Tàm dơ̆ pơrjum, Mpồl duh broă Làng bol càr Gia Lai ring bal ală jơnau lơh nền tàm pơrjum kuơmàng, geh: ring bal jơnau kờp dŭ lài dơ̆ ngui kes priă càr dê nam 2025; Broă rơndap lơh bơtàu tơnguh lơh sa - mpồl bơtiàn 5 nam, tơngai bơh nam 2026 tus nam 2030; sang tĕ jơnau lơh nền tàm pơrjum bè gơnăp gơnoar lơh nền ring bal kơnòl broă mờ kờp dŭ priă tă dơ̆ ngui sùm kes priă dà lơgar tàm càr; tam gơl, bơtơl bàr pe jơnau cih bè ală bơta nàng git nền bă tiah tơl bơta ù mờ ƀàng cih giă ală bơta ù nam 2026; jơnau cih gùng dà broă lơh dong kờl cau ngui broă drơng ală chu ƀồc cau chơt tàm càr.

Bè broă rơndap tap sèng mpồl lơh broă sră pơ àr gơnoar atbồ ală kâp mờ 1 nam lơh broă bơh gơnoar atbồ ƀòn lơgar 2 kâp dê, jơnau yal tàm dơ̆ pơrjum pà git, kung gam bàr pe bơta kal ke. Pơn rơ ngan tàm hơ̆ là bàr pe sră nggal, jơnau yal tơnggit ờ hềt tơmut ndrờm bal wil tơl; pràn jak,mờng chài bơh dùl mpồl kwang bàng dê tàm broă dờp kơnòl broă pa gam ờ niam. Bàr pe tiah gam ờ tơl cau lơh broă tàm ală gah mờng chài bè ù tiah, bơt bơtàu, priă jền, măi mok yal jơnau tơnggit mờ tam gơl sồ. Broă ờ hềt geh jàu khà cau lơh broă sa priă nhai dà lơgar ngan ngồn tơnơ̆ rơndap tap sèng kung lơh gơbàn kal ke tus broă rơndap, sac rơ wah mờ ngui kwang bàng, cau lơh broă sa priă nhai dà lơgar kâp sàh.