Rlau 1 nhai do, ală ngai lồi poh, tàm Anih tờm Drơng broă sa priă Tơrgùm bal sàh Hàm Thuận, càr Lâm Đồng, mpồl đơs crih tam ya làng bol mờ ràng tơlik phan soh jơi bơtiàn Prum dê ndrờm jơh nùs jơh tồr ngan bơsram tàp. Bi Thông Đinh Đương, pà gĭt, do là dơ̆ sơnrờp bi geh tus bal Ngai chờ Niam chài Prum gùt lơgar, să tờm gơlơh pơñiờ să ngan mờ chờ hờp:

“Do ờ mìng là dùl Ngai chờ dờng lơm mờ do gam là tiah nàng ală oh gơtùi tàm sơm băt tê bal tă pơgồp dồ êt bơta pràn dềt rơhền lơi hơ̆ nàng yal uă niam chài, bơhiàn krơi is jơi bơtiàn cau Prum bol oh dê gơ wèt mờ jơh ală cau iăt cau sền. Ưn ngài ngan Đảng mờ Dà lơgar neh ai tơl bơta nàng ai cau Prum tàm jơh ală tiah tàm gùt lơgar gơtùi rê tơrgùm bal, lơh geh nùs nhơm niam chài rơnàng kơnòm să dê tàm tơnơ̆ do, tàm broă prăp gàr, ngui niam bơhiàn niam chài krơi is jơi bơtiàn Prum dê. Oh kung bè jơh ală cau tàm mpồl cau lơh tŭ do gam lơh ngan mờ pơnđơl ngan, kơ̆p kờñ cèng wơl ală jơnau đơs crih tam ya niam bơnĕ ngan rlau jơh nàng drơng ai ală oh mi làng bol ƀòn lơgar in”.

Mờ tơngume cèng tus Ngai chờ là “Prăp gàr, ngui niam bơhiàn niam chài krơi is jơi bơtiàn Prum càr Lâm Đồng dê tàm rài pa”, mpồl Lâm Đồng rơ̆p tus bal lơh uă tơngume niam bơnĕ is nàng kờñ yal tơnggĭt uă jrô niam chài Prum dê gam geh mpồl bơtiàn prăp gàr. Tàm hơ̆, broă lơh niam chài tơrgùm tàm ală tơngume, bè: ràng tơlik, yal tơnggĭt dồ êt dơ̆ lơh chờ lơh yàng, broă lơh niam chài ờs mờng bơh yau jơi bơtiàn Prum dê; ơn pơdơng yal tơnggĭt, yal oă niam chài ờs mờng bơh yau jơi bơtiàn Prum dê tàm broă lơh bơ̆t bơtàu mờ sền gàr ƀòn tờm. Mơkung geh broă lơh ràng tơlik, yal tơnggĭt broă lơh mờ tê ờs mờng bơh yau tàñ ồi, broă lơh ù buh jơi bơtiàn Prum dê; pơrlòng đơs crih tam ya làng bol mờ ràng tơlik phan soh jơi bơtiàn Prum dê.

Ồng Lâm Tấn Bình là Cau chài Jak tàm sàh Bắc Bình pà gĭt, tàm ngai chờ, mpồl rơ̆p ràng tơlik, yal tơnggĭt dùl gơ̆ dơ̆ lơh chờ lơh yàng, broă lơh “Tơngguh gơnoar broă Cau gơnoar bơto dờng gah Kadhar yàng Bàlamôn cau Prum càr Lâm Đồng dê”. Do là jơnau lơh roh uă ngan tŭ jiơ dà kơlhề:

“Lơh chờ tơngguh gơnoar broă Cau gơnoar bơto dờng Kadhar là dơ̆ bơtòm tơrgùm rài niam chài đơs crih tam ya ờs mờng bơh yau cau Prum dê li la, bềng bơhiàn niam chài krơi is bơh ală broă lơh yàng gơcèng tơngume tàm dơlam bal mờ ală jơnau đơs crih tàm Sră đơs crih cham pràn bơh cau duh broă yàng Gru Kadhar dê, tàm bơrlŭ bal mờ jơnau răc dan jơh nùs ngan bơh Muk Pajuw dê nàng kờñ jờng rơ dà kơlhề nùs nhơm, rài kis bơh ală cau Bơtau neh geh sền bè Yàng, bơh ală jơnau kah wơl săp ntas teh đờng kanyi dê, lơh gơlik gơs săp ntas ngoh rơngăc bơh jơnau kah wơl mờ bơta pin dờn đah hwềng bơh ală cau dòn yàng do dê…”

