Tơnơ̆ tŭ rơndap tap sèng wơl ală mpồl lơh broă sră pơ àr gơnoar atbồ kâp càr, Khánh Hòa rề ơnàng ù tiah bơtaù tơnguh mờ rlau 8 rbô 700 kơi sồ vuông ù gờl, 65 mpồl lơh broă sră pơ àr gơnoar atbồ kâp sàh bal mờ tiah dà lềng dờng ơnàng ngan. Rơndap ù tiah geh lơh kơ̆ ngan, lơh jat Adat Rơndap ù tiah nam 2025 mờ cih dờp uă ngan jơnau đơs bơh ală ƀộ, gah broă lơh Dà lơgar bal mờ làng bol.

Jat rơndap ù tiah, Khánh Hòa ai tơlik lài gùng dà gơ gơs là tiah bơh chờm tơrbŏ tiah kềng gah dà lềng đah jum tàm gùl lơgar mờ Tây Nguyên, ai gùng Nha Trang - Dà Làc lơh tờm nàng lơh gơs ù tiah tơrbŏ bal “Dà lềng - Kơh bơbơm”. Broă lơh bơtàu tơnguh càr Khánh Hòa dê geh git nền loh làng jat bơta pal jat: “1 broă rơndap lơh bal - 2 gùng tàm tơrbŏ - 3 gah gơguh lơh sa - 4 gah tờm gơn kơnờm”. Tàm hơ̆, 4 gah tờm bơtàu tơnguh Khánh Hòa dê geh: Lòt nhơl geh bơta niam uă, tam gơl pa bơceh lơh mờ broă drơng ala sồ; lơh sa mờ măi mok gùng dà lềng; lơh mờ măi mok lơh gơlik, crăp mòn măi mok pa… Mblàng jrô rlau tai bè gùng dà do, ồng Châu Ngô Anh Nhân - Kwang Lam bồ Sờh Priă jền càr Khánh Hòa pà git:

“Bè gah năng lượng, tơrgùm bơtàu tơnguh ală bơta năng lượng pa, năng lượng lơh geh wơl, tàm hơ̆ geh năng lượng hạt ñân tàm tiah đah jum càr Khánh Hòa. Bè gùng dà bơtàu tơnguh tiah drà, ƀòn lơgar, lài mờ nam 2030, càr Khánh Hòa gơ gơs là ƀòn dờng gơ wèt Dà lơgar, tơng gơs 21 tiah drà, tàm hơ̆ geh 5 tiah drà khà 2 mờ pơn đơl lơh geh broă sồr nàng lơh geh tiah drà kà 2 mờ 16 tiah drà khà 3”.

Bè broă rơndap lơh tus nam 2050, Khánh Hòa pơn đơl gơ gơs là tiah tờm lơh sa dà lềng dờng gùt lơgar dê, bơtàu tơnguh tơlir mờ ndrờm pal mờ tiah châu Á. Đơs tàm pơrjum, ồng Nguyễn Việt Hùng - Chủ tịch Anih duh broă Làng bol càr Khánh Hòa đơs sùm, broă yal rơndap ù tiah ờ di là bơta tơn jơh mờ là bơta sơn đờm ai dùl tŭ tơngai bơtàu tơnguh pa in. Cồng nha lơh geh pal geh đo was mờ ală rơndap broă lơh geh cồng nha mờ bơta tam gơl niam tàm rài kis làng bol. Càr Khánh Hòa hơ pơrgon bơtàu tơnguh mhar mơya kơ̆ kơljap, kràñ cê ờ tam gơl tiah ơm kis, phan kuơ geh is mờ phan lời wơl nàng ai bơta gơguh lơh sa tềng đap mat. Nàng lơh geh bơta pin dờn ai priă bơcri in, ồng Nguyễn Việt Hùng đơs nền:

“Pơn jat tai tơrgùm tă bơsong ală bơta gơ kòl tàm kòl yan bơtàu tơnguh, ngan là ală broă bè rơndap ù tiah, ù tiah, bơcri priă, ai ù lơh rơndap broă mờ sră pơ àr gơnoar atbồ. Rơndap ù tiah neh lơh gơs ù tiah bơtàu tơnguh. Kơnòl broă bol he dê là pal lơh bơta hơ̆, mờ kung là gơ wèt mờ mpồl bơtiàn mpồl lơh sa kă bro, ală cau bơcri priă den añ kơp kờñ ală oh mi sền swì sră rơndap ù tiah do là bơnàng jă nàng iang nùs bơcri priă jŏ jòng tàm càr Khánh Hòa”.