Mho mang ngai 20/10, Mpồl Ùr kă bro càr Dăk Lăk bơyai lơh broă lơh tìp mat tơngkah 95 nam Ngai crơng gơs Mpồl tam klac bal cau ùr Việt Nam (20/10/1930 – 20/10/2025) mờ Pơrlòng cau ùr lơh sa kă bro niam chài mờ lơbơn niam dơ̆ 3 mờ tơngume Ùr kă bro tàm rài brồ să. 

Tàm dơ̆ tìp mat, Mpồl bơyai lơh neh jờng rơ, pà phan ƀàn ală mpồl cau mờ cau nă să is pơn rơ jak, jàu sră cơng tàng cau tàm mpồl pa, mờ kung lam lơh dơ̆ pơrlòng “Ùr kă bro niam chài mờ lơbơn niam” mờ ală bơnah pơrlòng àu kăp, niam chài tơm boh bơr mờ bơyai lơh niam chài đơs crih tamya. Đơs tàm dơ̆ bơyai lơh, ồng Y Giang Gry Niê Knơng, Phó Ƀí thư Tỉñ ủy càr, Củ tịc Anih duh broă Mặt trận dà lơgar Việt Nam càr Dăk Lăk ala mat Tỉñ ủy càr cih dờp mờ jờng rơ ală tă pơgồp bơh mpồl ùr kă bro dê gơ wèt mờ bơta bơtàu tơnguh lơh sa – mpồl bơtiàn bơh càr dê. Mờ kung kơp kờñ ală cau ùr kă bro pơn jat tai đòm jat bơhiàn ờs mờng, tam gơl pa bơceh lơh, đơs nền gơnoar broă mờ nùs nhơm kơ̆ dơn he dê tàm tŭ tơngai mut gơ rờm bal mờ tam gơl sồ.