Tàm tiah lơh rơndăp broă lơh gùng tơrbŏ sàh Ea Wer mờ Ea Ñuôl, càr Dăk Lăk dê, cau lơh gùng gam crăp pơngàr, tồt ñjrong, sơng gùng… nàng lơh gơs ală broă lơh dŭt ndơl, gờñ ai gơl gùng do nàng ngui. Ồng Trần Anh Dương, Kwang lam bồ Kông ty TNHH Rơbàng gùng Dương Hiều (sàh Ea Ñuôl, càr Dăk Lăk) pà git, rơndăp broă lơh gùng do jòng 3 kơi sồ 900 thơ̆k, kờp jơh priă bơcri lơh 18 tơmàn 500 tơlăk đong, geh pe nă cau bơcri priă lơh, tơngai lơh bơh nhai 2 nam 2024 tus nhai 9 nam 2025.

Tŭ do, broă lơh gùng do geh mpồl lơh sa kă bro drơng lơh neh lơh gơs 95% khà broă geh ai. Mơya, priă bơcri ai mpồl lơh sa kă bro gam ờ uă, tàm tŭ tơngai lơh gùng kung pal tơl niam. Ồng Trần Anh Dương pà git: “Broă lơh gùng tơrbŏ 2 sàh do lơh bơh nhai 2 nam 2024 tus tŭ do, mơya tŭ do mìng rơ̆p bơcri priă geh 2 tơmàn 500 tơlăk đong tàm khà geh ai 8 tơmàn 500 tơlăk đong. Tŭ do broă lơh neh mờr gơs bloh, mìng gam ală broă lơh dềt bè ñjrong pơngàr, bal mờ ờ uă gơl pơngàr tai… Broă lơh neh lơh gơs mờ priă bơcri ờ geh kàr lơi, bol añ pal lòt càn nàng lơh, 1 nhai tai jơh lơh broă mờ ờ hềt geh tơm priă den kal ke ngan”.

Tàm broă rơndăp lơh bơcri priă dà lơgar nam 2025, kơnhoàl Buôn Đôn lài do geh càr Dăk Lăk ai 106 tơmàn đong nàng tơm dồs ală broă lơh pơn jăt tai bơh nam lài mờ lơh pa ală rơndăp broă lơh gùng, lơh hìu lơh broă, phan bơna hìu bơsram, hìu sơnơm tàm nam do. Ồng Cao Ngọc Duy, Kwang lam bồ Mpồl Atbồ rơndăp broă lơh kơnhoàl Buôn Đôn (lài do) pà git, tus tŭ do, mpồl lơh broă do mìng rơ̆p bơcri geh 40 tơmàn đong, geh 39% broă rơndăp lơh geh ai.

Ồng pà git tai, tơngai bơcri priă neh lơyài bơh bồ nam mờ bơh ngai 01 nhai 7 tus tŭ do sơlơ gơtìp gơkòl ngan. “Tàm broă tơmŭt bal bơh ngai 01 nhai 7, priă pal ntrờn tus Sờh Priă jền nàng atbồ. Mơya, tus tŭ do ờ hềt geh tam pà wơl ai cau tờm bơcri priă in, den tàng broă bơcri priă gơ-ơm bơh ngai tơmŭt bal tus tŭ do, ală cau lơh broă ờ geh tơm priă lơh broă. Geh bal tŭ broă rơndăp lơh priă neh geh ai, mơya ờ geh jào ai cau tờm bơcri priă in den bol añ kung ờ gơtùi bơcri priă. Bơdìh hơ̆ tai, tài tơmŭt bal bàr kấp, cau lơh broă bàr kấp tàm Mpồl ờ hềt tơl, ƀàng kì ờ hề geh, lơh gơtìp broă bơcri priă tus tŭ do ờ uă rơlao mờ ală nam lài”.

