Tàm sàh Tây Khánh Sơn, ù tiah tiah kơh bơnơm geh uă ngan làng bol jơi bơtiàn dồ ết nă cau, tŭ do mìng geh 135 nă cau pơgru, ờ tơl 30 nă. Bàr pe môn bơsram bè dà mỹ, đơs crih, Tin họk... ờ geh cau pơgru tàm ơdŭ bơsram, sồr pal kơnờm cau pơgru bơh tiah ndai tus dong kờl. Ồng Phạm Ngọc Hải, Bí thư Đảng ủy sàh Tây Khánh Sơn pà gĭt, sàh neh bơyai lơh rơ wah cau pơgru mơya ờ geh cau tong sră nggal.

"Ù tiah sàh Tây Khánh Sơn geh 5 hìu bơsram gam ờ tơl 30 nă cau pơgru. Bol añ mblàng yal, hòi jà yal tơngĭt jơnau sac rwah cau pơgru tàm ală gah nàng kĭ sră pơrgon lơh broă. Gơ lơh bè bơta gơ hòi gơ jà cau pơgru rê tàm tiah kơh bơnơm ờ hềt tơl pràn den tàng pơnđàng uă ngan mơya ờ geh cau pơgru lơi rê. Sàh bol añ kơ̆p kờñ càr dong kờl mờ broă tam pà cau pơgru tàm tiah ring rê lơh broă tàm tiah kơh bơnơm”.

Bơta geh ngan do ờ mìng gơlik geh tàm Tây Khánh Sơn lơm mờ gam geh tàm uă tiah kơh bơnơm ndai bơh càr Khánh Hoà dê bè Khánh Vĩnh, Bác Ái…Lài do, broă gơ hòi gơ jà cau pơgru tiah kơh bơnơm geh ală kơnhoàl tàm càr bơsong mờ broă lơh tàm pơ dar. Mơya, bơh tŭ mut lơh mpồl lơh broă gơnoar atbồ ƀòn lơgar 2 kấp, broă lơh sồr- tàm ntrờn cau pơgru ờ hềt geh lơh wơl. Jat ồng Lê Đình Thuần, Phó Kwang lam bồ Sờh bơto bơtê mờ Bơsram càr Khánh Hoà do là jơnau kal ke ờ hềt gơtùi bơsong mơ:

“Bol añ rơ̆p pơn jat tai kơlôi sơnơng tai geh ală broă lơh krơi is, hòi jà cau pơgru rê lơh broă tàm tiah kal ke uă. Dilah yal dùl Jơnau lơh nền tàm pơrjum pal geh broă lơh yal, dan gùng dà broă lơh, ring bal gùng dà broă lơh, bơt bơtàu Jơnau lơh nền tàm pơrjum, ai khà tă, khà priă tă ngui, uă broă lơh kal ke ngan”.

Tềng đăp bơta geh ngan ală hìu bơsram tiah kơh bơnơm ờ tơl cau pơgru mờ Sờh Bơto bơtê mờ Bơsram càr Khánh Hoà den kờñ geh tŭ tơngai kơlôi sơnơng, Bí thư Tỉñ ủy càr Khánh Hoà ồng Trần Phong sồr Sờh mhar sền sơ wì broă lơh bơh ală tiah dê tàm gùt lơgar, lài mờ tŭ kơlôi sơnơng- sồr đơs broă lơh dong kờl.

 "Dilah tàm gùt lơgar ờ geh tai den tŭ hơ̆ hơ̆ sồng he lơh is nàng kơlôi sơnơng broă lơh. Tŭ do, ală tiah bơyô neh geh rao den he sền wì, lùp bơsram. Tài bơh broă lơh do gơ jat bal mờ kes priă bơh ală tiah, gơnăp gơnoar bơh Mpồl duh broă Làng bol càr dê lơh nền. Càr geh ală bơta den dong kờl mơya broă nùs nhơm bơh càr dê gơwèt mờ cau pơgru tŭ lòt tàm tiah kơh bơnơm lơh broă bè lơi”.

Bơsong jơnau ờ tơl cau pơgru tiah kơh bơnơm tàm càr Khánh Hoà ờ mìng ƀuơn ngan là jơnau sac rơ wah cau pơgru lơm, mờ là bơta đo was ai bơta sền gròi, geh kơnòl bơh ală anih lơh broă chính trị dê gơwèt mờ broă lơh bơto bơtê tiah kơh bơnơm. Bơta ală hìu bơsram tiah kơh bơnơm kờñ tŭ do là bơta rcang lài, ngăc ngar bơh ală anih lơh broă tă pơgồp jơnau đơs tàm broă gơ hòi gơ jà cau pơgru. Nàng tŭ nam bơsram pa sơn đờm, ală hìu bơsram tiah kơh bơnơm ờ gam pal gơ tìp kwi kwơ lòt apah cau pơgru tai.