Tơngai do, càr Khánh Hoà geh uă tam gơl loh làng tàm broă lơh broă bal mờ mpồl lơh sa kă bro, ai tơl bơta ƀuơn lơh pràn bơtàu tơnguh lơh sa mpồl bơtiàn. Bi Lê Thanh Vân, Phó Kwang lam bồ Kông ty Miwa Vina (Tiah lơh sa mờ măi mok Suối Dầu, sàh Suối Dầu) pà git, mpồl lơh sa kă bro pa geh Mpồl Atbồ Tiah lơh sa, Tiah lơh sa mờ măi mok càr Khánh Hoà dong kờl lơh wơl sră nggal bơcri priă rề ơnàng hìu lơh broă mhar ngan, sră nggal lơh mìng tàm 5 ngai: “Mpồl lơh sa kă bro bol añ là mpồl lơh sa ka bro di mơ mờ dềt, 100% priă bơcri bơh lơgar bơdìh. Mpồl Atbồ ha là ală anih lơh broă, mpồl lơh broă sùm lơh broă bal, bơto sồr ală sră nggal nàng lơh mhar niam, di mờ jơnau geh ai tàm adăt boh lam dê. Do là bơta tờm kwơ màng ngan, ai geh bơta pràn hòi jà nàng ală cau bơcri priă pa sền gròi rơlao”.

Lơh niam sră nggal tàm Mpồl Atbồ Tiah lơh sa, Tiah Lơh sa mờ măi mok càr là ală cau bơcri priă ơm dơ̆ bàr tàm tiah lơh sa mờ măi mok nàng sră nggal geh lơh di mờ jơnau geh ai mìng tàm pơgăp 10 ngai, tŭ do mìng gam 5 ngai, di lah lơh mhar ngan di lah gơtùi, bol añ rơ̆p tơrmù gam 3 ngai. “Bol añ ai lài ală cau bơcri priă tus tàm tiah lơh sa tơrgùm bal, tàm hơ̆ uă ngan là ală cau bơcri priă dơ̆ bàr tàm tiah lơh sa mờ măi mok nàng sră nggal lơh jăt broă lơh tàm pơgăp 10 ngai, tŭ do mìng gam 5 ngai, di lah mhar ngan gơtùi, bol añ tơrgùm gam 3 ngai. Kwơ màng ngan là tŭ mpồl lơh sa kă bro jào sră, Mpồl atbồ pal sền wơl mờ bơto sồr di tŭ nàng mpồl lơh sa kă bro lơh gơs, bơtơl, gàr niam sră nggal geh tơl niam”.

Càr Khánh Hoà lơh pràn broă bơtàu tơnguh năng lượng lơh geh wơl, wèt tus tơrmù gơrềng tàm năng lượng chah lŭ, gàr niam bơta tơl năng lượng dà lơgar mờ bơtàu tơnguh lơh sa tơlir, kơl jăp. Tus nhai 6 nam 2025, càr Khánh Hoà neh geh 57 rơndăp broă lơh năng lượng lơh geh wơl mờ kờp jơh bơta pràn lơh geh mờr 3 rơbô 750 MW, tàm hơ̆ geh ồs đèng càl, ồs đèng măt tơngai, ồs đèng dà mờ ồs đèng măt tơngai geh lơh hờ đang rơkàng hìu, geh mờr 7% khà ồs đèng lơh geh wơl tàm gùt lơgar dê. Is ồn, tiah đah Tô càr bơtàu tơnguh pràn ală rơndăp broă lơh dờng bè Hìu măi Ồs đèng geh lơh bơh bơta duh BOT Vân Phong 1 mờ bơta pràn 1 rơbô 320 MW, pơgồp bal di pơgăp 3% khà ồs đèng dà lơgar dê. Tàm tiah hờ Đah jum, ală tập đoàn dờng bè BIM, Trung Nam neh bơcri git nđờ rơbô tơmàn đong tàm mpồl lơh ồs đèng măt tơngai, ồs đèng càl pơgồp bal lơh boh kloh, ngui jơh ù klàr.

