Dơ̆ lòt còp geh gơtha kah yau, là broă lơh tàm pơgơl mpồl kwang bàng kấp dờng sơnrờp đah 2 lơgar dê kờp bơh tŭ lơh geh bơta gĭt gơ̆p cribơyai broă mờ lơgar ndai tòm 45 nam lài (1980-2025). Mho ngai 12/11, tơnơ̆ dơ̆ wă rò ngan ngồn, Củ tịc lơgar ồng Lương Cường neh cribơyai mờ Bơtau lơgar Jordan. Tàm nùs nhơm sơrmah sơrmài, jơh nùs, pin dờn mờ gĭt wă bal mờ gơ̆p, 2 nă kwang đơng lam bồ ring bal ai bơta gĭt gơ̆p đah 2 gah mut tàm tơngai pa. Bàr gah pal bơt bơtàu nùs nhơm pin dờn cíñ trị bơh ală broă lơh tàm pơgơl mpồl kwang bàng, is ồn là ală mpồl kwang bàng kấp dờng. Mơkung sơlơ tơnguh tai lơh broă bal tàm ală gah kwơ màng ndai, tàm hơ̆ geh sền gàr dà lơgar, lơngăp lơngai, tam pà bal jơnau yal, cribơyai kwang bàng gĭt wă jrô broă lơh...

Tàm gah lơh sa, 2 nă kwang đơng lam bồ ring bal lơh geh ală bơta ƀuơn ngan ai broă pờ mpồng drà kă bro ai ală bơta phan geh bơta ƀuơn bơta pràn bal mờ gơ̆p dê, mơkung pơn jờng mpồl lơh sa kă bro 2 lơgar kơlôi sơnơng bơta pràn lơh broă bal, bơcri priă is ồn tàm ală gah bơtàu tơnguh phan bơna bơt bơtàu, lơh sa tơlir, lơh sa sồ, viễn thông, lơh gơlik, lơh gơlik phan lơh geh bơh broă lơh sa suơn sre... Bơtau lơgar Jordan sồr 2 lơgar kơlôi sơnơng gờñ pờ gùng par song tơn. Bàr nă kwang đơng lam bồ kung cribơyai ală broă lơh nàng kờñ sơlơ tơnguh tai lơh broă bal bè lơh sơnơm, là bơta pràn bơh lơgar Jordan dê, is ồn tàm ală gah broă kham sơm kòp bơh ngài, ngui măi mok tàm gah lơh sơnơm...