Tơngai bơh nam 2017 tus 2021, càr neh tơrmù ƀà rơlao 7 rơbô 400 nă cau lơh broă, tơngai bơh nam 2022 tus 2026 tơrmù ƀà tai rơlao 6 rơbô nă.

Lơh jăt Jơnau đơs pơn dŭt 121 mờ Jơnau lơh nền tàm pơrjum 60, càr Dăk Lăk rơndăp tơmù 1 mpồl broă lơh broă sră nggal kấp càr, 24 kấp kơnhoàl, 184 sàh bal mờ git nđờ rơhiang anih lơh broă, cơl dŭ lơh broă, gah lơh broă. Kơnờm mờ hơ̆, bơta niam lơh broă bơh ală anih lơh broă, sàh geh gơguh, khà bơsong sră nggal di tơngai geh rơlao 98%, dờp tàm internet geh 75%. Pơrjum dờng Đảng ƀộ ală kấp tơngai lơh broă pa neh lơh gơs gờñ 15 ngai. Đơs tàm pơrjum, Ƀí thư Tỉñ ủy càr Dăk Lăk ồng Nguyễn Đình Trung sồr bơsong bơta ờ pràn bè broă tam pà kấp, phan bơna măi mok yal tơngit, gàr niam ală khà broă lơh sa mpồl bơtiàn, tàm hơ̆ uă ngan là tơmù rơƀah, pal tam gơl loh làng đah tơngai lơh broă, di lah ờ rơ̆p sền nàng tam gơl kwang bàng.