Chờ hờp wă rò kah kir sơnrai 80 nam ngai Sơn tờm Dà lơgar 2/09, tàm ƀòn Chưp, sàh Lơ Pang, càr Gia Lai, làng bol Bahnar bal mờ gơ̆p yồng bồng bi Dà lơgar, bơyai lơh uă broă lơh geh kwơ ngan tơnggŏ nùs gơboh ƀòn tờm, dà lơgar tờm. Do là tŭ nàng làng bol in sền wơl dùl gơl gùng khin cha jak chài ngan bơh jơnau kah yau jơi bơtiàn dê mờ sền bal hờ rài tơnơ̆ do àng sơrdah. Ồng Đinh Brơi, 67 sơnam, 44 sơnam Đảng, là kra ƀòn ƀòn Chưp, sàh Lơ Pang, càr Gia Lai hừh nùs ngan, đơs:

“Ngai 02/09, ngai Sơn tờm Dà lơgar, jơh ală làng bol tàm Tây Nguyên chờ hờp bal bơta chờ hờp ngai lơngăp lơngai is mờ jơh gùt lơgar. Tŭ gam dềt, să tờm añ neh gĭt gŏ geh broă is ồn do, den tàng tŭ dờng neh jơh nùs lơh ngan đòm jăt krơh ồng Núp cau khin cha jak chài dê tŭ tam lơh mờ bol Tây là ờ gŏ bài kong ờ, ờ gŏ pờ tê ờ jai tam lơh, ờ gŏ kờñ lơh dĭ gơna ai bol sò tơm in. Den tàng neh lòt lơh cau ling, pơgồp bal dà kơlhề bơta pràn tŭ dà lơgar kờñ, tam klăc dùl nùs jăt Đảng, Dà lơgar, kơnờm bè hơ̆, tus nam 1975 hơ̆ sồng tơngklàs geh dà lơgar. Ai tŭ do lơh sa, mpồl bơtiàn ngai sơlơ bơtàu tơngguh mờ sơlơ gŏ gơlơh hừh nùs ngan rlau bè dà lơgar Việt Nam he”.

Kra ƀòn K’Keo, kòn cau K’Ho, mờr 70 sơnam, Ƀí thư Ci ƀộ thôn Hàng Làng, sàh Di Linh, càr Lâm Đồng pà gĭt, bơsram mờ lơh jăt Wa Hồ jơh 16 nă đảng viên tàm ci ƀộ thôn sùm lơh krơh lòt lài tàm ală broă lơh. Bè să tờm kra ƀòn, bulah sơnam dờng mơya kung gam kong bòl glar kal ke sơl lùp bơsram đòm jăt bơta jak chài tam lơh kơphê, kòi sre…gơ ai tơnhàu uă. Mơkung prăp gàr niam chài ờs mờng bơh yau jơi bơtiàn dê, hòi jà làng bol bơ̆t bơtàu rài kis pa. Kra ƀòn ồng K’Keo pà gĭt:

Jơh ală đảng viên tàm ci ƀộ ndrờm gĭt loh kơnòl broă mờ kơnòl bơh đảng viên dê, sùm là cau lam lài lơh krơh tàm tơl kơnòl broă bơtàu tơngguh lơh sa, lơh jăt niam ală jơnau sồr, gùng dà broă lơh adăt boh lam bơh Đảng, Dà lơgar dê; prăp gàr mpồl tam klăc dờng mpồl bơtiàn, tàm hơ̆ geh uă đảng viên gam kơnòm. Do ngan là ală krơh àng bơsram đòm jăt krơh Wa Hồ nàng ai làng bol ƀòn lơgar in ai bơta hơ̆ lơh gai was. Kờñ ci bộ pràn den mpồl đảng viên pal dùl nùs bal dùl jơnau kơ̆p kờñ bal, lơh krơh tàm jơh ală kơnòl broă den hơ̆ sồng lơh gơs niam kơnòl broă geh jàu pah nam.

