Ngai tàm gùl poh nhai 11, ồng Tạ Hồng Triều, kis tàm jơnum làng bol tiah drà 10, sơnah ƀòn Buôn Ma Thuột tus tàm Anih tờm Drơng broă lơh Sră nggal gơnoar atbồ lơgar sơnah ƀòn lơh sră nggal nàng lơh wơl bơnah jơi mờ măt sơnđan ing tàm Pang sră yal deh gơtìp tìs ai kòn pŭt in rơcang mŭt bơsram đại họk.

Ồng Triều pà git, bŭ lah lài ngan ờ git tàm broă lơh, mơya kơnờm mờ kwang bàng Jơnum Dùl mpồng bơto sồr jơh nùs, ală broă geh bơsong tàm tơngai ờ hềt tus 10 phút: “Tŭ do añ lơh wơl, ală mlŏ lơh broă tàm jơnum dùl mpồng bơto sồr lơh sră nggal ƀuơn ngan, mìng geh ngui dùl pang sră yal deh cih wơl măt neh gơtìp tìs mờ añ yal wơl di nàng cih hơ̆ sồng jào. Kông cứk lơh broă tàm jơnum dùl mpồng đơs là neh lơh gơs, rê tàm hìu kơ̆p pơyoa cồng nha bơsong jăt gùng bưu điện, den tàng añ gŏ ƀuơn ngan”.

Lơh sră nggal dan cih măt tam bao tềng Anih tờm Sră pơ-àr gơnoar atbồ dà lơgar sơnah ƀòn Buôn Ma Thuột, bi Phan Thế Hưng mờ lŏ Nguyễn Diễm Quỳnh pà git, kơnờm mờ broă neh dan cih măt tàm internet bơh lài den tàng broă bơsong sră nggal tàm bơnah “dùl mpồng” geh bơyai lơh mhar niam, ƀuơn rơlao uă ngan. Ală broă lơh niam wơl tàm broă lơh bơh broă bơto sồr tàm online, dờp sră tus mờ broă lơh tềng anih lơh broă pà gŏ anih lơh broă dà lơgar gam tam gơl loh làng ngan bơh bồ tơngoh “atbồ” tus mờ nùs nhơm “drơng lơh”. “Lài ngan den añ gŏ pal lơh bal tàm pang sră mờ sră nggal internet tàm điện thoại den kung gŏ gơlơh kal ke di mơ. Mơya geh kwang bàng bơto sồr nền nòn, jơh nùs, den tàng broă lơh sră nggal mhar niam. Do là bơta pa, pà gŏ nùs nhơm drơng lơh làng bol in geh gơguh niam, sră nggal lơh mhar rơlao”.

Sơnah ƀòn Buôn Ma Thuột, càr Dăl Lăk geh tơrgùm bal bơh uă sơnah ƀòn Thành Công, Tân Tiến, Tân Thành, Tự An, Tân Lợi mờ sàh Cư̆ Êbur gơwèt ƀòn dờng Buôn Ma Thuột lài do, mờ mờr 170 rơbô nă làng bol. Mò Trần Thị Minh Thủy, cau lơh broă tàm jơnum Dùl mpồng tàm Anih tờm Sră pơ-àr gơnoar atbồ dà lơgar sơnah ƀòn Buôn Ma Thuột pà git, pah ngai geh di pơgăp bơh 130 tus 160 dơ̆ làng bol tus bơsong sră nggal. Nàng bơsong khà broă lơh uă, anih tờm sră nggal tam pà gơs bàr jơnum kông cứk, lơh broă tàm jơdŭ mờ bơdìh hìu lơh broă. Làng bol geh bơto sồr di tŭ den tàng tềm pềr tơngai kơ̆p, lơh. “Bàr jơnum, tơl jơnum geh 6 nă cau dong kờl làng bol. Jơnum hờ bơdìh hìu lơh broă den dong kờl làng bol tơmŭt sră nggal tàm internet; jơnum tàm dơlam den dờp mờ bơsong sră nggal. Bol añ mìng dong kờl cau dờng sơnam mờ cau koĕt kơl te, gam cau kơnòm den git ngui măi mok, lơh is mờ geh jào is”.

Jăt jơnau kờp bơh Anih duh broă Làng bol càr Dăk Lăk dê, bơh ngai 01 nhai 7 tus jơh nhai 10, gùt càr dờp geh di pơgăp 481 rơbô pang sră bơh tềng Anih drơng broă lơh sră pơ-àr gơnoar atbồ Dà lơgar, mpồl bơsong sră nggal bơh càr dê mờ bơh ală sờh, gah lơh broă bal mờ 102 sàh, sơnah ƀòn. Tàm khà do, geh rơlao 437 rơbô pang sră neh geh bơsong, broă bơsong sră nggal đơs ngan geh lơh niam. Khà di nùs bơh làng bol mờ mpồl lơh sa kă bro dê bè bơsong sră nggal đơs là geh 100%, gam bè broă dờp mờ bơsong sră nggal geh mờr 91%, geh sền tàm khà di pal jăt mờ broă lơh bal bơh gùt lơgar dê.

Ồng Đỗ Đức Hà, Phó Kwang lam bồ Sờh Adăt boh lam càr Dăk Lăk pà git, nàng tơnguh uă cồng nha broă bơsong ală sră nggal, bơdìh mờ broă tơnguh uă bơta ngăc ngar kwang bàng, kông cứk lơh broă, càr pal bơ̆t bơtàu dùl anih prăp gàr jơnau yal tơngit điện tử pơgồp bal bơh càr tus sàh. Ồng Đỗ Đức Hà ai geh gùng dà broă lơh: “Ală anih lơh broă gơrềng bal pal geh dùl anih prăp gàr jơnau yal tơngit bal, mờ bơh anih prăp gàr bal do pal lơh geh phần mềm măi mok yal tơngit nàng tơrbŏ bal jơh ală jơnau yal tơngit bè sră nggal. Bơh tŭ hơ̆, làng bol mờ mpồl lơh sa kă bro rơ̆p geh tơl jơnau yal tơngit nàng jòi sền, lơh mờ lơh jăt ală sră nggal gơrềng bal tus mờ să tờm. Bơdìh hơ̆ tai, anih lơh broă dà lơgar kung geh jơnau yal tơngit do nàng bơsong sră nggal di jăt jơnau kờñ bơh làng bol mờ mpồl lơh sa kă bro in”.

Càr Dăk Lăk tơnơ̆ mờ tŭ tơrgùm bal geh khà kờp làng bol di pơgăp 3 tơlăk 460 rơbô nă mờ 102 mpồl lơh broă sră nggal kấp sàh. Mờ bơta krơi is là ù tiah dờng ơnàng, làng bol kis ờ tơrgùm bal wah rơwài, broă bơsong sră nggal geh khà uă pà gŏ broă lơh ngan uă bơh mpồl kwang bàng, kông cứk, viên cứk bal mờ cau lơh broă dê. Cồng nha do kung pà gŏ broă tam gơl gah lơh sră nggal bơh bồ tơngoh “atbồ” tus mờ nùs nhơm “drơng lơh” dê jăt gùng dà broă lơh bơh Cíñ phủ dê tàm bơta tơnơ̆ mờ tŭ tơrgùm bal.