Jat jơnau yal, kờp jơh phan lơh gơs tàm càr (GRDP) tàm 6 nhai bồ nam càr Lâm Đồng dê mìng lơh geh mờr 7,9%, lơyah rlau jơnau rơcang geh ai tơlik. Tềng đap bơta geh ngan do, uă cau ala mat Mpồl duh broă Làng bol càr sồr Anih duh broă Làng bol càr lơh loh ală bơta ƀuơn, bơta pràn gơguh lơh sa gam wơl tàm 6 nhai lồi nam. Mblàng lơh loh tềng đap hìu pơrjum, đơng lam ală sờh, gah broă lơh pà git, càr neh sền nền wơl, yal jơnau rơcang lài bơtàu tơnguh jat tơl gah, tơl broă. Tàm hơ̆, lơh sa suơn sre pơn jat tai geh gơnoar broă là bơnàng jă chồl tơnguh mờ khà gơguh rlau 5%, ai lơh sa mờ măi mok, bơt bơtàu mờ broă drơng ala geh git nền là ală gah lơh gơlik bơta tam gơl pràn nàng bơ tơl wơl bơnah gơguh lơh sa gam ờ tơl.

Dùl tàm ală bơta tờm geh kơp kơnờm là gah lơh mờ măi mok trà. Jat ồng Nguyễn Bá Út - Kwang lam bồ Sờh Lơh sa mờ măi mok mờ kă bro phan càr Lâm Đồng, bal mờ broă lơh mhar ai priă bơcri dà lơgar mờ tă bơsong kal ke ai ală rơndap broă lơh in, uă broă lơh lơh sa mờ măi mok kuơmàng rơp lơh broă tàm quý 3 mờ quý 4 tơn, lơh gơlik tai bơta gơn kơnờm gơguh lơh sa ai càr in:

“Ngai 09 nhai 7 bol he rơp geh trà duh, ngai 19 nhai 7 rơp geh trà nrăng mờ ngai 26 nhai 7 rơp tac phan trà sơn rờp. Gah lơh sa mờ măi mok gam wơl, tŭ do tơrgùm tàm 14 hìu măi gơ rềng tus lơh mờ măi mok lơh gơlik phan tàm ală tiah, ală mpồl lơh sa mờ măi mok, is ồn là ù tiah càr Bình Thuận yau rơp lơh broă tàm quý 3, quý 4 tơn. Do là ală bơta ƀuơn kuơmàng ngan nàng tă pơgồp tàm gơguh lơh sa”.

Bulah bè hơ̆, uă cau ala mat đơs là, git di bơta ƀuơn, bơta pràn mìng là bơta pal geh. Bơta kuơmàng rlau là pal ai tơlik khà mùl màl tă pơgồp bơh tơl rơndap broă lơh, tơl gah lơh phan dê gơ wèt mờ jơnau kờñ gơguh lơh sa đơs bal, bơh hơ̆ dong broă đơng lam lơh jat ngac ngar rlau mờ lơh gơlik bơnàng jă nàng anih lơh broă làng bol pồ in jat sền tơngai hơ pơrgon lam lơh.

Đơs pơn dut dar pơrjum, ồng Lưu Văn Trung - Phó Bí thư Tỉnh ủy, Chủ tịch Mpồl duh broă Làng bol càr Lâm Đồng đơs sùm, tơngai gam wơl nam do dê ờ uă, bè hơ̆ den tàng mìng ală rơndap broă lơh gờñ lơh gơs phan mờ priă lơh geh gơguh uă den hơ̆ sồng gơtùi tă pơgồp tơn tàm jơnau kờñ gơguh lơh sa:

“Ală rơndap broă lơh lơh gơlik phan mơ tơn nàng pơgồp bơnah ai gơguh lơh sa in là ală rơndap broă lơh năng lượng, rơndap broă lơh hìu măi đèng dà gam ờ tơl gùng che đèng den bơcri priă lơh là pờ tơlik đèng, hìu măi lơh trà den bơh tŭ do tus lồi nam lơh geh trà kàr lơi rơp lơh geh gơguh lơh sa. Añ sồr pal geh dùl jơnau rơcang lài mùl màl, ngan ngồn ai tơl hìu măi, tơl rơndap broă lơh in”.

Jơnau pơyua bơh hìu pơrjum càr Lâm Đồng dê kung đơs jơnau sồr bal geh ai tơlik gơ wèt mờ uă càr Tây Nguyên tŭ do: Kờñ lơh geh jơnau kờñ gơguh lơh sa jơnhua den tơl rơndap broă lơh pal pơgồp bal mờ tŭ tơngai hơ pơrgon mùl màl, tơl broă lơh pal gờñ lơh gơlik phan bơna, tơl gah pal git loh bơnah tă pơgồp he dê. Mìng tŭ ală gơn kơnờm gơguh lơh sa geh lơh gơs khà mờ priă jền mùl màl den jơnau kờñ gơguh lơh sa 2 nơm khà hơ̆ sồng geh bơnàng jă nàng lơh geh ngan ngồn tàm nam 2026 do.