Ală ngai mờr lồi nam, tŭ mpồl cau năc bơh ală lơgar bè Nga, Hàn Quốc, Lo… tus wơl, cau năc lòt nhơl pơn jăt tai ai tơngŏ gơnoar bơh dùl tàm poan bơta tờm lơh sa càr Khánh Hoà dê. Ala mờ broă rề ơnàng mờ khà geh, gah lòt nhơl gam tam gơl să tus mờ broă tơrlòng lơh geh bơta niam uă, ai lài broă bơtàu tơnguh tơlir mờ kơl jăp. Củ tịc Tơrgùm ală Mpồl Lòt nhơl càr Khánh Hoà, ồng Phạm Minh Nhựt đơs là jơnau kờñ tam gơl tŭ do là ờ gơtùi lơyài tai: “Lòt nhơl tơlir, lòt nhơl kơl jăp ờ di là broă lơh mìng dùl tŭ, mờ là gùng dà broă lơh pal geh lơh bơh ală cau lơh broă lòt nhơl tŭ do dê. Tàm tŭ kơ̆p geh broă dong kờl bơh ală anih lơh broă atbồ dà lơgar den bol he pal lơh mơ bơh tŭ do nàng bơtàu tơnguh lòt nhơl kơl jăp. Cau năc lòt nhơl tŭ do ngai sơlơ sền gròi ngan tus mờ bơta bơtàu tơnguh tơlir, sền gàr tiah kis, tŭ he tam gơl den rơ̆p hòi jà geh khà cau năc do”.

Tàm Tiah lơh sa Vân Phong, do là tiah pràn lơh sa dà lơgar dê jăt Rơndăp ù tiah tơrgùm dà lơgar dê – Khánh Hoà gam hòi jà ală cau bơcri priă sền gròi broă tơrlòng lơh tiah lơh sa mờ măi mok niam, gơdờp mờ gùng dà broă lơh “lơh geh broă tơrlòng gơguh lơh sa pa, bơ̆t bơtàu tai lơh sa” tàm Jơnau rơcang cih jơnau yal Cíñ trị dê. Tiến sìh Phạm Hồng Điệp, Củ tịc Mpồl duh broă Atbồ broă Kông ty Tă pơgồp priă bal Shinec, do là mpồl bơtàu tơnguh lơh sa mờ măi mok niam tàm ƀòn dờng Hải Phòng mờ tŭ do gam kơlôi sơnơng bơcri priă tàm càr Khánh Hoà geh jơnau đơs: “Tàm bơh 3 tus 4 tiah lơh sa mờ măi mok kờñ ai is dùl tiah lơh broă lơh wơl siồ siă, phan tơlik bơh broă lơh sa mờ măi mok. Tài di lah ờ tơl broă lơh do, ală broă gơrềng tus tiah kis rơ̆p gơs bơta gơkòl tus mờ broă bơtàu tơnguh tơlir. Dà lơgar tŭ do kung gam pơlam sồr broă tơrlòng lơh sa mờ măi mok lơh geh wơl, lơh sa pơdar”.

Càr Khánh Hoà gam hòi jà geh ală rơndăp broă lơh phan bơna jŏ jòng tàm gah anih ơhò dà lềng ơn – logistics, tiah lơh sa mờ măi mok kloh, măi mok pa mờ lòt nhơl geh bơta niam uă tàm Tiah lơh sa Vân Phong, Cam Ranh mờ tiah rềp bal tiah pràn Đah jum tàm gùl lơgar. Lơh broă bal nàng hòi jà bơcri priă, càr lơh pràn broă lơh niam sră pơ-àr, ngui gùng dà broă lơh “dùl mpồng – dùl anih lơh”, lơh jăt sồ jơh tàm broă lơh mờ loh làng tơngai bơsong. Kơnờm mờ broă tam pà loh kơnòl tus tơl sờh, gah lơh broă, tơngai bơsong uă sră nggal bơcri priă – ù tiah - bơ̆t bơtàu gơmù bơh 30 tus 40%; ală sră pơ-àr geh pơgồp bal uă mpồl lơh broă geh tơrmù bơh 2, 3 nhai gam 2, 3 poh.

