Ngai hìng (09/10), Pơrjum dờng cau ala măt Đảng ƀộ càr Lâm Đồng dơ̆ I, tơngai lơh broă bơh nam 2025 tus 2030 rơ̆p mùl màl geh bơyai lơh. Tàm Dà Làc, do là tiah geh bơyai lơh pơrjum dờng mờ tàm tiah tàm ală càr Dăk Nông, Bình Thuận lài do neh geh yồng uă bồng bi, bơkào nàng ai tơngŏ nùs nhơm pa, bơta pràn pa chờ gờm pơrjum dờng.

Pơrjum dờng cau ala măt Đảng ƀộ càr Lâm Đồng dơ̆ I, tơngai lơh broă bơh nam 2025 tus 2030 là broă lơh cíñ trị kwơ màng, ai tơngŏ broă tơrgùm bal pe càr Dăk Nông, Bình Thuận mờ Lâm Đồng dê, ai geh càr gơs bă ù dờng ơnàng ngan gùt lơgar dê mŭt tàm tơngai bơtàu tơnguh tơl ală bơta mờ kơl jăp. Ồng Nguyễn Khắc Bình, Kwang lam bồ Cơl dŭ lơh broă Tỉñ ủy càr Lâm Đồng pà git: Sră nggal Pơrjum dờng cau ala măt Đảng ƀộ càr Lâm Đồng dơ̆ I, tơngai lơh broă bơh nam 2025 tus 2030 neh geh rơcang nền nòn. Jơnau yal cíñ trị neh geh ai jơnau pơgồp bal bơh Mặt trận Dà lơgar mờ ală mpồl lơh broă cíñ trị mpồl bơtiàn; jơnau đơs tàm pơrjum dờng 128 đảng ƀộ, mpồl đảng gơwèt Đảng ƀộ càr; bơyai lơh cri bơyai bơta chài tus bal, ai geh gùng dà broă lơh nàng bơtàu tơnguh; mờ iăt jơnau đơng lam bơh Mpồl lơh broă Ƀộ Cíñ trị dê. Broă rơcang ai pơrjum dờng neh geh càr Lâm Đồng lơh gơs.