Jăt mờ jơnau dan, rơndăp broă lơh rơ̆p geh bơcri priă jăt gùng dà broă lơh dà lơgar mờ cau dùl nă să lơh bal, lơh broă BOT geh khà priă Dà lơgar tus bal. Gơl gùng rơndeh lòt mhar Nha Trang – Dà Làc jòng rơlao 80 kơi sồ, gơl gùng sơnrờp tơrbŏ mờ gùng rơndeh lòt mhar Đah tô – Đah jum tàm tiah đah măt tơngai lik tàm sàh Diên Thọ, càr Khánh Hoà, mờ tiah lồi gùng tơrbŏ mờ gùng rơndeh lòt mhar Liang Khàng – Prenn tàm sơnah ƀòn Xuân Hương, càr Lâm Đồng.

Gơl gùng geh lơh mờ bơta jờl rơndeh lòt bơh 80 tus 100 kơi sồ tàm 1 jơ, broă lơh ơnàng 4 rơndeh lòt, kờp jơh priă bơcri di pơgăp 25 tơmàn đong. Tơngai rơcang bơcri priă bơh nam 2024 tus 2025, kờp dŭ geh lơh tàm tơngai bơh nam 2026 tus 2028. Broă lơh gơs gơl gùng rơndeh lòt mhar Nha Trang – Dà Làc ờ mìng di pal mờ broă kờñ lòt rê, pơn diang phan kă bro ngai sơlơ gơguh, mờ gam pờ geh ù tiah bơtàu tơnguh pa ai bàr tiah tờm lòt nhơl dờng ngan bơh gùt lơgar dê, ai geh bơta pràn bơtàu tơnguh kơl jăp jơh tiah đah jum tàm gùl lơgar mờ Tây Nguyên dê.