Tàm ală hìu tăc phan bơ̆t bơtàu tàm sàh Phù Cát, ală ngai tơnơ̆ miù càl dờng sồ 13, gal cau tus rơlao ngan bè ală ngai bè ờs, tàm hơ̆ uă ngan là cau lòt blơi kiă mờ sơlo nàng tìm hìu. Ồng Nguyễn Văn Cát tàm thôn Phú Kim, sàh Phù Cát pa blơi geh 100 nai kiă nàng tìm wơl rơkàng hìu. Ồng Cát đơs là bơta kwơ màng ngan tŭ do là phan tăc geh ai di tŭ nàng làng bol in gờñ lơh niam wơl hìu đam tŭ rơcang uă tàm kàl mìu. “Añ gŏ giă tăc blơi ờ gơguh uă ir. Bơta kwơ là hìu tăc phan neh geh lài phan, làng bol kờñ geh mơ nàng tìm hìu, ờ pal kơ̆p”.

Tàm ală hìu tăc phan, khà giă geh lir loh làng tềng mpồng hìu, dong kờl làng bol ƀuơn sền mờ pơn drờm. Uă cau tờm hìu tăc phan pà git, tŭ tơnơ̆ mìu càl dờng là tŭ pal geh tam pà bal bơta kal ke mờ mpồl bơtiàn, bañ tơnguh priă tăc. Lŏ Nguyễn Thị Thu Thúy, cau tờm hìu tăc phan Sơn Quân, thôn Phú Kim đơs: “Giă neh geh bơh lài tus tŭ do, geh tŭ tàm dùl hìu 2, 3 rơbô nai kiă priă tăc kung ndrờm bal sơl mờ tŭ do làng bol ờ tơl 2, 3 nai den cau tus blơi kung pal tăc mờ priă hơ̆ sơl, geh tŭ blơi ờ uă den dong kờl làng bol mờ ờ sa priă”.

Ồng Nguyễn Ngọc Minh, cau tờm hìu tăc phan Hồng, sơnah ƀòn Quy Nhơn Nam pà git, tàm tŭ tàm internet gơlik geh uă jơnau yal đơs là kiă bal mờ sơlo tìm hìu ờ geh uă, giă gơguh uă rơlao bơh bàr tus pe dơ̆ den tàm mùl màl càr Gia Lai pà gŏ broă tăc phan lơh hìu tam gơl sơlơ̆u wơl. Ală hìu tăc phan tàm càr do tŭ do kung gam geh khà phan prăp lài uă bơh tŭ mìu càl dờng lài. “Kung gam giă bè ờs, ờ tơnguh priă tăc, sơlo mờ ròc lòs, 2 bơta phan hơ̆ là gŏ tam gơl uă, añ gam phan lài nàng tăc den kung gam gàr giă bè ờs mờ ờ tơnguh giă”.

Nàng pleh mờ broă prăp phan, mpồl lơh broă atbồ drà kă bro càr Gia Lai neh lòt sền mờ sồr mờr 400 hìu tăc phan lơh hìu pal hơ ring niam khà priă, bañ sơgràm mìu càl dờng nàng lơh geh kwơ is; mờ tơnguh broă lòt sền bơh ală gah lơh broă nàng gàr niam broă tă phan. Bi Lê Đình Tân, Cau sền gròi Mpồl Atbồ drà kă bro sồ 4, Đah atbồ drà kă bro càr Gia Lai yal: “Ală kông ty hơ mờ mpồl lơh broă geh gơnoar là tăc mờ priă neh ring niam mờ làng bol, mpồl lơh broă geh gơnoar tàm broă atbồ drà kă bro mờ kwang àng sàh sơnah ƀòn pơgồp bal bơto sồr hìu kă bro phan dong kờl làng bol, blơi tăc nàng di pal, nàng sơrlèt bal mờ tơngai rềs àr”.

Broă ală mpồl lơh sa kă bro, hìu kă bro tàm càr Gia Lai rơcang gàr giă niam, bal mờ broă tus bal di tŭ bơh mpồl lơh broă geh gơnoar dê, neh pơgồp bal dong kờl làng bol gờñ lơh niam wơl hìu đam, kơl jăp rài kis tơnơ̆ mìu càl dờng sồ 13.