Lài mờ tŭ sơn đờm, Thủ tướng Cíñ phủ bal mờ ală cau tus Pơrjum dờng ai tŭ kun bồ làng bol gơtìp chơ̆t tài rềs àr bơh trồ tiah; Mpồl cau kă bro kơnòm să Việt Nam tă 6 tơmàn đong dong kờl mhar 6 càr Cao Bằng, Hà Tĩnh, Đà Nẵng, Khánh Hoà, Gia Lai, Dăk Lăk bơsong hoàc huơr bơh trồ tiah lơh aniai; Mpồl cau kă bro kơnòm să Việt Nam geh pơgăp 21 rơbô nă cau tàm ală mpồl lơh sa kă bro neh lơh geh broă lơh ai 5 tơlăk nă cau lơh broă in, geh khà priă pah nam rơlao 40 tơmàn Dolar Mỹ mờ tă pơgồp rơlao 10% GDP dà lơgar.

Git nđờ rơhiang tơmàn đong geh ai ală broă lơh rài kis broă lơh broă sa mpồl bơtiàn neh ai tơngŏ loh làng nùs nhơm lam lài tài kơnòl mờ mpồl bơtiàn bơh mpồl cau kă bro kơnòm să dê… Chờ gờm ală cồng nha dờng pràn bơh mpồl Cau kă bro kơnòm să Việt Nam neh lơh geh, Thủ tướng sồr Mpồl Cau kă bro kơnòm să Việt Nam pơn jăt tai rơcang lài, bơceh lơh, ròng siam, pơgồp bal mờ dong kờl bal mpồl cau kă bro kơnòm să tơnguh bơta pràn kơl dang bơh cau kơnòm să dê, jơh nùs, nùs nhơm kờñ gơboh dà lơgar, bơhiàn jơi bơtiàn, lam lài tàm broă sơn đờm mŭt lơh broă, tam gơl pa bơceh lơh, tam gơl sồ, tam gơl tơlir, ngui bơta ngăc ngar kòn bơnus lơh gơs tàm broă lơh, kă bro; ai ală bơta kwơ măt kă bro Việt Nam, phan Việt Nam lik tus tàm dunia; mờ lam lài tàm broă lơh jăt kơnòl mpồl bơtiàn. Di tàm hơ̆ do, Thủ tướng sồr Mpồl Cau kă bro kơnòm să Việt Nam pơlam broă lơh pơrlòng “6 ngan”, tàm hơ̆ geh: “lam lài ngan, bơceh lơh ngan, ai să ngan, tam klăc ngan, tơrgùm să ngan, kờñ gơboh ngan”.