Càr Khánh Hoà ai năng lượng là 1 tàm 4 bơta tờm lơh gơguh lơh sa tờm, ai geh jơnau kờñ gơs tiah tờm lơh geh năng lượng dà lơgar dê mờ kờp jơh bơta pràn kờp dŭ geh 14 rơbô MW tàm nam 2030, tàm hơ̆ geh bal ồs đèng măt tơngai, ồs đèng càl, ồs đèng nhơm mờ ồs đèng hạt ñân. Càr kung gam lơh mhar ală rơndăp broă lơh tờm bè Hìu măi ồs đèng hạt ñân Ninh Thuận, ồs đèng dà Bác Ái, LNG Cà Ná… Mờ tơrgùm lơh gơs phan bơna gùng che ồs đèng, lơh geh broă dong kờl hòi jà bơcri priă, pơlam geh nùs nhơm ring bal bơh làng bol dê nàng lơh gơs jơnau kờñ bơtàu tơnguh năng lượng tơlir, kloh, kơl jăp. Ồng Hồ Xuân Ninh, Kwang lam bồ Sờh Kă bro phan càr Khánh Hoà pà git, năng lượng geh tơl ờ mìng pơgồp bal tàm broă geh tă tàm kes priă mờ gam ai tơl bơta niam nàng càr hòi jà bơcri priă lơh ală rơndăp broă lơh sa mờ măi mok pa: “Di lah kờñ tơlik geh khà broă rơwah ai lài ală gah broă, gah lơh sa geh bơta kwơ gơguh uă, măi mok gơguh niam, đềt mềr mờ tiah kis, phan geh lơh geh khà bơta chài, măi mok pa, pơgồp bal tàm broă lơh gơguh priă geh. Tiah lơh sa mờ măi mok bè Dốc Nắng, Trảng É, ha là Cà Ná 1 kung neh rơwah geh ală cau bơcri priă geh broă lơh bơcri priă lơh phan bơna ndrờm bal, mhar hòi jà ală rơndăp broă lơh dơ̆ bàr”.

Phan bơna jŏ jòng geh bơcri priă, tiah bơcri priă geh gơguh; lơh sa mờ măi mok lơh gơs phan, năng lượng lơh geh wơl, lòt nhơl, broă lơh drơng ala brồ guh mhar là bơta tờm nàng càr Khánh Hoà tơnguh pràn broă bơtàu tơnguh lơh sa, tơnguh uă rài kis làng bol in. tơnơ̆ mờ tŭ tơrgùm bal càr, rề ơnàng tiah bơtàu tơnguh, càr Khánh Hoà pơn jăt tai ai jơnau kờñ tus nam 2030 gơs ƀòn dờng gơwèt Dà lơgar dê, gơguh lơh sa 12% tàm 1 nam, priă geh tơl nă làng bol gơguh 14% tàm 1 nam. Ồng Trần Quốc Nam, Củ tịc Anih duh broă Làng bol càr Khánh Hoà pà git: “Đảng ƀộ, Anih duh broă Làng bol càr ai, bơsong jơh ală bơta gơkòl dờng bè gùng dà broă lơh bal mờ phan bơna, tàm hơ̆ uă ngan là ală rơndăp broă gam gơlời; tơrgùm bơtàu tơnguh ndrờm bal phan bơna gùng lòt mờ phan bơna tiah lơh sa mờ măi mok, ai geh bơta pràn gơguh lơh sa pa. Lơh pràn broă bơtàu tơnguh poan tiah gơguh lơh sa, tàm hơ̆ geh lơh sa mờ măi mok, năng lượng, lòt nhơl-broă lơh drơng ala mờ ƀòn drà pa jơh; lơh pràn broă tam gơl sồ, wèt tus jơnau kờñ lơh sa sồ geh 1 bơnah 3 khà phan geh lơh tàm nam 2030”.