Jơnau rơcang cih Jơnau yal cíñ trị ai geh ală broă jàu lơh sa kwơ màng càr Dăk Lăk dê tàm tơngai bơh nam 2025 tus 2030. Mùl màl là pràn gơguh lơh sa geh bơh 11,5% pah nam rơlao hơđang; priă lơh geh kờp bal tơl nă cau nam 2030 geh 160 tơlăk đong; broă lơh sa suơn sre gơguh 6,84% tàm 1 nam; lơh sa mờ măy mok-bơ̆t bơtàu gơguh 18,1%; broă lơh drơng ala gơguh 11,25%.

Tă pơgồp jơnau đơs tàm pơrjum, ồng Đào Tấn Lộc, lài do Ƀí thư Tỉñ ủy càr Phú Yên đơs là, geh ờ uă broă jàu gam uă rơlao pơndrờm mờ mùl màl, tàm hơ̆ uă ngan là tàm bơta tŭ do: “Gơguh broă lơh sa suơn sre 6,84% jăt añ bè hơ̆ là uă ngan, tài lài do ờ hoan geh bè hơ̆, rơlao mờ hơ̆ tai, lơh broă sa suơn sre gơrềng tàm trồ tiah mờ drà kă bro, he tŭ do ờ hềt bơsong geh 2 bơta do den tàng pal kơlôi sơnơng. Hơ̆ sồng gơguh lơh sa mờ măi mok bơ̆t bơtàu là 18,1% kung là khà uă ngan sơl. Di lah lơh ngan bơ̆t bơtàu rơ̆p sơrlèt, mơya lơh sa mờ măi mok gơrềng uă ngan tàm broă kờp jơh priă bơcri mpồl bơtiàn”.

Đơs niam broă lơh rơcang bơh Mpồl dềt lơh sră nggal, ồng Cao Đức Khiêm, lài do Phó Ƀí thư Duh broă sùm Tỉñ ủy càr Dăk Lăk đơs, ring bal mờ 17 broă jàu, 5 mpồl kơnòl  broă gùng dà broă lơh mờ 3 broă tam gơl pràn geh ai. Mơya, ồng đơs sùm tai jơnau sồr bè jŏ jòng bơtàu tơnguh cau lơh broă geh broă lơh jak uă: “Añ gŏ ală kwang bàng mìng rơ̆p pa sền kwơ uă tàm kwang bàng atbồ mờ ờ hềt ai geh broă tàm mpồl cau lơh broă là kỹ sư, cau lơh phan măy mŏk geh broă lơh jak nàng gĭt geh priă FDI. Dơ̆ bàr tai là rơndăp phan bơna, gơlơh bè kung gam dềt, pal bơtơl wơl rơndăp ù tiah càr Dăk Lăk tàm ală tiah lơh sa mờ măi mok, lơh sa mờ măi mok geh bơta pờ uă, gơcèng bơta jơh ală lơh gơs gơlòt sùm”.

Pơrjum dờp geh 11 jơnau đơs, tàm hơ̆ geh 5 sră cih tă jơnau đơs mờ 6 jơnau đơs tơn tàm pơrjum. Iăt jơnau đơs tàm pơrjum, ồng Nguyễn Đình Trung, Ƀí thư Tỉñ ủy, Kwang lam bồ Mpồl dềt lơh Sră nggal Pơrjum dờng Đảng ƀộ càr Dăk lăk dơ̆ XVIII pà git, Mpồl dềt lơh sră nggal rơ̆p iăt kơlôi sơnơng nền nòn ală jơnau đơs pơgồp bal: “Bol añ rơ̆p iăt uă ngan mờ lơh jăt tàm ală broă lơh mùl màl tŭ lơh jăt Jơnau lơh nền tàm Pơrjum dờng dê, ha là drơng broă ai broă đơng lam, lam lơh bơh kấp ủy, bơh Mpồl duh broă Làng bol, Anih duh broă Làng bol nàng lơh ală kơnòl broă càr Dăk Lăk in niam rơlao. Tơnơ̆ pơrjum do càr kung kờñ pơn jăt tai dờp geh jơnau pơgồp bal bơh ală kwang bàng mờ bol añ kơ̆p kờñ ngan nàng iăt”.