Ồng Trần Minh Chiến, Lam bồ Mpồl atbồ Tiah lơh sa mờ ală Tiah lơh sa mờ măi mok càr Khánh Hoà pà git, jơnau kờñ là lơh geh dùl broă lơh pơgồp bal mờ ndrờm bal, gơdờp mờ gùng dà broă tam gơl broă tơrlòng gơguh lơh sa. Mpồl Atbồ lơh tiah tờm dong kờl cau bơcri priă bơh broă sền, lơh sră pơ-àr, rơcang rơndăp ù tiah tus mờ tơm ntrờn bal mờ tơrbŏ bal mờ ală sờh, gah lơh broă nàng rơndăp broă lơh geh lơh ƀuơn rơlao. “Nàng gơtùi hòi jà ală cau bơcri priă, bol añ tam gơl bồ tơngoh tàm broă atbồ tus mờ broă lơh broă bal, lơh broă mờ cau bơcri priă nàng bơsong ală gơkòl. Bol añ rơ̆p là cau pơlam broă jăk chài bè đah bơcri priă, dong kờl cau bơcri priă in geh tơl jơnau tơngit, tơrbŏ bal mpồl atbồ dà lơgar nàng cau bơcri priă ƀuơn ngan lơh ală rơndăp broă”.

Uă rơndăp broă lơh jŏ jòng gam geh càr Khánh Hoà hòi jà tàm tơngai bơh nam 2025 tus 2030, tơrgùm tàm phan bơna logistics, anih ơhò ơm dà lềng tơrgùm ntrờn phan kă bro bơh ală lơgar, tiah lơh sa mờ măi mok kloh – măi mok pa, tiah kă bro khăt gơboh. Do là ală jơnau kờñ di pal mờ gùng dà broă bơtàu tơnguh “ală tiah tờm priă jền drơng ală lơgar, tiah kă bro phan khăt gơboh rơnàng pa” mờ “mpồl lơh sa dà lềng uă gah broă” geh cih tàm Jơnau rơcang cih jơnau yal Cíñ trị. Bal mờ broă rề ơnàng dơ̆ niam, càr ai jơnau kờñ rơwah cau bơcri priă tơn bơh sơnrờp nàng pleh mờ rơndăp broă lơh gơlời gời, lơyài lơh ha là ờ pràn.

Ƀí thư Tỉñ ủy càr Khánh Hoà ồng Nghiêm Xuân Thành đơs nền: “Ală mpồl lơh sa kă bro geh pràn pal hơ. Di lah ờ pràn mờ ai lơh, ờ bơyai lơh sền gròi lài, kơ̆p tàm dơ̆ sền gròi tơnơ̆, rơ̆p lời wơl uă bơta ờ niam. Den tàng, pal lơh nền nòn bơh broă sền gròi lài tus mờ broă sền gròi tơnơ̆ mờ rơwah lài ngan. Broă rơwah lài kwơ màng ngan. Broă lơh do ờ pal lơh jăt broă lơh sră pơ-àr uă ir, mờ geh ai bơh tàm jơnau ngui AI dê, do là phan geh sền nàng git mùl màl, dong kờl tơrmù ờ jŏ tơngai ring bal lơh rơndăp broă”.

Sền tơrgùm bal, bơh broă lòt nhơl tơlir tus mờ lơh sa mờ măi mok pơdar bal, bơh broă lơh niam sră pơ-àr tus mờ tam gơl broă tơrlòng gơguh lơh sa, càr Khánh Hoà gam lơh mùl màl nùs nhơm bơh Jơnau rơcang cih jơnau yal Cíñ trị Pơrjum dờng XIV, bơtàu tơnguh mhar, kơl jăp mờ ai bơh tàm ală bơta pràn pa. Tŭ bồ tơnguh drơng broă geh ai lài ngan, tŭ cau bơcri priă geh rơwah loh làng mờ tŭ gơguh lơh sa lòt bal mờ sền gàr tiah kis, càr Khánh Hoà geh tơl tơngu me nàng mŭt tàm tơngai gơguh lơh sa bàr sồ, gơs tiah gơguh lơh sa pa bơh tiah jăt gah dà lềng Đah jum tàm gùl lơgar mờ gùt lơgar dê.