dà lơgar 1 rê hờ anih ơhò ơm dà jrô Phù Mỹ, anih ơhò ơm tàm dà lềng Quy Nhơn. Sồr jơh ală broă lơi pal geh bè dia, bè priă bơcri. Mpồl lơh sa kă bro rơp lòt bal mờ càr tàm broă rơndap ù tiah, bơt bơtàu wơl Tiah lơh sa Mpồng nhàr lơgar ală lơgar Lệ Thanh tàm tŭ tơngai tus”.

Pơrjum dờng Đảng ƀộ càr Gia Lai dơ̆ 1, tơngai lơh broă bơh nam 2025 tus nam 2030 rơp geh lơh bơh ngai 02/10 tus ngai 04/10, Đảng ƀộ mờ làng bol càr Gia Lai mờ bơta pơnđơl pràn lam Gia Lai gơ gơs là càr bơtàu tơnguh niam. Tơngai lơh broă bơh nam 2025 tus nam 2030 geh git nền là tŭ tơngai tam gơl pràn mờ jơnau kờñ gơguh lơh sa rlau 10% dùl nam. Ồng Hồ Quốc Dũng, Kwang geh jơng Đảng dà lơgar, Ƀí thư Tỉñ ủy càr Gia Lai đơs là, nàng lơh geh jơnau kờñ, broă jàu tàm tơngai lơh broă bơh nam 2025 tus nam 2030 lam Gia Lai gơ gơs dùl càr bơtàu tơnguh niam, càr git nền 5 broă tờm gơguh lơh sa, 4 broă tam gơl pràn, tàm hơ̆, geh bơta bơtàu tơnguh bè broă drơng ala logicstics anih ơhò ơm tàm dà lềng mờ ală gùng lòt mờ gùng rơndeh lòt mhar Quy Nhơn – Pleiku, Mpồng nhàr lơgar ală lơgar Lệ Thanh, Anih ơhò ơm ală lơgar Quy Nhơn: “Lài ngan là bơtàu tơnguh lơh sa mờ măi mok, is ồn là lơh mờ măi mok gơlik phan, mòn phan jat tàm bơta pràn, bơta ƀuơn càr dê. Dơ̆ 2 là bơtàu tơnguh broă drơng ala lòt nhơl, ngui bơta pràn, bơta ƀuơn bơh tiah kơh bơnơm, tiah dà lềng, geh bơta pràn kah yau, niam chài, ù tiah niam tiơng pơn rơ mờ brê bơnơm nàng lam Gia Lai gơ gơs dùl tiah tus gơ kờñ ngan bơh tiah do mờ gùt lơgar dê. Lam Gia Lai gơ gơs dùl anih tus gơ kờñ ngan tàm sră wac rùp lòt nhơl bơh gùt lơgar mờ tiah do dê. Dơ̆ 3 là bơtàu tơnguh broă drơng ala logistics anih ơhò ơm tàm dà lềng gơ jat bal mờ gùng lòt, gùng rơndeh lòt mhar Quy Nhơn – Pleiku, Mpồng nhàr lơgar ală lơgar Lệ Thanh, Anih ơhò ơm ală lơgar Quy Nhơn, gơ gơs mpồl lơh logistics jat gùng kềng tiah đah mat tơngai lik, tiah đah mat tơngai mut nàng lơh gơs dùl tàm ală gah tờm bơtàu tơnguh càr dê”.