Ồng Trương Công Thái, Phó Củ tịc Anih duh broă Làng bol càr Dăk Lăk đơs, jơnau yal tơnơ̆ mờ tŭ càr lơh jăt broă tơmŭt bal mờ sơrbì kấp kơnhoàl bơh ngai 01 nhai 7, jơh ală Mpồl Atbồ rơndăp broă lơh kấp kơnhoàl pal ntrờn rê tus 3 Mpồl Atbồ rơndăp broă lơh kấp càr mờ tŭ do rơndăp wơl gơs ală mpồl tàm tiah lơh broă. Broă lơh do geh bal broă tam gơl ƀàng kì, tam gơl bè cau lơh broă, mờ pal cih wơl măt anih lơh broă priă jền, neh lơh gơrềng tơn tus mờ broă bơcri priă dà lơgar ai ală rơndăp broă lơh bơ̆t bơtàu dê. Ồng Trương Công Thái pà git, tềng đăp mờ bơta do, Anih duh broă Làng bol càr neh sồr lơh pràn ngan broă lơh rơndăp broă, lơh mhar sră nggal ai tam gơl ƀàng kì mờ lơh jăt broă tam pà kấp loh làng tàm broă bơcri priă dà lơgar: “Tus tŭ do, bè bơta tờm ală mpồl lơh broă tàm kơnhoàl lài do tam gơl rê kấp càr den neh lơh gơs broă tam gơl ƀàng kì, dan cih măt anih lơh broă priă jền mờ lơh tơl kwang bàng lơh broă. Den tàng, lồi nhai 9 do lơh mhar broă lơh nàng bơtơl wơl priă ờ hềt bơcri mờ pa do gơtìp lơyài. Mờ bol añ kung sồr ală cau tờm bơcri priă, cau lơh broă mhar lơh sră nàng tơm priă lơh broă lài mờ hơ̆ nàng tơn jơh broă càn ing lài, gàr niam broă bơcri priă mờ dong kờl cau tờm bơcri priă lơh broă pơn jăt tai”.

Bơdìh mờ bơsong broă ờ geh ƀàng kì lơh gơtìp lơyài tàm broă bơcri priă, càr Dăk Lăk kung tơnguh broă bơsram tàp, tam pà gơnoar đah ală mpồl lơh broă, ală tiah. Jăt ồng Huỳnh Gia Hoàng, Phó Kwang lam bồ Sờh Priă jền càr Dăk Lăk pà git, tŭ neh loh broă lơh, loh kơnòl broă bơh tơl mpồl lơh broă dê, tơl anih lơh broă, den jơh 2 bơta gơkòl dờng ngan bè broă bơcri priă mờ tơm ntrờn ù tiah càr dê ndrờm geh bơsong uă ngan: “Pal dờp ngan là, kwang bàng ală tiah geh tơngŏ bơta kwi kwơ. Den tàng ală sờh, gah lơh broă neh pờ geh ơdŭ bơsram tàp nàng tam pà loh kơnòl broă đah ală gah dê mờ gơwèt gơnoar broă bơh cau lơi gơwèt sàh ha là càr nàng lơh. Bơh tŭ hơ̆, tŭ geh bơsram tàp den tŭ do ală kwang bàng neh git gơnoar, kơnòl broă tàm broă bơcri priă dà lơgar mờ geh bal broă tơm ntrờn ù tiah”.

Tŭ ală bơta gơkòl bè rơndăp broă lơh, kwang bàng lơh broă, sră nggal mờ kơnòl tơl broă lơh rơhời geh bơsong, priă bơcri dà lơgar rơ̆p geh lơh, ai geh bơta pràn nàng lơh ală broă, rơndăp broă lơh gơsa di mờ broă rơndăp lơh neh geh ai. Do kung là broă lơh kwơ màng nàng càr Dăk Lăk lơh pràn broă bơtàu tơnguh phan bơna, pơgồp bal tàm broă bơtàu tơnguh lơh sa mpồl bơtiàn kơl jăp tàm bơta tơnơ̆ mờ tơmŭt bal.