Ngai lồi poh, tàm ƀlàng jơng Hìu bơsram mầm non Bình Minh, sàh Ea Na, càr Dăk Lăk, hô hơng săp ñiŏ nhơl. Ală kơnòm dềt hô hơng geh sền đơs crih tam ya, pà ƀañ kèo trung thu mờ dờp phan pà. Sau H’Jun Hie Ksơr, 5 sơnam, kơnòm bơsram ơdŭ Lá, pà gĭt:“Ngai do oh chờ hờp ngan tài bơh geh mơi wa pà ƀañ kèo ai bol kòn in. Bol kòn ưn ngài ală wa, ală mơi”.

Broă lơh Trung thu mờ tơngume “Hô hơng mpoong săp ñiŏ- tam pà bal bơta kờñ gơboh” bơh ơdŭ Trung kấp lý luận cíñ trị A55A, Hìu bơsram cíñ trị càr Dăk Lăk dê bơyai lơh, neh jàu pà 210 bơnah phan pà ai kơnòm bơsram hìu bơsram in. Mò Nguyễn Thị Lệ Nga, Lam bồ Hìu bơsram mầm non Bình Minh pà gĭt:“Kơnòm bơsram tàm do ndrờm là làng bol jơi bơtiàn dồ ết nă cau, uă ngan là oh kòn bơh cau kòp dun dê. Ală sau geh rài kis kal ke uă ngan, ală phan pà do là bơta pơndờm pơnđiang nùs nhơm dờng gơwèt mờ cau pơgru, kơnòm bơsram bơh hìu bơsram dê”.

Dùl tŭ bal, tàm ƀòn Tuôr B, sàh  Ea Na, broă lơh trung thu ai oh in bơh Thañ tra càr Dăk Lăk pơgồp bal neh jàu 75 bơnah phan pà ai kơnòm dềt mờ hìu bơnhă rƀah in. Ờ mìng tàm sàh Ea Na lơm, uă ƀòn lơgar tàm càr Dăk Lăk ală ngai do kung hô hơng săp ntas sơnggơr, bơta àng đèng gŭ.Tàm sàh Ea Mdroh, 300 bơnah phan pà neh geh jàu ai kơnòm dềt ƀòn pôs đồng kăc màng in bơh broă lơh Đèng gŭ sòl àng bơta kơ̆p kờñ. Ai tàm ƀòn Cư Kŏ Êmông, Mpồl Ơruh pơnu sàh Dang Kang pơgồp bal mờ ală mpồl geh nùs nhơm dong kờl is bơyai lơh tam ya đăng grài, gơm bung riêu, siăt sŏ ờ sa priă mờ pà ào mpha, phan ngui bơsram sră, phan pà trung thu ai mờr 700 nă kơnòm dềt bơh 2 ƀòn Cư Păm mờ Cư Kŏ Êmông.  40 bơnah phan pà là phan ngui sa kung geh pơyoa tus ală hìu bơnhă rƀah in.

Bơta chờ hờp Trung thu gam tus mờ ală kơnòm dềt tàm Anih tờm sền gàr dong kờl mpồl bơtiàn mờ kơnòm dềt càr Dăk lăk dê bơh broă lơh Mang chờ àng nhai ndar me do bơh Sờh lơh sơnơm càr dê bơyai lơh. Ală oh geh tus bal pơrlòng lơh đèng gŭ, đơs crih tam ya, phàt ƀañ kèo mờ dờp pà phan, priă bơsram. Ồng Nguyễn Xuân Quý, Lam bồ Anih tờm dê pà gĭt:“Nam do Sờh lơh sơnơm bơyai lơh dùl broă lơh tàm Anih tờm sền gàr dong kờl mpồl bơtiàn càr Dăk Lăk mờ dùl anih tờm làng lơh is, mờ bàr pe broă lơh bè pơrlòng lơh đèng gŭ, đơs crih tam ya, phàt ƀañ kèo trung thu. Broă lơh kung geh bàr pe cau geh nùs nhơm niam lòt bal, pà ală bơnah phan pà, priă bơsram ai kơnòm dềt rƀah sơrlèt gan kal ke bơsram jak in. Bơh hơ̆ kơ̆p kờn rơ̆p lơh gơrề uă tus jơh ală kơnòm dềt sơrlèt kal ke brồ guh bal, gơ gơs kòn bơsram jak, kòn gơ lòng sồr Wa Hồ dê mờ là cau geh kwơ ai mpồl bơtiàn in”.

Tàm săp ntas sơnggơr hô hơng, săp nhơl ñiŏ chờ hờp tàm bơrlŭ bal mờ săp driau dờng pơn jờng ală broă lơh, bơta chờ hờp tơngŏ loh làng tàm muh mat ală kơnòm dềt dê. Oh Nguyễn Thị Minh Châu pà gĭt: “Rcang Trung thu den bol kòn neh tàp đơs crih tam ya, lơh đèng gŭ, tàp tam ya đang grài. Kòn kờñ ngan rlau jơh là geh sền tam ya đăng grài, geh tơl nă cau pà phan. Tus Trung thu den kòn dờp geh uă bơta sền gròi bơh ală Mpồl geh nùs nhơm niam, ală cau dong kờl mờ bơh ală đơng lam bồ, pà ai oh kòn in ală phan pà bulah dềt rơ hền mơya gơwèt mờ kòn den geh kwơ màng ngan”.

Oh Nguyễn Ngọc Hân chờ hờp yal: “Pah nam den tàm do ală mơi wa kung sùm bơyai lơh trung thu ai bol kòn in, geh uă ƀan kèo, phàt ƀañ kèo mờ wă rò đèng gŭ. Bol kòn neh bơka tơl nơm hìu dùl phan mòn lơh mờ lơh đèng gŭ is nàng mblàng yal. Bol kòn kung neh tàp đơs crih tam ya, jơnau bơyai lơh bơh ală bi dờng dê là jà bi rê mờ Tây Bắc, gam jơnau bơyai lơh bơh ală kơnòm dềt dê là Trung thu mù tàm drà”.

 Ală bơnah phan pà, nhơl chờ hờp bal mờ bi Hằng mờ wa Cuội neh dong uă kơnòm dềt kal ke, geh rài kis kal ke uă tàm càr Dăk Lăk in sền gĭt geh nùs nhơm kờñ gơboh mờ tam pà bal. Ờ mìng cèng tus bơta chờ hờp lơm ală broă lơh gam dong kờl lơh geh tai bơta pràn nàng ală kơnòm dềt in lơh ngan sơr lèt gan kal ke, gơlòng sồr mờ bơsram jak.