Bơh tŭ geh crơng gơs, Kông ty TNHH Minudofarm Care bơh ồng Lê Đình Tư de neh ai loh làng gùng lòt: ờ tăc mờ lơgar bơdìh phan gam bè ờs mờ tơrgùm tàm broă lơh kơphe geh bơta bơkah uă, kơphe bơkah mờ lơh gơs nền nòn nàng tơnguh bơta kwơ bơh gar kơphe lơgar Việt Nam tàm drà kă bro ală lơgar dê. Tŭ do kông ty geh sùm mpồl cau lơh broă bơh 6 tus 7 nă geh bơto di mờ gah lơh broă gơs phan ngui sa. Mơya, jăt ồng Tư đơs, broă jòi mờ gàr jơng cau lơh broă do ờ tŭ lơi ƀuơn, tàm hơ̆ uă ngan là tàm bơta jơnau kờñ bơh drà kă bro ngai sơlơ geh uă, den tàng cau lơh broă pal git lơh mờ git ngui phan lơh broă, măi mok pa, di pal mờ jơnau kờñ bơh ală lơgar dê.

Ồng Lê Đình Tư pà git: “Bơta kwơ màng ngan là tơnguh uă bơta kwơ broă tăc. Bơta blơi lài phan geh lơh bơh làng bol dê den ờ kal ke, bơta tàm do là cau lơh broă git lơh gơs phan he gam ờ tơl uă ngan. lài ngan là ală bơyô pal kờñ gơboh mờ kơphe, tơnơ̆ mờ hơ̆ den he bơto rơhời nàng git ngui ală măi mok lơh broă, măi mok pa mờ geh broă dong kờl uă. Tơngai jŏ jòng ngan, cau lơh broă git lơh gơs phan pal geh bơto uă rơlao”.

Ồng Nguyễn Văn Hoà, ala măt Anih lơh broă kơlôi sơnơng Bơta bơkah bơh kơphe Dunia tàm lơgar Việt Nam đơs nền, lơh kơphe là broă pơgồp bal đah bơta chài mờ bơta niam, den tàng cau lơh kơphe pal geh bơto nền nòn, geh jơnau git wă tàm broă bơceh lơh mờ nùs nhơm kờñ gơboh lơh broă. Tơnơ̆ mờ tŭ plai kơphe neh geh bic, broă lơh neh sơn đờm mờ broă tus bal bơh cau chài lơh, cau chài coh mờ cau chài klài dà kơphe. Mpồl cau lơh broă do geh ai tơngŏ gar kơphe geh mùl màl “kis” mờ bơta kwơ pa ha là ờ. Ồng Nguyễn Văn Hoà đơs là, nàng di pal mờ khà măt “kơphe dunia dê”, càr Dăk Lăk pal lơh di pal mờ jơnau kờñ geh uă ngan là kơphe bơkah, krơi is mờ bơhiàn bơh rơhiang nam gah lơh kơphe càr Dăk Lăk dê: “Do là jơnau sồr pal geh lơh: cau hùc dà kơphe kờñ wă loh rơlao tai tiah tờm bơh gar kơphe dê, broă lơh, broă coh, broă klài dà kơphe… Cau chài coh ờ mìng lơh geh bơta ƀô bơkah mờ gam lơh geh jơnau, nùs nhơm bal mờ bơta niam chài krơi is bơh tơl li dà kơphe dê”.

