Lài mờ tơngai Sa tềp bơhiàn Dà lơgar nam Ất Tỵ 2025 mờ gờm chờ tơngkah kir sơnrai 95 nam ngai tơnggơs Đảng Kộng sản Việt Nam (3/2/1930-3/2/2025), mho ngai 14/01, Củ tịc lơgar ồng Lương Cường mờ mpồl lơh broă Dà lơgar neh tus còp mờ gờm chờ sa tềp ală Củ tịc lơgar lài do ồng Trương Tấn Sang mờ ồng Nguyễn Minh Triết. Củ tịc lơgar ồng Lương Cường tơngŏ bơta sền dờng màng ală tă pơgồp bơh 2 nă Củ tịc lơgar lài do dê gơwèt mờ broă lơh kăc màng bơh Đảng, tơnguh gơnoar, bơngă pin dờn Dà lơgar dê mờ lơh kơ̆ kơl jăp mpồl tam klăc dờng jơh gùt jơi bơtiàn.

Di dơ̆ nam pa Ất Tỵ 2025 mờr tus, Củ tịc lơgar neh jàu pà phan Sa tềp ală Củ tịc lơgar lài do dê là ồng Trương Tấn Sang mờ ồng Nguyễn Minh Triết, gờm chờ ală ồng bal mờ hìu bơnhă nam pa geh uă pràn kơl dang să jan, chờ hờp, lơh geh cồng nha, wă rò nam pa Ất Tỵ chờ hờp, ram mhŭ. Củ tịc lơgar lài do ồng Nguyễn Minh Triết mờ ồng Trương Tấn Sang tơngŏ bơta ngoh rơngăc tềng đăp nùs nhơm mờ bơta sền gròi bơh ală kwang đơng lam bồ Đảng, Dà lơgar dê đơs bal mờ dồ nă să is Củ tịc lơgar ồng Lương Cường đơs is; mơkung pin dờn là Dà lơgar he rơ̆p mut tàm nam 2025 kơ̆ kơl jăp bơh bơta đơng lam bơh Đảng dê, lơh geh uă cồng nha dờng pràn rlau tai, lơh geh bơta tam gơl pràn tàm broă lơh bơt bơtàu mờ bơtàu tơnguh Dà lơgar.