Tus còp, gờm chờ sa tềp tàm Cơldŭ lơh broă Kảñ sát Kơ động- Kwang àng càr Kon Tum, Phó Củ tịc Quôk hội ồng Trần Quang Phương jơh nùs lùp còp kwang bàng, cau ling mpồl lơh broă rcang wă rò Sa tềp, is ồn là nùs nhơm crăp rcang tam lơh gàr niam rơndăp tăp sèng lơngăp lơngai mpồl bơtiàn tàm tơngai lài, tàm tŭ mờ tơnơ̆ Sa tềp bơhiàn Dà lơgar Ất Tỵ 2025. Ala mat kwang đơng lam bồ Đảng, Dà lơgar, Phó Củ tịc Quôk hội gờm chờ kwang bàng, cau ling bal mờ hìu bơnhă nam pa pràn kơl dang, chờ hờp, lơh broă gơguh jak lơh sir jak ngan tơl kơnòl broă mờ Đảng, Dà lơgar mờ Làng bol dê jàu.

Lài hơ̆,  Phó Củ tịc Quôk hội ồng Trần Quang Phương bal mờ Mpồl lơh broă Dà lơgar neh tus còp, gờm Sa tềp Dà lơgar Ất Tỵ 2025 Mè Việt Nam Khin cha jak chài mò Đặng Thị Thu, ơm tàm sơnah ƀòn Duy Tân, ƀòn dờng Kon Tum; còp hìu bơnhă ồng Sô Lây Tăng, lài do là Kwang bàng Đảng Dà lơgar, Ƀí thư Tỉñ ủy càr, Kwang atbồ Mpồl Cau ala mat Quôk hội càr Kon Tum dê. Dồ ngai bal, ngai 14/01, Phó Củ tịc Quôk hội ồng Trần Quang Phương bal mờ mpồl lơh broă Dà lơgar tus còp, gờm chờ Sa tềp gơnoar atbồ, Làng bol sàh Sa Loong mờ kwang bàng, cau ling bàr pe mpồl ling klàng tàm kơnhoàl tiah nhàr lơgar Ngọc Hồi, càr Kon Tum. Tàm ƀòn dờng Kon Tum còp mờ gờm chờ Sa tềp Tỉñ ủy, Anih duh broă Làng bol càr, Gah đơng lam Mpồl Ling klàng càr, Gah đơng lam Mpồl ling sền gàr tiah nhàr lơgar càr mờ Kwang àng càr Kon Tum.