 Ndrờm bal jơnau kơlôi sơnơng mờ lơh broă bè broă cau kra lơh krơh ai cau kơnòm in, ồng Liêng Hót Ha Kliêng kòn cau K’Ho là cau geh bơngă pin dờn tàm thôn Srê Đăng, sàh Tân Hội, càr Lâm Đồng đơs:

Bơsram mờ lơh jăt Wa Hồ hơ̆ là bơta kờñ gơboh dà lơgar, lơh jăt niam gùng dà broă lơh Đảng, Dà lơgar dê. Bơta bàr tai là làng bol ƀòn lơgar pal ơm kis lơh lòt lơh sa niam, bơto tơngkah oh kòn kòn sau, ngan là ơruh pơnu bañ lòt gùng is lơh tìs adăt boh lam, pal bañ gơtìp tàm sơke ma túy, ờ gŏ di bơñul ñô. Pal tam klăc, bañ tung kơñau, ờ gŏ di lơh roh bơta lơngăp lơngai rơndăp tăp sèng lơh roh bơta tam klăc đah ală jơi bơtiàn oh mi, hơ̆ là ală bơta lơi mờ ală cau dờng sơnam bơsram Wa Hồ mờ pal lơh krơh niam tàm ƀòn lơgar.

Là dùl nă cau pơnrơ gơguh jak pa geh gơnoar ătbồ sàh Đăk Tô, càr Quảng Ngãi jờng rơ lài mờ dơ̆ Sơn tờm Dà lơgar 2/09, mò Y Xuân, kòn cau Sơdàng, Ƀí thư mờ là Lam bồ thôn Kon Hring, chờ hờp yal: “Añ sùm hòi jà làng bol bơ̆t bơtàu ƀòn lơgar pa, tam gơl rài kis, hìu đam pal lơh pơngàr mờ sàng goh, gùng ƀòn pal tam bơkàu nàng lơh niam ai ƀòn in. Añ hòi jà làng bol tam gơl bơta mờng sơnơng, bơta mờng lơh, sang tĕ ală broă lơh sa bơngơl gơla bè lài do, tam gơl chi tam dipal mờ ù tiah nàng tơnguh uă priă lơh geh ai hìu bơnhă in. Tàm thôn tŭ do neh tam gơl uă ngan, ngan là bol kơnòm tŭ do pơnđơl pràn ngan tơryăng tơryồng ngan lơh sa, tàm pơrlòng bal lơh sa, uă hìu bơnhă blơi geh rơndeh măy, rơndeh lơ òr, măy măy kơphê…ndrờm bè hìu lơi kung blơi tơl phan ngui drơng ai broă lơh broă lơh sa sươn sre in”.

Bơsram mờ lơh jăt bồ tơngoh, nùs nhơm, rài kis mờ broă lơh Hồ Chí Minh dê, cau ùr mờ ơruh pơnu sàh Cuôr Dăng, càr Dăk Lăk neh mờ gam lơh gơrề uă nùs nhơm tàm dong tàm kờñ bal tàm mpồl bơtiàn. Bi H’Xani Niê, kòn cau Rơđê là Phó Củ tịc Mpồl tam klăc cau ùr sàh Cuôr Dăng, pà gĭt:

“Mpồl cau ùr mờ đoàn ơruh pơnu tàm sàh Cuôr Dăng sùm dùl nùs bal tơrgùm bal pràn, sùm iăt jăt jơnau bơto bơh Wa Hồ dê bơh broă hòi jà ală cau tàm mpồl pơrjum cribơyai geh bal broă rơndăp lơh dong kờl mpồl bơtiàn; pơnyơu bè lơh ngan dong kờl hiù lơi rƀah, lùp còp ală hìu bơnhă dờp bơta dong kờl mpồl bơtiàn dê…Đoàn ơruh pơnu sàh mờ mpồl cau ùr kung pơgồp bal nàng bal mờ gơp prăp gàr broă lơh ờs mờng bơh yau bơh jơi bơtiàn dê bè tàñ ồi, bơsram đơs eirei, tàp dròng cing”.

