Bơta niam pal sền gròi ngan là priă lơh geh bơh tac phan hờ lơgar ndai neh lơh gơs mờ sơrlèt rlau broă rơndap lơh tàm nam, lơh gơlik bơta gơn kơnờm kuơmàng ngan ai tơngai lồi nam in. Kờp jơh priă lơh geh bơh tac phan hờ lơgar ndai 9 nhai kờp dŭ geh rlau 2 tơmàn 300 tơlak dolar Mỹ, gơguh rlau 37% pơndrờm bal dùl tŭ mờ nam lài mờ sơrlèt rlau broă rơndap broă lơh gùt nam. 

Lòt nhơl kung gơguh jơnhua ngan sơl mờ kờp jơh priă lơh geh kờp dŭ geh rlau 11 rbô 465 tơmàn đong, gơguh 81%. Gah kă bro phan, broă drơng ala pơn jat tai gơguh niam, kờp jơh khà tac rah rài phan bơna mờ priă lơh geh bơh broă drơng ala ngui sa kờp dŭ geh mờr 139 rbt tơmàn đong, gơguh 14%. Nàng lơh gơtùi jơnau sồr gơguh lơh sa gùt nam geh 8%, Anih duh broă Làng bol càr git nền gơguh lơh sa mpồl bơtiàn bal gùt càr quý 4 pal gơguh rlau 10%. Ồng Tạ Anh Tuấn, Củ tịc Anih duh broă Làng bol càr Dăk Lăk sồr ală sờh, gah broă lơh mờ ală tiah pal tơrgùm uă ngan rlau jơh, tơnguh mhar tơngai ai priă bơcri dà lơgar, is ồn là ală rơndap broă lơh dờng; lơh pràn tàm pơrlòng giă ù tiah nàng lơh gơs broă jàu bè rề dia, mờ kung tă bơsong kal ke ai ală rơndap broă lơh bơdìh kes priă in, lơh pràn tam gơl wơl sră pơ àr gơnoar atbồ mờ gàr niam lơngăp lơngai rơndap tap sèng.