Tơngume geh sền gròi tơrgùm tàm tơngai hơ pơrgon ai priă bơcri dà lơgar, phan bơna gùng lòt gơbàn ờ diơng, broă lơh ai ù lơh ală rơndap broă lơh dờng, ai priă jền bồ nam bơsram uă bal mờ broă sền gròi ală anih kham sơm kòp bè sề. Hơ jơnau lùp cau cih ƀău Anih jơnau đơs Việt Nam dê, ồng Trương Công Thái, Phó Củ tịc Anih duh broă Làng bol càr pà git, nam 2025 càr dăk Lăk geh tam pà rlau 16 rbô tơmàn đong, mơya tus lồi nhai 8 mìng rơp ai priă bơcri ờ hềt geh 40% sơl. Càr neh geh sră nggal bơsong bơta do, sồr ală mpồl lơh broă jal mhar lơh sir sră pơ àr, gàr lơh gơs jơnau kờñ ai priă bơcri tàm nam. Anih duh broă Làng bol càr đơs nền rơp kràñ cê sồr lơh nàng tơnguh mhar tơngai hơ pơrgon, lơh jat jơnau sồr bơtàu tơnguh lơh sa – mpồl bơtiàn.