Bi Luy, kòn cau Jarai, Ƀí thư Đoàn sàh Ia Băng, càr Gia Lai den kờñ ngan mờ jơnau đơs wa Hồ dê “Broă lơi geh kuơ làng bol in den pal lơh jơh nùs, broă lơi gơ lơh aniai tus làng bol den pal lơh ngan pleh”. Bi pà git ală broă lơh bơh ơruh pơnu tàm sàh dê: “Kơnòl bol hi dê là lơh pràn broă lơh mblàng yal, nàng ơruh pơnu mờ làng bol in wă wờng, bơh hơ̆ kis niam, kis di jat Jơnau nting bơr lời wơl bơh Wa Hồ dê tơngkah. Đoàn sàh neh jơh nùs ngan tus bal dong kờl làng bol tàm broă lơh sră pơ àr yal mat khà 2 mờ crap tơmut VneID. Bơh hơ̆, dong lơh ală sră pơ àr gơnoar atbồ gơ gơs sơrbac mhar, ƀuơn uă rlau. Đoàn ơruh pơnu sàh Ia Băng neh pơgồp bal mờ ling Quân đoàn 3 bơyai lơh ai cau lơh broă pơs wàs kloh niam, jì nhơt rŭ rơm, tuah wàs rbòng dà mờ dong lơh gùng lòt tàm ƀlàng sre, dong làng bol lòt rê ƀuơn ƀuài, lơh sa ƀuơn rlau”.

Nam do 35 sơnam, mơya bi A Định neh geh 10 nam lơh Ƀí thư Ci ƀộ mờ là cau atbồ thôn Đăk Pung, sàh Ngọc Tụ, càr Quảng Ngãi. Bơsram mờ lơh jat krơh niam Hồ Chí Minh, bi neh bơtàu tơnguh lơh sa hìu bơnhă bơh tam kơphe, kau su, ròng sur kòn cau, ròng iar, ròng ka mờ hòi jà, pơlam làng bol lơh jat. Bơta ngac ngar bi dê neh dong làng bol kòn cau Sơdàng tàm tiah sar lơgar ngài rơhời tơrmù bơta jơgloh rƀah, bơr ngơl gơla, rơhời bơt bơtàu rài kis pa. Bi neh pơn yờ să ngan geh Thủ tướng Cíñ phủ pà ƀằng khen. Bi A Định pà git: “Ală broă lơi kal ke den să tờm he pal lơh lài, he pal lơh krơh lài jat jơnau đơs bơh Củ tịc Hồ Chí Minh dê “Đảng viên lòt lài, ƀòn lơgar lòt jat tơnơ̆”, tàm hơ̆ he pal pơlam làng bol in broă lơh sa, tơnguh priă jền lơh geh. Bè tŭ do mờr tus kàl pik tơnhàu phan, añ bal mờ làng bol ai cau lơh niam wơl gùng ƀòn lơgar nàng ƀuơn tàm broă jun pơndiang phan lơh gơs bơh suơn sre”.

Bi Y’Săn, ơm tàm ƀòn Dăk Mâm, sàh Dăk Săk, càr Lâm Đồng pà git, đoàn ơruh pơnu tàm ƀòn sùm lam lơh ală dơ̆ pơrjum, hòi jà mờ bơyai lơh ală broă lơh dong ơruh pơnu kis geh kơnòl mờ hìu bơnhă, ƀòn lơgar. Kuơmàng là tơnguh nùs nhơm bơsram mờ lơh jat krơh niam Hồ Chí Minh, nàng rài kis ngai sơlơ niam bơnĕ rlau. Bi Y’Săn chờ hờp đơs: “Tàm hìu bơnhă den añ kung sền gròi tàm broă bơtàu tơnguh lơh sa, lơh jat ală bơta tam gơl pa tàm broă sơngka sền gàr kơphe, lơh sre, dong ală ơruh pơnu geh rài kis rlau tàm ƀòn nàng bal mờ gơp bơtàu tơnguh lơh sa. Tŭ do là rài ngui măi mok sồ, să tờm añ kung sùm bơsram, đòm jat, bơto bơtê mờ lơh jat ală jơnau git wă pa ngan rlau jơh nàng gơtùi thàn mờ bơta tam gơl pa”.