Sàh Ea Bá tơnơ̆ mờ tŭ tơmŭt bal ơnàng ù tiah rơlao 130 kơi sồ vuông, khà kờp làng bol rơlao 8 rơbô 300 nă, tàm hơ̆ geh di pơgăp 60% là kòn cau Rơđê. Tiah tờm lơh broă sră pơ-àr gơnoar atbồ sàh ngài mờ tiah tờm càr Dăk Lăk di pơgăp 130 kơi sồ. Ồng Nguyễn Hoài Vũ, Ƀí thư Đảng ủy sàh yal: bơh ngai 01 nhai 7 tus tŭ do, bŭ lah phan bơna sồ neh geh ngui lơh bơh bàr mpồl lơh broă sră pơ-àr gơnoar atbồ sàh lài do, mơya kung gam lơh geh 80% sră nggal tàm internet dong kờl làng bol mờ rơlao 90% ală dơ̆ pơrjum pờ tơlik tàm internet mờ Tỉñ ủy, Anih duh broă Làng bol càr, ală sờh, gah lơh broă tàm càr dê. Do là lơh ngan uă bơh gùt mpồl kwang bàng, cau lơh broă tàm Đảng ủy mờ Anih duh broă Làng bol sàh dê.

Ồng Nguyễn Hoài Vũ đơs tus mờ bơta mùl màl bal mờ ờ uă jơnau dan bè tam gơl sồ tàm sàh bè do: “Tài sàh là tiah ngài, tiah kal ke, phan bơna sồ gam uă bơta ờ pràn, măi mok phan lơh broă bơh bàr mpồl lơh broă sră pơ-àr gơnoar atbồ sàh lài do pơgồp bal ờ hềt ndrờm; bơta pràn, bơta chài ngui măi mok bơh ală oh mi kông cứk, viên cứk kung gam ờ pràn. Bol añ kơ̆p kờñ càr gờñ sền gròi bơcri priă lơh niam wơl, lơh tơl phan bơna sồ, pờ geh ală ơdŭ bơsram bè jơnau git wă ai kông cứk in bè măi mok sồ, măi mok yal tơngit, broă ngui AI nàng di pal mờ jơnau kờñ bơh kơnòl lơh broă tàm bơta pa”.

Kung ndrờm bè hơ̆ sơl, sàh Ea Hiao kung là sàh tiah ngài càr Dăk Lăk dê tŭ ngài mờ tiah tòm lơh broă sră pơ-àr gơnoar atbồ càr dê rơlao 100 kơi sồ. Ồng Phạm Văn Đảng, Củ tịc Anih duh broă Làng bol sàh pà git: tàm tiah tờm lơh broă sră pơ-àr gơnoar atbồ sàh dê, rơlao 65% sră pơ-àr gơnoar atbồ mờ rơlao 90% dơ̆ pơrjum bơh sàh bal mờ kấp hờ đang geh lơh tàm internet. Mơya, tài phan bơna sồ ờ hềt ndrờm bal, uă sră nggal kung gam gơtìp kòl, ală dơ̆ pơrjùm ƀuơn gơtìp koh gơl, ồng dan mờ càr gờñ bơcri priă lơh ndrờm bal. Ồng Phạm Văn Đảng pà git: “Bơh ală dơ̆ pơrjum pờ tơlik tàm internet bơh sà mờ Tỉñ ủy, Anih duh broă Làng bol càr, ală sờh, gah lơh broă tàm càr den uă tŭ broă tơrbŏ bal ờ pràn. Bol añ tàm sàh kơ̆p kờñ gùng internet pal geh tơrbŏ bal sùm, ờ gơtùi koh gơl. Uă tŭ gam pơrjum, kwang đơng lam bồ sồr gơtìp gŏ gời rùp mờ ờ kơno jơnau đơs mờ sơlơ̆u wơl, bol añ pal hòi điện thoại wơl nàng lùp tai. Roh uă ngan tŭ jơ, bơta pràn. Kơ̆p kờñ càr bơcri priă lơh gùng internet pràn niam, nàng pơrjum kung ƀuơn lơh, lơh sră pơ-àr kung mhar”.

