Gùt càr tŭ do geh rơlao 19 rơbô 500 mpồl lơh sa kă bro lơh broă tàm jơh ală gah broă, uă mpồl lơh sa kă bro neh sơrlèt tus tàm drà kă bro ală lơgar, ai tơngŏ măt kă bro phan càr Dăk Lăk dê. Bal mờ broă lơh sa, kă bro, mpồl cau kă bro gam tus bal lơh broă nùs nhơm dong kờl, dong kờl tiah kal ke.

Bơh bồ nam tus tŭ do, GRDP càr gơguh mờr 7%, tăc mờ lơgar bơdìh geh rơlao 2 tơmàn 300 tơlăk dolar Mỹ, tăc phan kă bro ờ uă gơguh mờr 18%, tiah bơcri priă pơn jăt tai gơguh mờ rơlao 2 rơbô 300 mpồl lơh sa kă bro crơng gơs pa. Đơs tàm pơrjum, Củ tịc Anih duh broă Làng bol càr Dăk Lăk ồng Tạ Anh Tuấn dờp ală broă pơgồp bal bơh mpồl bơtiàn mpồl lơh sa kă bro, đơs nền gơnoar atbồ rơ̆p lơh broă bal, lơh niam sră pơ-àr, lơh pràn broă tam gơl sồ, ai geh tiah bơcri priă ndrờm bal, ƀuơn ai mpồl lơh sa kă bro in bơtàu tơnguh. Di tàm dơ̆ do, Anih duh broă Làng bol càr jào sră jờng rơ ai 18 mpồl lơh broă mờ 30 nă cau geh cồng nha lơh broă jăk ngan in.