Ồng Lê Đức Huy, Củ tịc Mpồl duh broă Kông ty TNHH MTV tăc mờ blơi kơphe mờ lơgar bơdìh ngai 02 nhai 9 càr Dăk Lăk pà git, ală nam do, càr Dăk Lăk neh lơh geh uă bơta gơguh jăk tàm broă lơh kơphe kơl jăp. Mờ broă lơh gơguh bè bơta jăk cau lơh broă mờ bơcri priă, càr Dăk Lăk neh geh uă phan kơphe geh khà ală lơgar mờ geh tăc tus lơgar Mỹ, câu Âu, Nhờk. Ồng Lê Đức Huy đơs là, tơnơ̆ mờ ală broă lơh gơguh bè gar kơphe, kơphe càr Dăk Lăk đơs is, kơphe lơgar Việt Nam đơs bal, rơ̆p wèt gơguh lơh tus bơta phan, tus mờ cau hùc kơphe dê: “Geh bal tàm câu Âu, do là tiah geh bơhiàn coh kơphe Arabica, tŭ do kung pal bơsram wơl broă coh gar kơphe Robusta. Bơta do pà gŏ lơgar Việt Nam ờ mìng là lơgar lơh geh kơphe uă ngan tàm dunia, mờ gam lam lài tàm gah lơh kơphe bơkah Robusta. Lơgar Việt Nam geh tơl phan, bơta chài coh niam den cau drơng broă cau hùc in pal git coh bơkah mờ yal git jơnau bơh làng bol lơh broă sa suơn sre dê tàm tơl li dà kơphe. Mìng tŭ hơ̆, bơta kwơ gar kơphe lơgar Việt Nam dê hơ̆ sồng geh tơnguh mờ drà kă bro hơ̆ sồng mùl màl bơtàu tơnguh kơl jăp”.

Jơnau lơh nền tàm Pơrjum dờng Đảng ƀộ càr Dăk Lăk tơngai lơh broă bơh nam 2025 tus 2030 ai broă bơtàu tơnguh cau lơh broă, tàm hơ̆ uă ngan là cau lơh broă jăk chài, là dùl tàm pe broă lơh pràn jŏ jòng neh geh pờ ai geh bơya niam dờng broă bơtàu tơnguh gah lơh kơphe geh bơta niam uă mờ kơphe bơkah. Là cau đềt mềr mờ gah phan kơphe, ồng Trịnh Đức Minh, Củ tịc Mpồl Kơphe Buôn Ma Thuột đơs là, làng bol lơh broă sa kung gam kờñ pơn jăt tai geh bơto bè broa tam nàng lơh geh uă ngan cồng nha, bơta bơkah jăt mờ ală tiah dềt tam kơphe krơi is dê. Mơya bơta tờm là pal tam gơl tus broă bơto cau lơh broă jăk chài, cau mìng lơh, klài dà lơgar in.

Ồng Trịnh Đức Minh geh jơnau dan: “Bơ̆t bơtàu geh pang sră, clip, jơnau mblàng di pal nàng cau bơsram gơtùi wă tàm ală tiah lơi; mờ lơh geh mpồl cau bơto, bơto sồr jăk ai broă lơh tơnơ̆ mờ tŭ tam in. Do là mpồl cau mờ lơgar Việt Nam gam ờ tơl, tài priă tă nàng bơto lơh kas ngan. Dà lơgar pal dong kờl”.

Mùl màl pà gŏ, ală nam do, gah lơh kơphe càr Dăk Lăk gam rơhời pơdar bal, bơh tàm bơta kơnờm tàm ù tiah, trồ tiah geh is, tus mờ broă kơnờm tàm cau lơh broă geh bơta jăk chài uă mờ măi mok pa. Cau tam, cau lơh, cau coh mờ cau klài dà kơphe ndrờm geh bơto di pal, git wă mờ pơnyờ să mờ broă lơh, tơl li dà kơphe ờ mìng là phan kă bro, mờ gam là bơta niam Tây Nguyên. Jơnau lơh nền tàm Pơrjum dờng Đảng ƀộ càr Dăk Lăk bè bơ̆t bơtàu “Càr Dăk Lăk gơs tiah tus bơh kơphe dunia dê”, gam rơhời geh lơh mùl màl, ờ mìng mờ khà lơh geh, mờ gam mờ bơta bơkah, bơta ngăc ngar mờ kòn bơnus dê.