Tàm dơ̆ tìp mat, ală rơnàng cau ala mat Quôk hội càr Lâm Đồng, Dăk Nông mờ Bình Thuận neh tam pà uă jơnau kir sơnrai, ai tơnggŏ bơta pin dờn broă tơmut bal 3 càr rơp lơh gơs tŭ niam bơtàu tơnguh pa; kơp kờñ ală cau ala mat pơn jat tai đòm jat bồ tơngoh jak, geh kơnòl, tă pơgồp jơh nùs ai Quôk hội in.

Đơs tàm dơ̆ tìp mat, ồng Y Thanh Hà Niê Kđăm, Ƀí thư Tỉñ ủy càr, Kwang lam bồ Mpồl cau ala mat Quôk hội càr Lâm Đồng đơs nền, tàm 80 nam Quôk hội Việt Nam, ală rơnàng cau ala mat càr Lâm Đồng sùm đềt mềr mờ làng bol, đơs song ngan bồ tơngoh, nùs nhơm, bơta kơp kờñ cau tĕ khà dê, tă pơgồp uă jơnau đơs dipal tàm broă lơh adat boh lam, jat sền mờ lơh nền ală broă kuơmàng. Tŭ do, Mpồl cau ala mat Quôk hội càr Lâm Đồng geh 19 nă cau ala mat, geh 8 nă cau ala mat dà lơgar mờ 11 nă cau ala mat càr.