Mờ làng bol kòn cau Rơglai mờ K’ Ho tàm sàh Phan Sơn, càr Lâm Đồng dê, kòi me geh sền kwơ màng ngan bè “gar biàng”. Sơntìl kòi me geh bơta pràn kơl dang ngan, phe bò mờ tŭ he trŭ gơs piang, gar phe lì dờng, sào bơkah, thồm krơi is ngan tiah brê bơnơm dê. Ồng Mang Ngọc Văn, kis tàm sàh Phan Sơn pà git, bơh uă rài do, tus tŭ do hìu nhă ồng kung gam lơh kòi me bè dùl broă lơh nàng prăp gàr bơhiàn ờs mờng. Làng bol tàm do mìng lơh kòi mìr, geh bal uă bơta kòi, mơya mìng duh khoai kòi me (Lơh yàng kòi me di àng kơnhai ndar me nhai 12 jăt tơngai he dê). Bŭ lah tus tŭ do, bă ù lơh kòi me tàm tiah kơh bơnơm Phan Sơn neh gơmù uă ngan, mơya geh ờ uă làng bol kung gam gàr sùm nàng prăp gàr bơhiàn ờs mờng. “Pah nam làng bol ờ sơrbì bơhiàn ờs mờng, kung gam bơyai lơh Ñô sào kòi pa, mờ di lah ờ prăp gàr sơntìl kòi me do, den roh bơta kwơ niam chài ờs mờng kòn cau K’ Ho, Rơglai dê, tàm hơ̆ geh bal sơntìl kòi me”.

Kòi me, “gar biàng” tiah kơh bơnơm Phan Sơn dê, mờ uă bơta krơi is, tus tŭ do neh rơhời ờ geh uă tai bă ù nàng lơh, mìng geh ờ uă hìu làng bol gam lơh kòi me tàm bă ù ờ uă. Do kung là tơngu me tờm lơh sơntìl kòi me gam ờ geh uă tai, lơh cồng nha bal mờ bơta bơkah ndrờm gơmù uă ngan. Ồng Mang Nhu, Atbồ cơl dŭ Lơh sa sàh Phan Sơn, càr Lâm Đồng pà git: sàh tŭ do geh di pơgăp 20 hìu lơh kòi me. Tàm hơ̆, hìu lơh uă ngan di pơgăp nggùl sào ù, hìu ờ uă ngan là 3 cuờng. Ồng Nhu pà git, tŭ do sàh kung gam lam sồr làng bol prăp gàr broă lơh kòi me nàng prăp gàr bơhiàn ờ mờng niam chài. Mờ sàh dan mờ Anih duh broă Làng bol càr lơh geh uă wơl sơntìl kòi me do. “Lài mờ tŭ tơrgùm bal càr, sàh kung neh pơgồp bal mờ Anih lơh broă kơlôi sơnơng bơta chài Broă lơh sa suơn sre Đah jum dà lơgar lơh geh uă wơl sơntìl kòi me sàh in. Mờ sàh kung rơcang pơgồp bal mờ hìu ồng Nguyễn Văn Chung nàng lơh broă lơh do. Hìu do kung dờp nàng lơh geh uă wơl sơntìl kòi do nàng làng bol kòn cau Rơglai, K’ Ho in”.

Nam 2024, hìu ồng Nguyễn Văn Chung, tàm sàh Phan Sơn, càr Lâm Đồng neh sơn đờm tàm broă lơh kòi me jăt broă lơh hữu kơ tàm bă ù ơnàng 2 lồ mờ lài ngan geh cồng nha niam. Pơn jăt tai tàm nam 2025 do, ồng neh rề ơnàng bă ù tus mờr 5 lồ tàm tiah ƀòn Phan Lâm lài do (Danao Ghe). Ồng Nguyễn Văn Chung pà git, kis đềt mềr mờ tiah do neh bơh jŏ ngan, den tàng ồng wă bè bơta kwơ bơh gar sơntìl kòi me gơwèt mờ làng bol kòn cau Rơglai, K’ Ho dê.

Tŭ lơh broă lơh jăt broă lơh hữu kơ nàng lơh geh wơl sơntìl kòi do, ồng geh dong kờl 800 kĭ sơntìl kòi me mờ 4 tấn phơng hữu kơ. “Broă do là jơnau kờñ uă ngan bơh ƀòn lơgar dê den tàng añ kung lơh ngan lơh geh sùm. Sơntìl kòi me bơh yau tus tŭ do bè neh mŭt tàm rài kah yau bloh, ờ gơtùi sơrbì ờ. Tŭ lơh kung geh Anih lơh broă kơlôi sơnơng bơta chài Broă lơh sa suơn sre Đah jum dà lơgar dong kờl mờ gơnoar atbồ sàh kung sền gròi ai tơl bơta niam nàng lơh geh uă sơntìl kòi me do”.

Jăt mờ bơta krơi is, sơntìl kòi me geh tơngai hòn dờng tàm 6 nhai, mơya tŭ lơh geh wơl mờ ngui bơta chài măt mok tàm broă lơh, tơngai hòn gơs bơh tờm kòi me do tơmù mờr 2 nhai mờ cồng nha geh uă rơlao. Ồng Đào Minh Sô, Atbồ môn Rơwah lơh sơntìl phan tam, gơwèt Anih kơlôi sơnơng bơta chài Broă lơh sa suơn sre Đah jum Dà lơgar pà git, nam 2022, bơh ală gar sơntìl kòi me geh ală kra ƀòn tàm sàh Phan Sơn ai, ồng neh bal mờ ờ uă cau lơh broă bal, mŭt lơh broă lơh kòi me tàm tiah ƀòn Phan Lâm lài do (Danao Ghe) mờ tus tŭ do neh lơh gơs broă lơh do. “Ờ mìng ală broă lơh jăt broă hữu kơ lơm, mờ añ gam lơh jăt broă lơh tam, tùc bè ờs, hơ̆ là he tơmù uă ngan broă ngui phơng vô kơ mờ sơnơm sền gàr phan tam. Mờ broă lơh añ kơlôi sơnơng tus kàl lơh sa tŭ do den cồng nha kòi me geh tus mờr 4 tấn tàm 1 lồ tơn. Hơ̆ là dùl broă lơh geh cồng nha uă ngan gơwèt mờ sơntìl kòi bơh yau dê”.

Tam pà bal bè rài tơnơ̆ do bơh kòi me dê, ồng Nguyễn Văn Chung pà git, ồng rơ̆p pơn jăt tai lam làng bol lơh kòi me jăt broă lơh hữu kơ, bơh tŭ hơ̆ lơh gơs măt kă bro phan krơi is ƀòn lơgar dê, ờ mìng di pal mờ jơnau kờñ bơh làng bol tàm sàh dê mờ gam drơng cau năc lòt nhơl tŭ gơl gùng 28B tơrbŏ dà lềng Mũi Né mờ tiah tam bơkào Dà Làc mờr lơh gơs. Bơh tŭ hơ̆, gar kòi me “gar biàng” tàm tiah kơh bơnơm Phan Sơn kòn cau K’ Ho, Rơglai dê tàm dơ̆ Ñô sa chờ kòi pa (Do là ñô sa chờ ờs mờng kòn cau K’ Ho, Rơglai) dê geh jăt jơng cau năc lòt nhơl tus tàm ală tiah tàm gùt lơgar.