Tŭ do pah ngai, Tiah lòt nhơl Bàu Trắng U mờ ME, sàh Hoà Thắng, càr Lâm Đồng wă geh bơh 3 rơbô tus 4 rơbô nă cau năc tus nhơl sền, kŭp rùp mờ nhơl tàm tiah dòr ƀlàng bràs ơnàng 2 lồ. Ồng Nguyễn Văn Hùng, Kwang lam bồ đơng lam Tiah lòt nhơl pà git, bơh tŭ tơmŭt bal càr tus tŭ do, khà năc lòt nhơl gơguh di pơgăp 20% mờ rơ̆p ngai sơlơ gơguh uă tŭ tơrbŏ bal bơh tiah dà lềng tus mờ tiah rơbô bơkào Dà Làc: “Bơh tŭ tơmŭt bal càr tus tŭ do, geh broă pơgồp bal đah brê bơnơm, dà lềng mờ ù tiah hơ̆ là dùl mpồl dờng ơnàng ngan nàng he pơgồp bal ală broă lơh drơng ala tàm càr. Jơnau kờñ ngan là broă tơrbŏ bal gùng lòt nàng cau năc lòt nhơl ƀuơn ngan guh bơh tiah dà lềng tus tàm tiah rơbô bơkào mờ bơh tiah rơbô bơkào mù tàm dà lềng. Mùl màl ngan mờ kông ty neh wèt tus là broă tơrbŏ bal đah ală mpồl lơh broă lòt nhơl, tàm hơ̆ uă ngan là mpồl lơh broă lòt nhơl lơh geh ală broă lơh tơmù priă tŭ tus Dà Làc mù tus dà lềng”.

Gùt càr tŭ do geh rơlao 4 rơbô 200 hìu ơm, mờr 1 rơbô 400 hìu cau năc ơm bơh 1 tus 5 sơrmañ, tơl pràn nàng wă 48 tơlăk nă cau năc pah nam. Mìng is tàm nam 2025, càr ai geh jơnau kờñ hòi jà 23 tơlăk nă cau năc lòt nhơl. Jăt Tiến sìh ồng Phan Bảo Giang, Phó Kwang lam bồ mờ kung là Kwang lam bồ gah Marketing hìu bơsram Đại họk Kinh tế Tài cíñ ƀòn dờng Hồ Chí Minh yal, tàm tơngai bơh nam 2025 tus 2030, tŭ mpồl ală bơta geh, ală bơta niam krơi is ală tiah, mờ geh tơrbŏ bal mờ ală drà kă bro, lòt nhơl càr Lâm Đồng rơ̆p là tiah tờm lơh sa mùl màl: “He pal lơh geh dul pang sră rùp ai cau năc lòt nhơl in tus tơl gơl gùng, tiah lòt nhơl càr Lâm Đồng pa in. He gŏ là tơl tiah bơh càr Dăk Nông, Lâm Đồng, tus mờ càr Bình Thuận lài do den ndrờm geh ală style krơi is, den tàng tàm dùl broă lơh dờng ngan bè do, he geh broă ring nùs bal, dùl pràn bal den añ pơn dờn là ală kal ke kung geh sơrlèt”.

Jăt jơnau rơcang cih jơnau lơh nền tàm pơrjum nàng yal Pơrjum dờng Đảng ƀộ càr Lâm Đồng dơ̆ I, tơngai lơh broă bơh nam 2025 tus 2030, Lòt nhơl là dùl tàm pe bơta tờm lơh sa kwơ màng càr dê, bơdìh mờ lơh sa suơn sre ngui măi mok pa mờ lơh sa mờ măi mok-bơ̆t bơtàu pa. Tàm bơta tàm pơrlòng ngai sơlơ uă, càr Lâm Đồng sền kwơ broă bơ̆t bơtàu phan lòt nhơl krơi is, lơh pràn broă ngui măi mok sồ tàm broă yal mờ atbồ, mờ tơnguh broă lơh broă bal dà lơgar mờ cau dùl nă să nàng hòi jà bơcri priă, bơtàu tơnguh kơl jăp gah lơh sa mờ măi mok ờ geh ñhŭ. Ồng Nguyễn Văn Lộc, Kwang lam bồ Sờh Niam chài, Tàp pràn să jan mờ Lòt nhơl càr Lâm Đồng đơs là, bơta kwơ màng ngan là broă lơh bal bơh mpồl lơh sa kă bro dê.

