Ai geh ờ uă bơta pal tơlik jơnau bơsram broă mờng chài tàm broă pơgồp bal lơh, nàng đal loh ală tiah gơkòl, kal ke tàm broă pơgồp bal, Chủ tịch Quốc hội ai geh 3 bơta kwơ màng nàng ală anih lơh broă gơrềng bal geh pơgồp jơnau đơs. Ồng sồr pal tam gơl bơh bồ tơngoh “lơh broă mờ lơgar ndai drơng bơta git gơ̆p” tus “lơh broă mờ lơgar ndai bơceh lơh bơtàu tơnguh”.

Tơl broă lơh cri bơyai broă mờ lơgar ndai pal geh bơta kwơ gơguh ai broă bơtàu tơnguh dà lơgar in. Ală anih lơh broă gơrềng bal tơrgùm lơh jăk 5 gùng dà broă lơh, hơ̆ là: git di bè broă lơh bơh broă cri bơyai mờ lơgar ndai Quốc hội dê tàm broă tơrgùm jơh gah lơh broă mờ lơgar ndai tơl ală bơta, lơh pa dà lơgar dê. Chủ tịch Quốc hội sồr pal pơgồp bal nền nòn ală pơrjum cri bơyai nghị viện mờ jơnau kờñ hòi jà geh bơta pràn, măi mok tờm, măi mok pa, rề ơnàng drà kă bro ai dà lơgar in, tơnguh bơta pràn tàm dơlam. Kung tàm dơ̆ lơh broă, kwang đơng lam bồ Bộ Cri bơyai broă mờ lơgar ndai; Anih duh broă Sền gàr dà lơgar, Lơngăp lơngai mờ Cri bơyai broă mờ lơgar ndai; Cơl dŭ lơh broă Quốc hội neh kĭ hơ bal kơrnoăt pơgồp bal lơh.