Tàm pơrjum, đơng lam bồ càr Gia Lai neh yal bè pơlam gùng bơtàu tơnguh. Mùl màl, tàm tiah đah măt tơngai lik càr Gia Lai (càr Bình Định lài do), càr tơrgùm tàm broă lơh sa mờ măi mok lơh gơs phan, bơceh lơh; lơh sa mờ niam chài lòt nhơl; bơtàu tơnguh năng lượng lơh geh wơl, broă lơh drơng ala anih ơhò ơm mờ tiah tờm logistics. Gam tàm tiah đah măt tơngai mŭt càr Gia Lai (càr Gia Lai lài do), rơ̆p bơtàu tơnguh ală tiah mìng tam phan uă, lơh geh cồng nha ală rơndăp broă năng lượng lơh geh wơl jăt Broă rơndăp ù tiah lơh ồs đèng VIII; bơtàu tơnguh Tiah lơh sa mpồng nhàr lơgar ală lơgar Lệ Thanh, gơhòi gơ jà phan ngui lơh broă bơh lơgar Campuchia nàng lơh gơs gơlik phan, lơh geh ală anih lơh gơlik phan kơ̆ kơl jăp.

Bơdìh mờ broă gơhòi gơ jà bơcri priă, càr Gia Lai kung tơrgùm tàm broă sền wơl, bơsong kal ke ai ală rơndăp broă lơh lơyài lơh broă, tơnguh uă bơngă pin dờn tàm broă bơcri priă. Ồng Phạm Anh Tuấn, Củ tịc Anih duh broă Làng bol càr Gia Lai pà git, tiah bơcri priă pa gam geh gơguh bơh càr tus sàh: “Càr Gia Lai kơ̆ dơn lơh niam wơl tiah bơcri priă. Bol añ neh jào ală broă jàu KPI tus tơl sờh, gah lơh broă mờ 135 sàh, sơnah ƀòn. Ală sàh rơ̆p rơcang tìp, tam gơl pa gùng dà broă atbồ bơh broă sền gròi tus broă drơng lơh, sền làng bol mờ mpồl lơh sa kă bro là tờm, là cau năc bơh anih lơh broă sră pơ-àr gơnoar atbồ lơgar dê. Càr lơh ngan lơh glài nền nòn kwang bàng, kông cứk geh nùs nhơm lơh ờ niam, lơh kal ke tus mờ broă bơtàu tơnguh bal càr dê mờ lơh gơkòl mpồl bơtiàn mpồl lơh sa kă bro. Añ kơ̆p kờñ ală mpồl lơh sa kă bro kung geh dùl dơ̆ “tam gơl” pa, đơs ngan, lơh ngan mờ lơh geh cồng nha ngan”.

Tus bal pơrjum, Tiến sìh ồng Trần Du Lịch, Kwang geh jơng tàm Mpồl duh broă Pơlam Broă dong kờl Priă jền kă bro Dà lơgar đơs là, bơta pràn bơh mpồl lơh broă gơnoar atbồ ƀòn lơgar bàr kấp pa là bơta pràn gơhòi gơ jà bơcri priă mùl màl. Di lah geh bơta pràn do, geh uă mpồl lơh sa kă bro rơ̆p tus bơcri priă tàm càr Gia Lai: “Tơmù dia, ờ tă dia ù tiah là kwơ màng, mơya bơta kwơ màng rơlao mờ mpồl lơh sa kă bro kờñ là mpồl lơh broă sră pơ-àr geh kơnòl lơh broă bơceh lơh, gơnoar atbồ pal là “cau dong kờl” mpồl lơh sa kă bro in. Nàng lơh bè lơi, mpồl lơh sa kă bro tus càr Gia Lai lơh sa mùl màl, niam rơ̆p ờ ngòt kơlôi rơcang ha là gơtìp kal ke lơi”.

