Tŭ do, gùt lơgar geh rlau 86 rbô jơnum sền gàr lơngăp lơngai, rơndap tap sèng mờ rlau 276 rbô nă cau geh jơng. Tơnơ̆ 1 nam lơh jat Adat Mpồl tus bal sền gàr lơngăp lơngai, rơndap tap sèng tàm ƀòn lơgar, cồng nha pơn rơ ngan là bơta lơngăp lơngai tàm ƀòn lơgar sùm geh gàr kơ̆, cau tìs sùm geh tơrmù; uă tiah cih dờp bơta rềs àr gùng lòt gơmù loh làng ngan, ală broă lơh tìs tàm mpồl bơtiàn geh tơrmù; srơh jơh gùt làng bol sền gàr lơngap lơngai dà lơgar ngai sơlơ lơh geh cồng nha ngan ngồn, pơgồp bơnah bơt bơtàu, gàr kơ̆ mpồl sền gàr lơngap lơngai làng bol gơ jat bal mờ mpồl sền gàr dà lơgar jơh gùt làng bol ngai sơlơ kơnhăp kơ̆.

Jàu ală jơnau lơh nền jờng rơ ai ală cau geh pơn rơ jak tàm pơrjum in, Thủ tướng ồng Phạm Minh Chính nting bơr gờm chờ mờ đơs nền, ală tă pơgồp kuơmàng bơh mpồl tus bal sền gàr lơngăp lơngai, rơndap tap sèng tàm ƀòn lơgar dê là mpồl đềt mềr tơn mờ làng bol. Bulah bè hơ̆, Thủ tướng đơs loh, khà dong kờl sùm pah nhai ai mpồl do in tàm bàr pe tiah gam dồ êt; phan bơna, măi mok, phan dong kờl gam kal ke. Ồng sồr kơlôi sơnơng dan ai lơh jăt gùng dà broă lơh ai kes priă Dà lơgar nàng dong kờl ală ƀòn lơgar kal ke, tiah bơnơm, tiah sar lơgar ngài in tàm broă tă tơm priă dong kờl, blơi phan bơna ngui ai mpồl tus bal sền gàr lơngăp lơngai, rơndap tap sèng tàm ƀòn lơgar in. Ƀộ Kwang àng kờñ pal sùm sền gròi bơto bơtê, bơto pơlam tơnguh jơnau git wă adat boh lam, mờng chài lơh broă; pơn jat tai kờp sền, lơh mhar broă blơi phan bơna dong kờl ai mpồl do in nàng drơng jơnau sồr, kơnòl broă.