Bơdìh mờ bơnah pơrlòng bè niam chài ờs mờng bơh yau, đơs crih tam ya, tàp pràn să jan, mpồl Lâm Đồng gam geh măt bal tàm ù tiah ràng tơlik yal tơnggĭt, yal uă niam chài ờs mờng bơh yau ƀòn lơgar dê, lơh mpờl gŏ loh rùp să cau Prum tàm Lâm Đồng tàm broă lơh bơ̆t bơtàu mờ sền gàr ƀòn tờm; tiah tềl lời wơl, tiah lòt nhơl tiơng pơnrơ, ală dơ̆ lơh chờ lơh yàng; yal tơnggĭt bè ală phan lời wơl niam chài Hìu bơnhă Bơtau Prum dê geh jòi tơrgùm geh…

Is ồn, mpồl rơ̆p tus bal yal tơnggĭt bàr pe anih tus pơnrơ bơh Lâm Đồng dê, yal uă bàr pe phan lơh geh bơh sươn sre, phan bơna OCOP pơnrơ ngan;…Ồng Nguyễn Tú Long, Phó Kwang Lam bồ Anih tờm Niam chài mờ Ătbồ Sươn bal phan dơlam ù Dăk Nông – càr Lâm Đồng pà gĭt, mpồl geh 85 nă cau tus bal Ngai chờ bal mờ nùs nhơm tìp măt lơh kwèng, lùp bơsram bal mờ gơ̆p bơtàu tơngguh:

“Tŭ do, broă lơh rơcăng sền bal neh di đau. Đơs bal broă lơh cèng uă bơhiàn niam chài krơi is jơi bơtiàn Prum dê. Nam do, mpồl cau tờm là bơh Hàm Thuận Bắc (yau), geh: coh plai, ală bơta tàp pràn să jan làng bol, hơ̆ sồng mpồl cau tus bal pơrlòng đơs crih tam ya làng bol mờ ràng tơlik phan soh. Is dùl gơl lơh yàng lơh chờ den mpồl cau là cau drơng broă yàng bơh Bắc Bình yau dê”.

Ngai chờ Niam chài jơi bơtiàn Prum dơ̆ VI tàm càr Khánh Hoà rơ̆p geh lơh bơh ngai 26 tus 28/6 do, là ù tiah tìp bal rùp să niam chài Prum tàm làm gùt lơgar. Ngai chờ bơtòm tơrgùm rlau 700 nă cau chài, cau đơs crih tam ya, cau tàp pràn să jan làng bol tus bơh 7 càr, ƀòn dờng, geh: Khánh Hoà, Gia Lai, Lâm Đồng, Tây Ninh, An Giang, Dăk Lăk mờ ƀòn dờng Hồ Chí Minh.

Bal mờ Khánh Hoà, Lâm Đồng là càr geh gal làng bol Prum ngan rlau jơh gùt lơgar. Tơngai lài, broă lơh prăp gàr, ngui niam ală bơta kwơ niam chài ờs mờng bơh yau bơh ală jơi bơtiàn dê sùm geh ƀòn lơgar sền gròi. Mờ nùs nhơm tìp măt lơh kwèng, lùp bơsram, tơngguh uă gĭt wă, kơnòl mpồl bơtiàn dê tàm broă lơh prăp gàr, ngui niam ală bơta kwơ niam chài ờs mờng bơh yau tàm tơngai mŭt gơrờm bal mờ bơtàu tơngguh dà lơgar dê, ală cau đơs crih tam ya ờ mờng mờ ală cau chài cau Prum càr Lâm Đồng gam jơh nùs jơh tồr ngan bơsram tàp mờ chờ hờp ngan, kơ̆p tus Ngai chờ bềng rùp să niam chài làng bol jơi bơtiàn he dê.