Tơnơ̆ dùl nhai lơh broă gơnoar atbồ bàr kấp, 135 sàh, sơnah ƀòn tàm càr Gia Lai neh lơh broă niam, uă khà broă geh ai lơh sa mpồl bơtiàn lơh geh cồng nha niam. Tàm tơngu me hơ̆, càr ai jơnau kờñ gơguh lơh sa 6 nhai lồi nam rơlao 7%. Nàng lơh geh jơnau kờñ gơguh lơh sa do, càr jào 77 sàh, sơnah ƀòn đah măt tơngai mŭt càr Gia Lai lài do ală broă jàu broă lơh sa mpồl bơtiàn, atbồ rơndăp ù tiah. Ală broă jàu do geh mùl màl lơh gơs 23 kơnòl broă.

Anih duh broă Làng bol càr Gia Lai sồr ală tiah mhar lơh jơnau kờñ lài bơtàu tơnguh lơh sa mpồl bơtiàn 6 nhai lồi nam. Ndrờm bal mờ hơ̆, pơn jăt tai lơh mpồl lơh broă gơnoar atbồ ƀòn lơgar tam gơl pràn kơl dang broă lơh sră pơ-àr gơnoar atbồ dà lơgar bơh broă atbồ, sền gròi tus broă drơng lơh, bơceh lơh, pơgồp bal mờ lơh niam sră nggal, rềp làng bol, wă wờng làng bol mờ bơsong ală jơnau kờñ di pal bơh làng bol, mpồl lơh sa kă bro dê. Càr rơ̆p bơcri priă bơtơl phan bơna, phan lơh broă bal mờ ai cau lơh broă di pal tus tàm ală anih drơng broă lơh sră pơ-àr gơnoar atbồ dà lơgar kấp sàh, sơnah ƀòn in. Tàm ală broă jal mhar, càr rơ̆p bơyai lơh ai ală mpồl lơh broă tus tàm sàh, sơnah ƀòn nàng dong kờl bơsong.