Dùl ƀùi drim tàm thôn 1, sàh Krông Ana. Hơ đơm rơkàng hìu tam bơsềt ơnàng mìng 2, 3 jơt thơk, bi Dương Huỳnh Linh gam bal mờ pơ ùr sơrkul rơhe, jơm phan rơcang ai dơ̆ tam bơsềt pa in. Ƀô thồm bơsềt bơrlŭ bal tàm bơta suh iò, gơ par jơh gùt hìu tam bơsềt. Bi Linh neh đềt mềr mờ broă tam bơsềt neh 14 nam, bơh 2, 3 hìu tam dềt bơh chờm, tŭ do broă lơh bi dê ờ mìng cèng wơl priă jền lơh geh sùm mờ gam ai geh broă lơh sùm git nđờ jơt nă cau lơh broă tàm ƀòn lơgar in. Jơnau sơn đờm mut lơh broă bi dê neh mblàng wơl bơta gơ kờñ ai uă hìu bơnhă làng bol in khin tam gơl – rơ wah broă lơh sa suơn sre sàng goh, ờ huan gơtìp aniai mơya cồng nha lơh geh den uă:“Jơh hìu bơnhă đah pơ ùr, đah añ, jơi nòi ndrờm bơtàu tơnguh bơh bơsềt lơm. Rài yau hìu bơnhă añ rƀah ngan mơya bơh tam bơsềt den tŭ do kung neh tơl sa tơl ngui đau”.

Kung tàm ù tiah hơ̆ sơl, cau kơnòm să gam pơn jat tai lơh jat broă lơh is he dê mờ ngui măi mok pa ngan. Gơ wèt mờ bi Huỳnh Đức Cường, 30 sơnam neh geh tŭ bơsram tàm Đại họk bơta chài măi mok tàm ƀòn dờng Hồ Chí Minh, broă tam bơsềt ờ mìng là broă lơh gơlik priă jền drơng rài kis in mờ gam là dùl broă lơh sa suơn sre tàm pơdar ngac ngar, ờ mìng đềt mềr mờ tiah ơm kis mờ gam tơnguh priă jền lơh geh phan bơh suơn sre tàm ƀòn lơgar dê tai:“Broă do ai geh broă lơh làng bol tàm sàh in, dơ̆ 2 tai là lơh gơlik priă jền sùm. Pơn yơu bè hìu bơnhă añ dê, 10 hìu tam bơsềt den dùl nhai tŭ kờp jơh priă tă lơh kung geh priă jền bơh 20 tus 30 tơlak đong, gơ gam gơ wèt tàm giă bơsềt tai. Añ gŏ do là dùl broă gơtùi gơn kơnờm tàm tơnơ̆ do, hơ̆ là dùl dar bơh rơhe tŭ he tơ wès jơh kòi tàm sre den he cèng rê tam bơsềt, jơh bè hơ̆ den he cèng wơl ơn tờm kơphe, tiêu, sầu riêng in, gơ niam ngan, dong tờm chi gơs ngan”.

Jat tơrgùm kờp bơh sàh dê, bơh 2, 3 hìu bơnhă tam tơrlòng, tus tŭ do, jơh gùt sàh Krông Ana neh geh rlau 1 rbô hìu tam bơsềt lơh broă gùt nam, ai geh broă lơh rlau 2 rbô nă cau lơh broă in. Ờ mìng dong làng bol lơh geh priă jền sùm, broă tam bơsềt gam dong tơrmù ƀà bơta chu rơhe, sền gàr tiah ơm kis mờ ngui uă ngan rlau jơh phan sa bơh broă lơh sa suơn sre. Ồng Huỳnh Đức Phúc, lài do là Củ tịc Mpồl cau lơh broă sa sàh pà git:“Bơta ƀuơn tàm do là tiah tam uă kòi bơh sàh Krông Ana dê, kơnờm geh tiah tam uă kòi do den làng bol lơh broă sa hơ̆ sồng geh rơhe nàng bơsram broă tam bơsềt nàng bơtàu tơnguh lơh sa. Kờp bal tơl hìu bơnhă geh bơh 2 hìu tam bơsềt, geh hìu geh tus 10 halà 20 hìu tam bơsềt. Làng bol lơh broă sa pin dờn ngan tàm broă tam bơsềt do. Lài ngan do là broă lơh sa suơn sre sàng goh, anih blơi phan lơh gơs geh sùm làng bol in sơl”.

Bơh ală căp rơhe tơnơ̆ tơ wès kòi, làng bol sàh Krông Ana, càr Dăk Lăk neh lơh gơs dùl gùng dà broă lơh kơ̆ kơljap sùm, lơh phan sang tàm broă lơh sa suơn sre gơ gơs broă lơh sa, lơh broă lơh sa suơn sre ờs mờng gơ gơs broă lơh sa tơlir.