Tàm pơrjum, Anih duh broă Làng bol càr Gia Lai neh jào 69 jơnau lơh nền gùng dà bơcri priă, sră dờp dan bơcri priă mờ kĭ hơ sră nggal cih kah lơh broă bal, mờ kờp jơh priă bơcri 4 tơmàn 700 tơlăk dolar Mỹ. Tàm khà do, geh 27 rơndăp broă geh jào jơnau lơh nền gùng dà bơcri priă mờ sră dờp dan bơcri priă, mờ kờp jơh priă cih măt dan bơcri pơgăp 26 rơbô 400 tơmàn đong (ndrờm mờ rơlao 1 tơmàn dolar Mỹ). Tàm hơ̆ geh 13 rơndăp broă lơh sa mờ măi mok, 14 rơndăp broă lơh phan bnơna tiah, mpồl lơh sa mờ măi mok; ală rơndăp broă lơh năng lượng lơh geh wơl mờ Hìu sơnơm. Bơdìh hơ̆ tai, geh 42 rơndăp broă lơh geh kĭ hơ bal jăt broă lơh kah bal lơh broă bal bơcri priă, mờ kờp jơh priă bơcri kờp dŭ rơlao 93 rơbô 400 tơmàn đong (ndrờm mờ mờr 3 tơmàn 600 tơlăk dolar Mỹ). Do là khà priă uă ngan, ai tơngŏ nùs nhơm pin dờn bơh mpồl bơtiàn mpồl lơh sa kă bro dê tàm gùng dà bơtàu tơnguh càr dê; là bơta lài ngan kwơ màng nàng tam gơl lơh sa, tơnguh uă cồng nha, bơta niam mờ bơta pràn tàm pơrlòng. Ală rơndăp broă tơrgùm tàm gah lơh ồs đèng năng lượng lơh geh wơl; tam phan mờ ròng phan tàm dà; bơtàu tơnguh brê pơgồp bal ròng kơnrồ, lơh hìu măi lơh broă, lơh gơs phan geh lơh bơh broă lơh sa suơn sre.

Mò Nguyễn Thị Lan Hương, Củ tịc Mpồl duh broă Atbồ broă Kông ty Pơgồp bal priă Lơh mờ Tăc phan mờ lơgar bơdìh Việt Phúc, do là mpồl lơh broă bơcri priă tàm gah lơh sa suơn sre ngui măi mok pa pà git: “Bol añ bơcri priă tiah lơh sa suơn sre ngui măi mok pa tàm Chư Sê. Do rơ̆p là rơndăp broă bơcri priă pơnrơ ngan tàm gah lơh sa suơn sre mờ ală tiah lơh sơntìl geh gơnoar tờm, tiah prăp gàr gen mờ tiah ngui măi mok pa. bol añ kơ̆p kờñ rơndăp broă lơh gơs anih tơrbŏ bal ală bơta chài gơguh jăk, mờ tŭ lơi kung rơcang lơh broă bal mờ làng bol lơh broă bal mờ làng bol lơh broă sa”.

Pơrjum Hòi jà Bơcri priă nam 2025 tàm càr Gia Lai ờ mìng pờ geh uă dơ̆ niam lơh broă bal mờ kờp jơh priă bơcri git nđờ tơmàn dolar Mỹ, mờ gam ai tơngŏ lơh broă ngan lơh càr dê tàm broă bơ̆t bơtàu tiah bơcri priă loh làng, ƀuơn mờ kơl jăp. Mờ gùng dà broă bơtàu tơnguh loh làng tus tơl tiah, bal mờ broă lơh broă bal bơh gơnoar atbồ bàr kấp dê bal mờ mpồl bơtiàn mpồl lơh sa kă bro, càr Gia Lai gam rơhời ai tơngŏ bơngă là tiah tus geh uă bơta pràn, tiah tơrgùm ală bơta pràn nàng bơtàu tơnguh lơh sa tơlir, lơh sa suơn sre ngui măi mok pa, lơh sa mờ măi mok lơh gơs phan mờ năng lượng lơh geh wơl. Do rơ̆p là bơta pràn kwơ màng nàng ai càr Gia Lai gơs tiah tờm gơguh lơh sa pa tiah Tây Nguyên dê tàm tơngai pa.