Jăt jơnau yal bơh Anih duh broă Làng bol càr Khánh Hoà dê, 9 nhai nam do, lơh sa càr pơn jăt tai tơnguh kơl jăp, GRDP geh di pơgăp 7%. Ală gah broă lơh sa suơn sre, lơh sa mờ măi mok, broă lơh drơng ala ndrờm geh khà brồ guh niam. Tă tàm kes priă Dà lơgar sơrlèt mờ rơndăp broă geh ai. Ală gah lơh sa, lòt nhơl mờ broă lơh drơng ala gam brồ guh loh làng. Mpồl lơh sa kă bro tàm càr kung neh rơcang rơlao tàm broă tàm dơlam geh is, tơrmù broă gơrềng tàm broă blơi phan bơh lơgar bơdìh. Càr Khánh Hoà neh tơn jơh gơs broă hìu ing, hìu ồm sèt, ñhăt dà mìu, pờ ơnàng broă dong kờl ai càn priă lơh hìu ơm mpồl bơtiàn ai cau rơƀah mờ cau lơh broă in. 3 broă lơh jơnau kờñ dà lơgar ndrờm geh cồng nha niam, pơgồp bal tàm broă tơnguh niam phan bơna mờ rài kis tàm tiah ngài.

Jăt ồng Nguyễn Khắc Toàn, Củ tịc Anih duh broă Làng bol càr Khánh Hoà đơs, bơdìh mờ ală bơta niam, càr kung geh uă ngan bơta gơkòl. Tàm hơ̆, bơcri priă dà lơgar mìng rơ̆p geh rơlao 44%, tài gơkòl tàm broă tơm ntrờn ù tiah mờ broă tơrbŏ bal rơndăp broă ù tiah tơnơ̆ mờ tŭ tơmŭt bal. Do kung là bơta càr gam tơrgùm nàng bơsram: “Bol añ sền gròi ngan nàng bơsong ală rơndăp broă kal ke, gơkòl, bol añ neh tam pà ală kwang bàng duh broă sùm Anih duh broă Làng bol càr drơng tơl gah broă. Bơyai lơh pơrjum sùm, pơlam, bơsong jơh tàm tơngai tus. Kơ̆p kờñ mờ ală broă lơh pràn do, lơh ngan tơrmù kal ke, gàr niam gơguh lơh sa”.

Ƀộ trưởng ồng Nguyễn Hải Ninh đơs niam broă lơh ngan bơh càr Khánh Hoà dê tàm broă sồr lơh, đơng lam, brồ guh lơh sa, lơh pràn broă tam gơl sồ tàm broă lơh sră pơ-àr gơnoar atbồ lơgar mờ ngui KPI tàm broă sền, atbồ kwang bàng. Ồng Nguyễn Hải Ninh đơs, tơnơ̆ tơrgùm bal, càr Khánh Hoà geh ù tiah bơtàu tơnguh dờng ngan, mờ bơta geh, bơta kwơ ờ hoan geh tiah ndai gơtùi geh, bè tiah jăt gah dà lềng jòng ngan gùt lơgar, gùng rơndeh lòt mhar, ƀlàng rơndeh par, tiah tờm năng lượng mờ lòt nhơl geh khà dà lơgar. Den tàng, càr Khánh Hoà pal bơsong mhar ală bơta gơkòl nàng lơh geh jơnau kờñ gơguh lơh sa 8,1% tàm gùt nam 2025, lơh geh cồng nha ală jơnau lơh nền tàm pơrjum bè gùng dà broă lơh, broă krơi is, kwơ màng, nàng lơh geh bơta pràn ai jơh tơngai lơh broă in. Ƀộ trưởng ồng Nguyễn Hải Ninh đơs: “Neh geh ală cau bơcri priă dờng ngan tus mờ càr Khánh Hoà bloh. Mơya pal nggui wơl nàng sền ală rơndăp broă lơh tàm Tiah drà, tiah ờ tă dia bè lơi? Pal geh broă lơh lơi? Tiah kă bro khăt gơboh bè lơi? Lơh pràn bè lơi? Di lah ờ den ală cau bơcri priă rơ̆p lơh jăt pơn jăt bal bè ờs, rơ̆p ờ tơnguh pràn, gùng dà bơh càr Khánh Hoà dê pơgồp bal mờ gùng dà bơh dà lơgar dê”.

Mờ bơta geh, bơta pràn neh geh lài mờ broă tus bal pràn bơh jơh gùt mpồl lơh broă cíñ trị dê, càr Khánh Hoà gam ơm tềng đăp mờ bơta niam nàng tơnguh pràn kơl dang, gơs tiah tờm lơh sa dà lềng, lòt nhơl mờ broă lơh drơng ala pa bơh tiah Đah jum Tàm gùl lơgar dê. Ală jơnau hơ dong kờl, bơsong kal ke bơh ală ƀộ, gah lơh broă Dà lơgar geh kơ̆p kờñ rơ̆p ai geh bơta pràn nàng càr Khánh Hoà lơh geh jơnau kờñ gơguh lơh sa 8,1% tàm nam 2025.