Ală ngai do, tŭ trồ mang tus tàm sàh Ea Drăng, càr Dăk Lăk, ală gơl gùng ƀồng bi dà lơgar bal mờ bơta àng bơh ală ồs đèng năng lượng mat tơngai lơh geh dùl muh mat krơi ai uă thôn, ƀòn in. Tàm ƀòn Lê B, 2 nơm gùng jòng 3 kơi sồ lài do klam jơngo, ngềt ngơ̆t tŭ do neh àng gơ crài ƀong đèng. 2 gah gùng, ală ƀồng bi pơr hê tơn jòng bơh tơl rơkàng hìu. Ồng Nhan Ngọc Tấn, lam bồ Mpồl Cau lơh broă sa ƀòn Lê B pà gĭt, bơta tam gơl do là cồng nha bơh bơta dùl nùs bal, tă pơgồp bal dà kơl hề bơh mpồl bơtiàn làng bol ơm kis dê. “Bơh bơta mblàng yal hòi jà, làng bol kung bè cau tàm mpồl ndrờm ring bal lơm. Bơh tŭ geh gùng lòt bồng bi lơh ai lòt rê, jak chài rlau den ù tiah ƀòn lơgar ƀòn Lê B tam gơl niam mờ lơh kah wơl tàm tơl nă làng bol añ dê nùs nhơm kờñ gơboh dà lơgar”.

Ờ mìng lơh gùng ồs đèng sòl àng lơm, uă cau tàm mpồl cau lơh broă sa tàm sàh Ea Drăng gam gàr niam broă pơs wàs sàng goh gùng ƀòn, tam bơkào jat kềng gah gùng mờ săc sồ siă tàm hìu bơnhă. Jat mò Vũ Thị Thúy Hòa, Chủ tịch Mpồl Cau lơh broă sa sàh Ea Drăng pà gĭt, bơta kwơ màng là neh lơh kah wơl geh gơnoar cau tờm bơh làng bol dê tàm ală broă lơh atbồ is mờ ală broă lơh geh ngan neh hời rơ hời tam gơl muh mat ƀòn lơgar mờ bơta gĭt wă sền gàr tiah ơm kis tàm tiah làng bol ơm kis. “Ờ kơ̆p kơldìng wơl tàm bơta dong kờl lòt bal bơh Dà lơgar dê lơm mờ bol añ mpồl bơtiàn lơh bal hòi jà làng bol mờ ală broă lơh atbồ is bơh ală broă lơh gơl gùng lòt rê, gơl gùng ồs đèng kung bè tam cah is sồ siă ngui tàm hìu bơnhă mờ tam cah is sồ siă khih aniai”.

Tàm sơnah ƀòn Buôn Hồ, càr Dăk Lăk, ală kấp Mpồl Cau lơh broă sa kung hòi jà khòm tơrgùm sồ siă, bơsong kơldung sền gàr phan tam tơnơ̆ ngui, lơh ală broă lơh tơlir- sàng goh- niam mờ tơrmù ƀà ngui dà sơnơm tàm broă lơh sa suơn sre. Pa do, rboă lơh “Mpồl cau lơh broă sa atbồ is bè sền tiah tiah ơm kis” geh lam lơh tàm ƀòn Tring 1 mờ ƀòn Tring 2 dờp geh bơta lơh jat jơh nùs bơh làng bol dê. Ồng Tích Mlô, ơm tàm ƀòn Tring 2, sơnah ƀòn Buôn Hồ pà gĭt: “Bol añ chờ hờp ngan mờ ưn ngài bơta sền gròi bơh Mpồl Cau lơh broă sa neh dong kờl thùng ơn sồ siă mờ ồs đèng mat tơngai sòl àng trồ mang. Bol añ rơ̆p lơh ngan pơs wàs sàng goh mờ jơh nùs tus bal ală broă lơh sền gàr tiah ơm kis nàng ƀòn lơgar in ngai sơlơ tơlir- sàng goh mờ niam”.

Jơh gùt càr Dăk Lăk tŭ do gàr niam 187 broă lơh cau lơh broă sa tus bal sền gàr tiah ơm kis pơgồp bal mờ bơt bơtàu ƀòn lơgar pa. Uă tiah neh lơh geh ală gơl gùng àng- tơlir- sàng goh- niam, lơh gơrề  broă lơh tam cah is sồ siă tàm hìu bơnhă, khòm tơrgùm sồ siă broă lơh sa suơn sre  mờ ngui ală sồ siă siñ họk tàm broă lơh sa. Ồng Ya Toan Ênuôl, Chủ tịch Mpồl Cau lơh broă sa càr Dăk Lăk pà gĭt, jơnau kờñ bơh ală srơh dê ờ mìng là tam gơl niam ù tiah ƀòn lơgar lơm mờ gam bơt bơtàu ală mpồl bơtiàn làng bol ơm kis niam jak, kơ̆ kơl jăp, tàm hơ̆ làng bol geh gơnoar tờm. “Mpồl sùm sền gĭt loh bơt bơtàu ƀòn lơgar pa den cau lơh broă sa pal là cau tờm, ai mpồl là mpồl tờm nàng bơyai lơh tề lam mờ tàm tơrbŏ bal. Bơyai lơh srơh gơ gơs broă lơh ngan ngồn, tàm jàu kơnòl loh cau, loh broă nàng hòi jà bơta pràn tơrgùm bal, pơgồp bal bơt bơtàu ƀòn lơgar pa mờ tơnguh niam rài kis làng bol in”.

Tàm ală ƀòn lơgar bơh càr Dăk Lăk tŭ do dê, bơta tam gơl ờ mìng ơm tàm ală gơl gùng sàng ƀong đèng rlau halà sàng goh rlau lơm mờ gam tơngŏ loh bơh broă làng bol sơnđờm rcang lài tàm sơm bat tê bal sền gàr tiah he gam ơm kis. Bơh broă lơh sa, rài kis pah ngai, khi neh gĭt wă rlau tai tàm broă sền gàr tiah ơm kis bơh he dê, pơgồp bơnah lơh pa muh mat ƀòn lơgar ngai sơlơ tơlir- sàng goh- niam rlau.