Trung tá ồng Phạm Việt Hùng, Kwang lam bồ Viettel Dăk Lăk pà git, mpồl lơh broă do gam pơgồp bal mờ Anih duh broă Làng bol càr lơh uă gah broă tam gơl sồ. Gơwèt mờ phan bơna sồ drơng tàm broă bơsong sră pơ-àr gơnoar atbồ tàm kấp sàh, neh lơh geh niam, mơya tàm ù tiah ơnàng, uă tiah là tiah thòng den tàng gùng internet gam ờ pràn, pal tă tai priă nàng lơh ală anih PTS (Anih pờ tơlik internet yal tơngit ntrờn) nàng kơl jăt tàm broă tơrbŏ bal. “Tàm broă tơmŭt bal càr mờ lơh jăt Jơnau lơh nền tàm pơrjum sồ 57, Viettel Dăk Lăk neh mờ gam pơlam Anih duh broă Làng bol càr lơh tơl ală bơta broă tam gơl sồ. Bơdìh hơ̆ tai, yal mờ lơh ală gùng che internet tàm jơdŭ pơrjum ờ geh sră pơ-àr, lơh niam anih pơrjum pờ tơlik tàm internet mờ anih pơrjum pờ bơh eOffice”.

Ồng Bùi Thanh Toàn, Kwang lam bồ Sờh Jak chài mờ Măi mok càr Dăk Lăk pà git, Tỉñ ủy càr Dăk Lăk neh tă 300 tơmàn đong nàng lơh pràn phan bơna tam gơl sồ, mờ sồr ală sờh, gah lơh broă tàm càr sền wơl nàng dong kờl tai priă di pal nàng ai tơl sàh in. Bal mờ hơ̆, càr lam sồr broă lơh “Bơsram sồ”, pơgồp bal mờ gah lơh ồs đèng, viễn thông nàng gùng che internet geh lơh kơl jăp niam, mờ pờ tai ală ơdŭ bơto bè jơnau git wă sồ ai mpồl kông cứk lơh broă tàm sàh in. “Sờh Jak chài mờ Măi mok neh lơh broă mờ ală mpồl lơh sa kă bro viễn thông mờ geh bal gah lơh ồs đèng nàng geh sùm broă ai geh ồs đèng ai ală PTS. Bè gùng che internet gam ờ pràn tài gơrềng tus mờ gùng che geh ngui sùm, den tŭ do geh bal Viettel mờ VNTP Dăk Lăk gam tơrgùm lơh ngan nàng bơsong. Bal mờ broă bơsong lơh gùng che internet, broă lơh niam wơl ală phan bơna tàm tiah dŭt ndơl kung kwơ màng ngan sơl mờ ală tiah gam lơh. Broă do den kấp càr, kấp sàh, sơnah ƀòn mờ ală sờh, gah lơh broă tàm càr gam lơh nàng bơsong”.

Càr Dăk Lăk gam ntào tềng đăp mờ jơnau kờñ jal mhar bè tam gơl sồ tơnơ̆ mờ tơmŭt bal nàng drơng làng bol in niam rơlao. Broă càr bơcri git nđờ rơhiang tơmàn đong nàng lơh niam wơl phan bơna sồ, mờ lơh pràn broă bơto jơnau git wă ngui măi mok ai mpồl kông cứk tàm sàh in pà gŏ broă lơh ngan pràn bơh jơh mpồl lơh broă cíñ trị dê. Tŭ phan bơna geh lơh tơl niam, bơta pràn kông cứk geh gơguh, kung bè jơnau git wă bơh làng bol dê tàm broă tam gơl sồ, broă lơh geh cồng nha “Gơnoar atbồ sồ” tàm tiah brê bơnơm dờng Tây Nguyên dê là broă kờñ lơh gam mờr gơs.