Di lah lơh broă lòt nhơl mờ ờ geh mpồl lơh sa kă bro den di gơlan lơh ờ geh cồng nha: “Dùl bơta kwơ màng ngan hơ̆ là broă lơh broă bal bơh mpồl lơh sa kă bro. Di lah lơh broă lòt nhơl mờ ờ geh broă lơh broă bal bơh mpồl lơh sa kă bro là ờ geh cồng nha. Gah Niam chài, Tàp pràn să jan mờ Lòt nhơl bol añ hơ rơ̆p lơh broă bal mờ mpồl lơh sa kă bro nàng he lơh broă gơguh bal. Ală mpồl lơh sa kă bro dong kờl càr tàm broă lơh, ai geh rùp rài bơh dùl broă lòt nhơl càr Lâm Đồng pa in”.

Wèt tus jơnau kờñ bơtàu tơnguh lòt nhơl niam uă, càr Lâm Đồng gam tơrgùm bơcri priă, lơh geh ală tiah lòt nhơl geh bơta dờng khà dà lơgar mờ ală lơgar bè tơnao dà Tuyền Lâm, Mũi Né, Tà Đùng, pơgồp bal mờ ală phan lòt nhơl krơi is: lòt nhơl tiah niam, ơm rơlô să, tàp pràn să jan khin bơrnañ, lòt nhơl tam phan, gùng đơs crih, sền gàr bơta pràn kơl dang să jan mờ lơh bơta niam chài ƀòn lơgar dê. Ồng Hồ Văn Mười, Củ tịc Anih duh broă Làng bol càr Lâm Đồng pà git, nàng càr Lâm Đồng gơs tiah tờm lòt nhơl geh bơta niam uă, bơta kwơ màng là pal lơh geh bơta geh dờng màng bơh jơh pe tiah dê: “rơbô bơkào, brê bơnơm dờng mờ dà lềng tơlir”: “Bơta pràn he dê là uă ngan, rề ơnàng nùs nhơm kơlôi sơnơng, Broă kờñ lơh kwơ màng, pràn, bơceh lơh. Tiah brê bơnơm dờng, tiah dà lềng tơlir mờ rơbô bơkào bè jơgàng pe jơng hơ̆, kơl jăp ngan mơya pe jơng jơgàng do ờ hềt ndrờm bal. Nàng khà cau năc geh mờ sơrlèt mờ jơnau kờñ he dê là gàr niam lơngăp lơngai. Gàr niam bè gùng lòt rê, hơ̆ sồng gàr niam bè bơta pràn kơl dang să jan cau năc in. Tơl nă làng bol là dùl nă cau pơlam jơnau lòt nhơl. Ală tiah lòt nhơl sùm geh săp ñŏ, sùm geh jơnau kờñ gơboh cau năc gơs bơta niam chài”.

Mờ bồ tơngoh kơlôi sơnơng jŏ jòng, broă lơh ngan bơh gơnoar atbồ, broă lơh broă bal bơh mpồl lơh sa kă bro mờ làng bol, càr Lâm Đồng gam rơhời lơh geh mùl màl jơnau kơ̆p kờñ gơs tiah tờm lòt nhơl geh bơta niam uă, lơh gơnoar tờm tàm bơta gơguh lơh sa mpồl bơtiàn ai jơh tiah Tây Nguyên mờ dà lơgar in. Lòt nhơl càr Lâm Đồng bơh bơta geh tus mờ broă lơh geh mùl màl jơnau kờñ bơtàu tơnguh gam tàm ală broă gơguh pa bơh dùl gùng dà broă lơh pa dê.