Drim òr (23/09), tàm Hà Nội geh bơyai lơh dơ̆ mùl màl Pơrjum dờng cau ala măt Đảng ƀộ Mặt trận Dà lơgar, ală mpồl lơh broă Dà lơgar dơ̆ I, tơngai lơh broă bơh nam 2025 tus 2030, mờ broă tus bal bơh 346 nă cau ala măt rơlao 5 rơbô nă đảng viên tàm Đảng ƀộ dê. Jơnau yal tàm Pơrjum dờng đơs loh: tơngai lơh broă pa do, gùt Đảng ƀộ neh tơnguh nùs nhơm tam klăc bal, rơcang lài, tam gơl pa, tơrgùm đơng lam tơl ală bơta broă lơh jăt kơnòl cíñ trị mờ broă bơ̆t bơtàu Đảng, geh uă cồng nha kwơ màng.

Pơnrơ ngan bè: Lơh pràn broă rài kis broă lơh broă sa mpồl bơtiàn mờ tơn jơh hìu sèt hìu ồm ñhăt dà mìu bơh broă lam lơh, lơh niam wơl rơlao 180 rơbô nơm hìu Tam klăc nàng pà hìu rơƀah in. Bơdìh hơ̆ tai, geh uă broă lơh jăt sền geh cồng nha neh geh lơh sùm mờ lơh geh uă bè: “Làng bol jăt sền kwang bàng, đảng viên”, “Mặt trận jăt sền bơcri priă mpồl bơtiàn”, “Jăt sền broă lơh jăt kơrnoăt lơh tờm tàm ƀòn lơgar”… Tus mờ geh jơnau đơs sồr lơh tàm Pơrjum dờng, Tổng Ƀí thư ồng Tô Lâm đơs nền pe nùs nhơm sồr lơh gơwèt mờ gùt Đảng ƀộ tàm Pơrjum dờng cau ala măt Đảng ƀộ Mặt trận Dà lơgar: hơ̆ là ai Làng bol lơh tờm, cau tờm, jơnau kờñ mờ bơta pràn bơh broă tam gơl pa dê. Ală jơnau lơh nền tàm pơrjum, broă lơh pal hơ: bơta kwơ mùl màl bè lơi ai làng bol in, ai tơl mpồl bơtiàn mùl màl. Rề ơnàng broă làng bol lơh tàm tàm ƀòn, lơh pràn broă cri bơyai mpồl bơtiàn, lơh broă bal mờ kơrnoăt pal jăt di pal, gơrềng dờng tus mờ rài kis, cèng geh bơta kwơ mùl màl ai làng bol in. Tổng Ƀí thư sồr pơn jăt tai drơng rài kis Làng bol mờ 6 bơta tờm rài kis kis broă lơh sa mờ jào kơnòl tờm cau tờm dê tus tơl mpồl lơh broă măt trận.