Jat jơnau yal tàm pơrjum, 6 nhai bồ nam 2026, jơh gùt ling klàng neh gàr sùm kràñ ngan broă crăp rơcang tam lơh, git loh bơta geh ngan mờ di tŭ tă pơgồp jơnau đơs mờ Đảng, Dà lơgar bơsong ngac ngar, geh cồng nha ală broă gơlik geh, sền gàr kơ̆ gơnoar tờm kơnhoàl ù tiah. Tơngai tus, jơh gùt ling klàng ring bal bơsram uă jơnau sồr lơh bơh ồng Tô Lâm - Tổng Bí thư, Chủ tịch lơgar, Bí thư Anih duh broă đơng lam Đảng ling klàng dà lơgar, hơ̆ là bơta lơh ngan lơh geh tam gơl pràn, lơh gơs tus geh kơnòl broă nam 2026. Tàm hơ̆, ală kơnòl broă tờm là tơnguh pràn jak kờp dŭ lài kuơmàng, di tŭ bơsong tus gơtùi ală broă gơlik geh, ờ lời gơtìp rơ mơp ndơl, nisơna; sồr tam gơl broă rơndap lơh sền gàr dà lơgar tờm di pal mờ mùl màl. Gàr sùm kràñ cê bơta crăp rơcang tam lơh; sền gàr tiah kơl wàng trồ, tiah dà lềng, tiah nhàr lơgar mờ internet. Sền dờng màng gơ hòi gơ jà cau jak chài lơh jat jơnau sồr tam gơl pa; lơh pràn bơsram mờ lơh jat bồ tơngoh, nùs nhơm, niam chài rài kis Hồ Chí Minh; tơnguh cồng nha lơh broă hòi jà làng bol.